Лух Авт
Ай тэӆн сэвты вер самаӊа тайӆаӆӆы
Арсыр верата утаӆтаты харатн, ван кутн Людмила Николаевна Костина шияӆаӆам. Щиты, там ванан, Ёмвошн «Югра-Экспо» нэмпи вантапсэт ӆэщатты хотн ӆув пиӆэӆн уйтантысам. Еша потрэмисман па ма ӆувеӆ ӆув уӆапсайӆ эӆты еша инщассэм.
Ӆув ащеӆ-антеӆ эӆты потраӆ оӆӊитсаӆы:
– Ащем Николай Андреевич Ромбандеев 1926-мет таӆн Хошлог куртан сэма питас, щаӆта Сосьва (Ӆэв) куртан ус. Ӆаварт ляль порайн Ӆэв ёхан эӆты нови хуӆ веӆты кеша Аса китса. Касам курт эӆты хуӆ веӆты ёх Игрим курта китсайт, щита ӆыв сэм хуӆ веӆпасӆасат. Антем Дарья Ивановна Вандымова, ӆув — ханты ими, уйт ӆор тыӆащ 1-мет хатаӆан 1928-мет таӆн Касам куртан сэма питас. Щиты айӆат катӊан Николай Андреевич Ромбандеев па Дарья Ивановна Вандымова Суматвошн уйтаӊа йисӊан. Анеева куртан яха ханшӆтантысӊан па мой версаӊан.
Суматвошн ащем унт вантты вера утаӆтыйс, щаӆта Юильска (Вутвоша) рупитты китса. Антем уӆапсэӆ хуват хуӆ веӆпасӆас. Щита Светлана опем па ма сэма питсаман.
Людмила Николаевна еӆӆы потартас, хоты ащеӆ мушитты питас, щишн ӆыв щемьяеӆ Касам курта касӆас. Щита Раиса апщеӆ сэма питас. Юхат Ромбандееват Поӆнават курта уӆты мантсат, ванты, щаӆта кеншак тутаӊ хопн Суматвоша яӊхты ус. Ащеӆ мушитас, ӆувеӆа ван кутн Суматвош район леккар хота яӊхты мосас.
Ёӆн, ӆыв кутэӆн кат ясаӊан потарсат, щи вер эӆты Людмила Николаевна щиты нумӆаӆы:
– Ащем — охаль ху, туп ханты ясаӊ ищи яма уйтас, антем — ханты ими, ищи айӆтыена охаль ясаӊ утаӆтас. Йи тухаӆ ишн, антеман ляваттаӆайм ки, ма ӆувеӆ ёхӆы ястаӆам: «Я, щи, ма наӊ ханты ясӊенан потарты ант питӆам, ма ащем ясаӊан потарты питӆам». Щаӆта ащеман ляваттаӆайм ки, ма ӆувеӆа ищи щиты щи потарсам. Щимащ ощхуль вер ма ай пораеман ус.
Поӆнават куртаӊ ашкуӆая манмемн ма рущ ясаӊ ант тайсам, щишн еша ӆавартшак утаӆтыты ус. Щи кеша антем ван кутн ашкуӆая вохиӆыса па ястыӆыса, ӆуӆн ёӆн, кутэӆн, рущ ясаӊан ат потарсув.
Дарья Ивановна туса ёнтасты па сэвты нэӊа ус. Ай Люда вантман, ӆув пиӆэӆн ищи ёнтты па сэвты утаӆтыяс. Щиты яӊ таӆ ӆовата ювмаӆн аканяӆ кеша арсыр хорамаӊ ханшет пиӆн ӆуматты сохат сэвас.
Поӆнават куртаӊ ашкуӆа етшаптамаӆ юпийн Людмила Тюмень воша манас. Щита технической училища №33 хоща нянь верты вер хуват лаборанта утаӆтыяс. Ипуш ёхи Поӆнавата щутщаты ёхатмаӆн Ас охаль ху Николай Тарасович Костин пиӆн уйтантас. Ӆув, нэш, ищи Тюменян утаӆтыяс, Людмила пиӆн и общежитияйн, туп няӆмет этажан ус. Утаӆтыты етшаптамеӆ юпийн катӊан мой версаӊан.
Катрайн утаӆтыты етшаптамаӆ юпийн щи тахайн хуӆам таӆ рупитты мосас. Туп нянь верты хотн иса порайн руваӊ ус, щишн айӆат Людмилая щита шеӊк ӆаварт рупитты ус. Ӆув щи рупата эӆты йира манас па икеӆ пиӆн Поӆнават курта керӆас. Тата питы охсар энмаӆты тахайн рупитты оӆӊитас. Щаӆта ёхи хащам 1980-мет таӆатн щи таха лап тухарса. Еӆӆы Людмила Николаевна 25 таӆ Поӆнават куртаӊ леккар хотн пусанщиты нэӊа рупитас. 65-мет таӆа ювмаӆн щутщаты манас. Ияха ӆуӊатты ки, 40 моӆтас таӆ рупитас.
Еӆӆы Людмила Костина ӆув щемьяеӆ эӆты потартас:
– Икем ащеӆ Тарас Павлович Костин Вежакары емаӊ тахаеӆ вантман тайсаӆы. Николай похаӆ мосты пойкащты вера утаӆтас, щишн икем иса щий яӊхиӆыйс па арсыр йир поры верас, ма ӆувеӆа иса порайн нётсам.
Муӊ щемьяевн кат эви сэма питсаӊан, щит Галина па Виктория. Икем антома ювмаӆ юпийн ма утща эвиӊаӆам энмаӆсам. Ун эвем Поӆнават куртан уӆ, ай эвем — Ёмвошн. Ма хуӆам хиӆы тайӆам.
Щутщаман Людмила Николаевна арсыр хорамаӊ ханшаӊ ӆуматты сохат сэвӆ. Поӆнават куртаӊ культура хотн «Сорнеӊ ёш» таха уӆ. Щита кашӊ щутщаты хатаӆан имет яха актащман ёнтӆат па сэвӆат. Ёхи хащам таӆатн арсыр вантопсэта вохты питса. Щита ӆув сэвам ӆуматты сохӆаӆ этаӆтаӆ па эвет, нэӊат хорамаӊ ханшаӊ вайт, посат сэвты утаӆтаӆ. Ӆув ар пуш «Мастер-года» нэман юкантыса. 2018-мет таӆн «Шедевры вязания», 2024-мет таӆн па, верантты нэ иты Ёмвош округ куща премияйӊан ёша вус.
Людмила Шульгина ханшам потар
Авторы
Лух Авт
Темы