Таттма: Андрей Пяк таттамы

<div class="content-lead">Шанат тыӈ каӈ’’, куԓкаԓи’’ мэкатай паны’’. Пуровский’ районхана няматаԓакуԓма дяԓи’’ мэӈа’’. Ханымейхана тыӈ канхана няматаԓакуԓяш, вяԓкуԓоԓьш мянаԓяш’’. Ӈашки’’ шана’куш’’, ни’’ демьпчаԓутуӈ ӈычимчимпиш’’.</div><p>Ханымейхана диԓина’’ неша’’ няматаԓакуԓма дяԓян хомана ӈанатамэт’’. Каԓтан мятчеԓсамыӈ томай’’. Няматаԓакуԓма дяԓям нешаӈи’’ куптат нэташтутуӈ. Ныптакошту’’, нетуӈ манэшту’’, поӈкнатуӈ мянаԓьш шана’кошту’’. Нешади’’ поздравиймантуӈ мэты Таԓкахат мэна веԓв тоӈаш’’.</p><div class="content-new-image"><img alt="pic" src="https://storage.yandexcloud.net/ym-sites-static/ea7cd305-f65.webp" style="width:100%" height="1184" width="2104"/><div class="content-image_child">Таттма: Андрей Пяк таттамы</div></div><p>Пуровский районна тэта Кирилл Трапезников нешаӈк куԓкаԓи’’ хома’’, лимпьта вачи’’ мэӈаш. Таԓьша праздникхана хыниԓтахана’’ пиԓи вильтата — тыӈ канхана няматаԓакуԓма. Чуки похона шеcв дют ӈок тыӈ кан’’. «Безымянный» нимита тохона няматаԓакуԓяш’’. Хомана ӈайтаԓё мянаԓмантуӈ мэты, нешаӈи’’ неԓьшут тытоӈ кан’нан тохоԓаштутун. Пиԓи хома тытуӈ нютԓёшту’’. Четаӈ ӈайтаԓё матапёмытуӈ шехэԓэйтуӈ ӈуп километархат ва’ӈаш. Таԓям няматаԓакуԓта — шоньшата нэхэты, нюӈк ӈайты. Ӈопумана ӈайтаԓёта’’ нешади’’ поӈкна ӈайвахай местам Сергей Пяк канаӈата. Ӈайтаԓё мянаԓмы’’ ни’’ поӈкат пиԓи меԓ финишан Александра Пяк тоӈаш, пы’та чуки похона ӈайвахай местан ка’амдяш. Ӈопумана няматаԓакуԓьш хитамахататоӈ ӈайтаԓёта касама’’ ӈуп диԓьшуӈ мансхаԓяш’’. Таньше мянаԓта’’ нешади’’ поӈкат пиԓи неԓьня Никита Пяк тоӈаш’’, пы’та ӈайвахай местам канаӈата.</p><div class="content-new-image"><img alt="pic" src="https://storage.yandexcloud.net/ym-sites-static/91d64003-0c4.webp" style="width:100%" height="672" width="1195"/><div class="content-image_child">Таттма: Андрей Пяк таттамы</div></div><p>Чикиӈ камна праздникан томы’’ неша’’ нюӈк ӈаймямтуӈ, нэхэмтуӈ конуԓпиш’’, вяԓкуԓоԓьш поӈкнатуӈ мянаԓяш’’.  Нешаӈ хомана демьпчома — нехет ӈа. Праздникан неӈи’’ неԓьшут ӈанаташтут. Куԓкали’’ мэкат паныдю’’, патмы’’ пеми’’ хайташту’’. Ни’’ хcтмайтуӈ меԓят паныдётуӈ ӈычимчемаӈ мэты, таньдет ӈайта конкурс’ шеԓтаӈаш’’.  Куԓкаԓи’’ матамэхcна’’ пытыԓмы’’ меԓят паны’’, пема’’ тадяӈаш’’. Демьпчаԓутуӈ ӈычимчемпюмы’’ ни’’ поӈкна пиԓи хома, мэкатӈc Анжелаӈ Пяк паным, пеми’’ жюри’’ тонԓаӈаш’’. Неԓьчеэй няхаԓ местан ка’аммы’’ неӈи’’ тотуӈ мячисы’’ ассоциахит «Ямал-потомкам!» ня’амӈаш’’. Праздник’ маныдена’’ хомана ныптакомаӈ мэты, ненэй мяту’’ меӈаш’’, концерт’ шеԓтаӈаш’’. Ханымейхат мэна’’ ԓуса’’, ӈыди’’ каԓтыхит томы’’ ярмаркахана ӈамыку’’, ӈамԓу’’ тэмтаԓымпиш’’.</p><p>Чики дяԓяхана неша’’ хомана мянаԓяш, ныптакуш’’. Праздник’ хитамахат нешаӈи’’ тотуӈ дяхатуӈ, мяктуӈ кадяш. Пунчена, наԓаняна ӈай няматаԓакуԓмантуӈ мэты ӈопт ӈомты’’.</p><p>Автор: Андрей Пяк патмы</p>

Ӈайтаԓё хомана мянаԓяш’’

<div class="content-lead">Таԓкахана хайму’’ дет ӈайта концерт’ «Герои рядом с нами» нимита мэ’ӈаш’’. Чики нятакома мероприятим’ школа-интернатхана мансԓанна’’, тохоԓампючетуӈ ӈашки’’ няш шеԓтаӈатоньш. Нитуӈ нятапёш нешанатуӈ — немянатуӈ нятакуш’’.</div><p>Неԓьня шитчет’дю’’ пуӈ чена хайноԓмаӈ дёԓьшкай шеԓу’’ ӈычимчеӈа’’. Ӈашки’удиӈ Ада Занегина хайму’’ куше нятапёмам вачаӈа’’, таньдет ӈайта постановкам’ шеԓтаӈа’’. Четаӈ шитчет’дю’’ пуӈ каймяхат маня’’ ӈаԓка дяханана диԓина’’ шанат тэмс’’ неша’’ ӈупчики хаймыхина мэна’’ нетуӈ нятапи’’.</p><p>Таԓкахай школа-интернатхана СВОхана мэна хайму’’ нятапёш ӈука ӈайватам шеԓташту’’. Четы ӈычимчемытуӈ концертхана хаймыхина мэни’’ куше мятуӈ камна мадянтоԓмам вачаӈа’’, куше мякнантуӈ немянатуӈ шичитуӈ ӈэтамам ӈычимчеӈа’’. Концерт’ камна благотворительный’ ярмаркам «Своих не бросаем!» нимита шеԓтаӈа’’. Куԓкаԓи’’ ӈамыдю’’ мичиԓпи’’ — ӈамаԓ, сувенир’, хcтмы ӈамыку’’. Тымтуԓта’’ каԓьтуӈ шаӈок вешам миман ха’ӈа’’, таӈокмана тэмташтутуӈ. Ӈопшеԓ ярмаркахана дюԓкат ва’та шичадю’’ дёнаԓ ӈок веш’’ ӈомта’’. Чики’’ вештоӈ хайноԓта’’ нена’’ нятапёта штаб’ «Зов добрых сердец» фондан ӈайтаптайтуӈ. Ярмаркахана ӈашки’уди’’ хайму’’ мэт хcтмы ӈамыку’’ ӈука’’.</p><div class="content-new-image"><img alt="pic" src="https://storage.yandexcloud.net/ym-sites-static/2c49e91f-da8.webp" style="width:100%" height="1307" width="2324"/><div class="content-image_child">Таттма: Андрей Пяк таттамы</div></div><p>Таԓкахай школа-интернатхана мансԓанна’’, тохоԓкота’’ таньше «Шьём Победу» нимита движенихина нятакош маньԓе куптана чепьӈаш’’. Лекԓу’’ мякна мэна’’, дятаԓёй хайму’’ панэт хайташту’’, хаймыхина мэни’’ ӈамԓат ӈомташту’’. Хайтуԓаши ӈашки’уде’’ технологии’ урокатуӈ минԓена учительтуӈ Раиля Миндиярова няташтута. Хаймыхи’’ ӈамы таԓамам ԓушинетоӈ неԓьшут намташтута. Чикиӈ камна нятако шеԓтамайтуӈ мероприятихина хайму’’ дет ӈайта выставка тадяӈаш, школантуӈ музей’ шеԓтамы. Таньняна СВОхана хайноԓмы’’ нешади’’ тат’ма’’ шат’’, хайноԓьш мэта’’ ӈамыку’’ ӈычимчеӈаш’’. Урокатуӈ пут тохоԓкота’’ ӈашки’’ кататату’’ — окопные свечи’’ шеԓтапёшту’’, дяԓнас пускохот маскировочный’ шентми’’ паӈкаԓпёшту’’. Таԓьша ӈамыдю’’ шеԓтапёш ӈашки’уде’’ школантуӈ музейхана мансԓана Нина Топоева тохоԓампёштута. Четаӈ концертан томы’’ нешади’’ хыниԓмаӈ мэты, ӈупчики тохоԓкота’’ ӈашки’’ мастер-классу’’ ӈычимчеӈа’’. Ӈупчики кататату’’ — окопные свечи’’ шеԓтапиш’’, маскировочный’ шентми’’ паӈкаԓпи’’.</p><div class="content-new-image"><img alt="pic" src="https://storage.yandexcloud.net/ym-sites-static/d54d65a1-9f6.webp" style="width:100%" height="1249" width="2221"/><div class="content-image_child">Таттма: Андрей Пяк таттамы</div></div><p>Чикиӈ камна пентшата поскану’’ пытпёш’’, ӈомтапёш пы’татуӈ конуԓпи’’, электронный’ тирхана дяттоԓя’’. Каса ӈашки’’ робототехникам’ куше хомана мэ’мам ӈычимчимпи’’. Чики нятакома мероприятим’ шеԓтамы’’, концертан хыниԓмантуӈ мэт томы’’ неша’’ маньшту’’: хаймыхина мэна’’ нена’’ ӈокна хома шоньшахана нятапётдяна’’, чикехcна хома ӈайты. Четаӈ ӈука тэмс’’ неша’’ хадям няна СВОхана мэӈа’’. Меԓ нэхэԓтаӈа’’, меԓ мяктуӈ тутӈа’’.</p><p>Автор: Андрей Пяк патмы</p>

Хайму’’ нятапёма

<div class="content-lead">Хомана ныптакуш», мянаԓяш». Каԓпюԓкана няматаԓакуԓма дяԓям мэ᾿ӈаш». Чики дяԓяхана ӈука» неша» ӈомаш». Выӈкат мэна» нешади» камна наӈича каԓтыхит» тота» мячинта» тадямэӈаш».</div><p>Мянаԓьш неша» дюԓнуӈ няӈат маньԓе чепьӈаш». Ӈайтаԓёта» поԓюԓитуӈ кӭшту», куптахаԓт ниш’мы шехеԓаймтоӈ маташтутоньш. Чуки похона хампԓяӈкдю» няхаԓ ты» канха”на няматаԓакуԓяш»: няхаԓдю» шеӭв касамай кан», матдяӈкдя — ней». Ӈайтаԓё матапёмытуӈ шехеԓайтуӈ кун- шича километраӈ дёԓьшаш. Ӈопумана ӈайтаԓёта» касами» поӈкна ӈайвахай каным᾿ Клим Пяк канаӈаташ. Нимимты местан Денис Айваседо ка’амдяш. </p><div class="content-new-image"><img alt="pic" src="https://storage.yandexcloud.net/ym-sites-static/b88e56de-170.webp" style="width:100%" height="1062" width="1890"/><div class="content-image_child">Таттма: Андрей Пяк таттамы</div></div><p>Няхамты местам Евгений Пяк канаӈаташ. Ни» поӈкна пиԓи меԓ, нята» неԓьня Ольга Дмитриева (Айваседо) тоӈаш. Ӈокна мансхаԓьш ӈайтаԓёчи» поӈкна ӈайвахай местам’ Борис Агичев канаӈаташ. Ӈайтаԓё мянаԓмантуӈ камна нешаӈи» нюӈк ӈаймямтуӈ конуԓпёш вяԓкуԓоԓяш», нэхэԓумпиш». Няԓяӈпаӈк вяԓкуԓпёш ӈайвахай местам Сергей Айваседо канаӈаташ. Нэхэԓумпючи» поӈкна Василий Пяк нэхэԓяш. Нешади» хомана нымтакомаӈ мэты куԓкаԓи» шеԓтаӈаш». Ӈыдихийтуӈ шеԓ Каԓпюԓкана дяконтуӈ ԓаӈкан ненэй мяту» ӈамтаӈаш». Мятутуӈ та’амна непудянтуӈ шеԓ ӈай мят дет ӈайта конкурсхана мянаԓяш». Неӈи» мятутуӈ мюй дёԓьше хома», дюпа». Писанатуӈ ниня куԓкаԓи» ӈамаԓ» тадяӈаш». Чикиӈ камна «Снежный» клубхана мансԓанна» ниӈвидяӈ дет ӈайта деты конкурс’ шеԓтаӈаш. </p><p>Кимяӈ ниӈвидяӈ хома ӈаймям манысаԓяш». Демьпчаԓутуӈ ӈычимчемпюта» тадямэӈаш, нешаӈ ватамана кынута». Паныдётуӈ меԓьмана хэтмы» ни», хомана шодёш кынумы» тотуӈ мячисы» ассоциацихит «Ямал-потомкам!» ня’амӈаш». Нешади» хыниԓмаӈ, дюньшиԓемаӈ мэты» Каԓпюԓкай клубхана мансԓанна» концерт’ ӈычимчеӈаш». Чикиӈ камна ӈашки’уди» маймаӈ мэты куԓкаԓи» шана’кохона» шана’куш». Каԓпюԓкана няматаԓакуԓма дяԓямтоӈ хомана мэӈатоньш. Тыӈ канхана ӈайтаԓё ӈайвахай местам᾿ канамы», шана’ко мянаԓьш нэхэԓмы» тотуӈ миԓита» мячисы» ня’амӈаш».</p><p>Андрей Пяк патмы</p>

Хома дяԓямтуӈ мэ᾿ӈаш”

Сидяӈг: Эдуард Яунгадʼ тавы

<div class="content-lead">Тюку сиʼʼив яляхана Ямальской районхы Яр-Саляхана ӈарка ненадоʼ серʼʼ ӈась. Таняна «Ямал-нюʼʼнаʼʼ я!» Ассоциацияʼ правленияʼ терʼʼ тасалковамʼ мэʼʼӈаць.</div><p>Таремʼ тасалкубидоʼ районвана мэ”мамʼ мале танякуй поход минрейдоʼ. Тасуʼ явʼ няюʼ ӈэдалёрӈаць. Хальмерʼʼ Седеʼʼэхэна мэвандоʼ мальӈгана яʼ тебтмʼ нэкалпади няць ӈобкана тидхалембадаʼʼ серодоʼ тасламбиць. Поётоʼ сава ӈэвамʼ, нидоʼ хамедамбавамдоʼ манэʼʼлабтавыць. Яр-Салянʼ правленияндоʼ терʼʼ тэвормадоʼ яӈгу. Пуданаʼʼ сян поʼʼ серʼ нюртей мэваʼ таняʼ тэввыдʼʼ.</p><p>Правленияхана мэнаʼʼ ненэцяʼʼ ханзерʼʼ яндоʼ тер нядабавамдоʼ вадеʼʼӈаць. Небоʼ «Ямал-нюʼʼнаʼʼ я!» Ассоциациянʼ 595 ненэцяʼʼ нядʼʼмадамдоʼ пюрць лаханавыць. Хусувэй хонаркодаʼ тоенана сермʼ правленияхана мэнаӈэ тяхасовна тасламбидоʼ. Ханяӈэхэна ханзерʼʼ яʼʼамнамда тидхалевамʼ табедамбиʼʼ. Ӈока ӈамгэмʼ илаʼ няюʼ ӈадимдець. Таремʼ сидтоʼ нядʼʼмяць «дорожной карта»ваʼʼ яӈгамась. Тэри хумбанзяда яхад нядʼʼми ниць ӈадимдембюʼʼ, ты пэртиʼʼ помна ӈэдалёрӈаць. Пыдоʼ мюсертаʼʼ ненэцие тидпойʼ лаханакурць няйдонзь, нянандоʼ ӈамгэ таравамʼ хонрамбиць. Небоʼ халяданаʼʼ, общинаʼʼ терʼʼ тоенанаʼʼ серо тасламбиць. Таʼ есиʼʼ хараʼʼманаʼʼ ӈока ненэцямʼ ядабтаць. Ёрти лаханако няʼʼмандоʼ пуд ӈани тарана нядаӈгосэй ӈадимдець.</p><div class="content-new-image"><img alt="pic" src="https://storage.yandexcloud.net/ym-sites-static/7842366f-1cf.webp" style="width:100%" height="1329" width="2362"/><div class="content-image_child">Сидяӈг: Эдуард Яунгадʼ тавы</div></div><p>Тюку поʼ «Ямал-нюʼʼнаʼʼ я!» Ассоциацияваʼʼ ӈаниʼ ӈобʼʼ нядʼʼмамʼ сертаби. Невхыʼʼ иринатоʼ илаʼ саирмʼ нёданиʼʼ нямна ӈа. Ханеваʼ няюʼ тунимʼ мэць тохолковаʼ еʼʼэмня есямʼ салдамба нядабаӈгудоʼ. Ненэцяӈгʼʼ тохолковандоʼ, иле мядотоʼ няюʼ садʼʼмы есьдоʼ, лекарахаʼʼ ядэроʼʼмидоʼ Ассоциация пырдариʼ салдамбаӈгуда. Хусувэй тохолкованʼ харвана яхананда Ассоциациянʼ лаханабта сероʼʼӈа. Тарця тохолковамʼ мале сидя группа мэʼʼмэдась. Ӈобтоʼ Ямальской районʼ терʼʼ ӈэвыць.</p><p>«Ямал-нюʼʼнаʼʼ я!» Ассоциацияʼ ӈэвахана мэна Эдуард Хабэчевичʼ вадавна, манзаидоʼ тодоʼʼ серо няʼʼамбадаʼʼ ерво няць тидхалембидоʼ: «Ӈопойриӈэ ӈамгэхэртмʼ нерняʼ нинʼʼ тэвраӈгуʼʼ».</p><p>Тасалковандоʼ мальӈгана нидоʼ нядабадаʼʼ ненэцие ненадумдаць. Поӈганандоʼ Сюнай-Саляʼ школахана манзарана — Валентина Владимировна Тадибе, пыда «Маябцо» ансамбальхана хыноʼʼӈа. Няби — Евгений Варьевич Худи, ненэй ненэцяӈэ илнаʼʼ саирмʼ техэ паӈгханда теневана няваʼʼ. Табекохота инзеленаʼʼ луцаʼʼ хуркариʼʼ кино сертабиʼʼ. Тамна ӈопойдоʼ — Пудако Сюнзивич Сэротэтто, пыда ӈацекы, илебей ненэцие сёбарʼʼ иландʼ тидхалемби. Сяниʼʼ яӈорэйʼ ӈацекыда ӈока нитоʼ поӈгана нерняʼ хаʼʼморцетыʼʼ. Тикыʼ хавна Эдуард Хабэчевич районандоʼ ервмʼ Артем Игоревич Чулановмʼ сававна сидтоʼ мядолаванда няюʼ ненадумдась.</p><p>Тарцяʼʼ таранаʼʼ серо Ямальской районхы Яр-Саляʼ хардахана тасламбиць.</p><p>Автор: Марина Ярʼ падвы </p>

Яр-Саляхана тасалкуць

Сидяӈг: Елена Лаптандер’ тавы

<div class="content-lead">Ямална’’ ӈэвахана мэна ервана’’ табековна тюку пова’’ «Сензувна илева’ поӈэ» таславы. Тикы’ сер’ ӈэрм яна’’ тер’’ сенз’’ ӈэва’’ е’’эмня хуркари’’ тарана’’ ӈаводикы сертаби’’. Марка’’на, нюдяко хардаха’’на едэй’’ лекар’’ мядо, сёбар’’ ненэцие’’ мэлвад нэмби’’. Маня’’ ӈод паднанаӈэ ненэцие’’ хабцяӈо савумдамбадаӈэ манзарана’’ нина’’ нямна паднава’’. Вадами Елена Араповна Лаптэй’ нямна ӈэӈгу. Ӈавнанда Салехардахана лекараӈэ тохолкурти’’ училище»м’ малевысь.</div><p>Салехардаханана’’ пудана’’ по’’ сер’ ӈэрм’ тер’’ ӈока’’ма’’. Ихиня ёльце сава. Нина’’ сяхари’ ханяримна ядэрпана’’ ядабтамбина’’. Теневана нянд ӈэб’’ ӈоб’’, сидя вадахана нямд няндаӈгур’’. Ненэй вадавна тороватаӈгун. Ханяӈэхэна тарця няр’’ сит тотрев’ иланда саирм’ выӈгад минреӈгуда, тохолковамда, манзаямда ӈобтикы варемда мэць тидхалембида.</p><p>Ӈоб’’ яля’ ӈацекы’’ лекар’’ мяд’ хэвувна ядвани’ сер’ Елена Араповна Лаптэйм’ ядабтадамзь. Сехэрэми’ ӈобт’ ха’’мыць, ядэлававна ялъянинзь. Лаханако няни ваде’’мандада ӈокась. Пыда иламда, тохолко’’мамда тарем’ ваде’’ӈадась:</p><p>— Мань ӈавнани Панаевск’ харад’ школахана тохолкудамзь. Сэв’’ни’’ ӈыхы сыла’’ма’ мальӈгэхэд нисяхаюни’-небяхаюни’ ня’ тэхэна мэваць. Мюсер’’ӈаваць. Мюсе Итя ӈабтеня’ ёльцянд’ тэворцетыва’’. Тикы пони’’ сёнзяни мюня тамна пои’’. Пыди’ хынёси’’ ю’’ нюм’ вадаӈаханзь. Мань няхатани ӈаркадм’. Тали’’ похо’’на нюдяко хасава няни’ соя’’махад нисями хаӈгулыць. Тад пуна нини’’ ха’’мыдаць, пили’’ харад’ иланд’ илелъядаць. Тедахав’ пебянани’’ ӈарка’’ма’’. Хусувэдо’ мяд’ терсавэй. Харто’ сермняндо’ сяхаӈгарт’ тэри ӈопой яхана ни’’ ӈамдёсету’’. Ёнэй нями тюку по’ армияхад тось.</p><p>Мале ӈаркаркаӈэ хэ’’мяхадани, пудана по’ школахана тохолкурмани мальӈгана ӈамгэ’ то’’олха манзаям’ тэравами мале сававна таславась. Ненэцие хабцяӈгад сибдамбавам’ тарана серӈэ пили’’ тасламбасетыв. Илни серӈэ тарця манзаям’ тэрадамзь. Саляӈгарад’ тохолкулван’ тэв’’махадани ненэцие’’ савумдамбадаӈэ тоходадамзь. Та’ мальӈгана «Салехардское медицинское училище»м’ нюбе’’ӈась.</p><p>Та’ хой мякни ханцетыдм’. Ӈацяв маймба манзеты: «Вэй, лекарава’’ товы». Си’’ми лекараӈэ вадецеты. Небями, нюдяко’’ нини’’ си’’ми ӈатевы’’ ӈэсеты’’. Тохолковами ёльце’’мяхадани сидя ю’’ сидя по хая. Тамини Салехардан’ илелъяваць. Хаюпа си’’ми’’ хаӈаць. Хар’’н мяд’ терсавэядм’. Вэсакони’ ня’ сидя хасава нюм’ вадабини’. Ӈаркаюм’ армияхана мэ. Нюдяюм’ юкад вата самляӈг пода, школахана тохолку.</p><p>Тедалахана ӈацекы’’ лекар’’ мякана манзарадм’. Ӈэсоӈо’’, лы’’ хабцяӈо манэсарта лекар’ нядаӈгодаӈэ тарадм’. Мале юд’ по’’ тарця тарана манзаям’ тидхалембив. Нерня палаӈгана хабцяӈо тасламбава’ мякана ненэцие савумдамбидамзь. Теневана’’ нини’’ табековна сёбар’’ ненэцие манэсарма’ мят’ хаядамзь. Хасава юд’ по’ тикы пэртями ня’’амбивась. Пуна таняд хаядамзь. По’ пеля мякнани’ ӈамдыдамзь хар’’н нянани’ тарана’’ ӈаводикы пэрӈадамзь. Мале сян по’ ӈацекы’’ сэв’’ лекараӈэ тарадамзь, ӈули’’ савась. Тикы’ пуд теда’ минреня манзаями ходамзь, таня’ хэсь таславась. Тюку’ тенат тидхалембив.</p><p>Лахарёми’ мале’’мяхадани’ нями мяканда паромась. Хэванда нерня тарця’’ вади хэтась: «Саляӈгардахана илевами илаӈгани’ падвы’ то’’олха. Тюкохона таравами ихиняни’ пои. Яханана’’ ӈаркамбой’’, илебей’’ ненэця’’, ӈацекы’’ сензувна илея’’. Едя’’ сиддо’ хэрабтамбая’’».</p><p>Таддикахад Елена Араповна тамна ӈани’’ хуркари’’ серка’’на мэсеты. Няд’’мадамда пюна таняб’’, сита хонраб’’, сяхаӈгарт’ пуня’ ни ӈэсету’’. Тяхасовна манзаямда мэне минреда.</p><p>Автор: Руфина Окотэтто’ падвы</p>

Тарана серм’ минре

Сидяӈг: Лидия Ярой’ тавы

<div class="content-lead">Тюку илаӈгана лекар’’ вымна мюсерта’’ ненэцие хабцясявандо’ нямна ирелейдо’. Теда’ ты пэрти сянакова’ яляха’’на лекар’’ мяк’’ хайдо’. Тарабата пыдо’ мюсертаха’’ харто’ тэворӈа’’. Хэвы си’’ив яляхана Тасу’ явхана тиртя ӈано хой’ нямна тилыць. Лекарадо’ тэхэ’’на мэна’’, нядэна’’ ненэцяӈг’’ мядото’ хэван’ нумгад нултаӈга’’. Ӈоб’’ лекараӈэ ядэртадо’ Яр Лидия Павловна. Пыда манзаянда нямна тарем’ лаханась:</div><p>— Сидя си’’ив яля’ Хальмер’’ Седе’’э’ вымна ядэртава’’. Ӈодь нумда сава ӈэхэваб’’ хубтахана хардахад тиӈгава’’. Самляӈг яля’ сер’ манэ’’мы мя’’ма’’ ӈока. Маня’’ мале сянва’’. Нердена яляхана ӈули’’ тетись, ӈадьбята ӈоб’’ лекар’’ мутрава’’ манзара я’’мадась. Тарцям’ няд’’мяць ненэця’ сёнзя’ мюйм’ ӈарханда манэць пирӈава’’. Сеймда, вэяхананда сакарта хурка ӈэвам’, тамна ӈани’’ ӈавэта хурка ӈэвам’ таслаӈгува’’. Тандая’ тавы мутрадо’ ӈарка тецьдахана манзара нивэда пирас’’. Мань вэям’ ханладм’, лекараха’’на тикар’’ ёльце тарана ӈамгэӈэ таславы. Вэя хурка ӈэва хуркари хабцяӈот танявам’ манэ’’лабтаӈгу. Тикы’ хавна поса’ хабцяӈгад яӈганава’’, ӈацекы манэ’’сарӈава’’. Ӈамгэ’ то’’олха хабця таня’’ӈа’’, мал’’ хонрамбина’’. Нябимдей яляхана таминда манзаява’’ торамдамбива’’, хусувэй ӈамгэм’ минхана’’ сертабива’’. Тикына’’ помна маня’’ ненэй ненэцяӈэ лахарёна’’ мэць сохова’’ танясеты.</p><div class="content-new-image"><img alt="pic" src="https://storage.yandexcloud.net/ym-sites-static/4ac66f5d-2c3.webp" style="width:100%" height="797" width="1417"/><div class="content-image_child">Сидяӈг: Лидия Ярой’ тавы</div></div><p>Теда’ мале сян яля тиро’’махадани’ тарем’ таслав. Хойхана илена’’ ненэця’’ вэито’ паӈг минхандо’ хомбин’, ӈули’’ сававна ӈади’’. Пили’’ манзара тарця ӈэрха, хардахана илена’’ ненэцие’’ вэям’ ханлаб’’, пон’ вэито’ паӈг пюсетына’’. Мяк’’ нултаӈгабана’’, хой’ тер’’ турта’’ лекар’’ поӈгана ненэй ненэця’ нямдо’ манэ’’пато’ маймби’’. Пуня’ ни’’ ӈа’’. Мань нянандо’ ненэй вадавна лаханкурӈадм’. Ӈамгэ хабцяӈото’ таняб’’, тидпой’ ваде’’ядо’. Ӈоб’’ не ӈэвамда едевамда ваде’’ӈась. Ма’’нисяв, лекаран’ хан’’ӈадамзь, пардондами таць. Тад манэ’’янэ, ханзер’’ лекар’’ пардонда тасядо’, таминдо’ тарем’ сяры’’. Вадавнанда хаӈгурманда мальӈгана ӈоб’’, сидя таблеткам’ ӈамыкы, едяда хая, таминда ӈэвадэй’’. Пыда едянда янамбовна ланово’’махад таминда пардонда ӈаворць ӈэвадалавыда. Тэхэна мэна’’  тарця’’ ӈэсяты’’. Лекараха’’на едянд хэ’’мяхад тарем’ ӈод’’ ӈамгэ’ пират пардонад ӈаворпат тара’’.</p><p>Ӈока хибя’’ хардан’ ӈэдалёрмы’’, ханяӈы’’ ӈэсыхы’’на вэсако’’, пухуця’’ ӈоб’’лиӈэ хаюрмы’’. Тикы манзаина’’ помна хой’ тер’’ нина’’ ӈули’’ нямбара’’. Мэкада’’ма’’. Ӈобто’ ма’’нив, хардан’ 2011 похона тэвормы. Ма’’нисяв, таня’ ядэрць тарабцода яӈгу, лекарахаван’ тамна пон’ ихиня тэвормадавэй ӈэӈгу. Ханяӈы’’ тидпой’ укол ӈабтаван’ ни’’ харвасету’’. Та’ ёльцяӈгана падарм’ пада тарасеты. Ханяӈы’’ хамедамбидо’, укол ӈабта, вэям’ ханла серо’’ӈа. Пуня’ ни’’ ӈа’’. Теда’ поса’ хабцяӈгад яӈгабина’’, маня’’ хусувэй по’ вэяндо’ хурка ӈэвам’ манэ’’сарпана’’ тара. Тарем’ ни еребер’’.</p><p>Пуна’ тамна Паюте’’э’ вымна Ӈэдя’ няю’ тиртава’’. Танямна мюсерта’’ ненэцие манэ’’сартава’’. Ты пэрти’’ сянакова’ яляхана хусувэдо’ хардан’ ни ха’’мор’’, ӈадьбята тиртя ӈанохона тир’’пана’’ няндо’ ӈули’’ ӈарка таром’ минрева’’. Тарабата, хойхад хардан’ лекар’’ мят’ ханлэйна’’.</p><p>Автор: Марина Яр’ падвы</p>

Лекар’’ вымна тирӈа’’

Сидяӈг’’: t.me/dark_yanao няд ханавы

<div class="content-lead">Ямална’’ тиӈгэвна хабартаӈгова’ мальӈгана ӈока ты’ хоба’’ ма’’лёсеты’’. Юд’ мян’ по’’ тяхана ӈояк ненэця’’ мяд’ ея’ хобаӈэ, хонё мэта пэӈаӈэ, ӈэдалёсь’ ӈамдёрцяӈэ, нароӈэ, ханото’ синд’’мяӈэ ханасетыдо’. Тарем’ я’ таборӈэ вуни’’ тараӈгу’’. Теда’ ты пэртя’’ хабарманзь ми’’мы’’ тэхэтато’ ӈамгэхэртм’ ни’’ хомбю’’. Мал’ ханяхавана таромдо’ хомби’’.</div><p>Тандая’ ӈопой сава юнм’ намдаваць. Си’’ив Харв’ няна ты’’ таре няд’’мяць сырэй’’ ӈавори сертаби’’. Тикым’ Владислав Мулявин тидхалембида. Обская станция нюбета хардахана манзара’’. Сэдъяханато’ тараванда’’ таре нерде хобахат пюдыбидо’. Вэяхат, юркад, тамна хуркари’’ варкат, ӈабтхат халтамбидо’. Тэри ланзякм’ ни’’ мэс’’. Яӈга таславы ит’ мэхэя вародо’ ха’’аврамби’’, пывумдамби’’. Тяхасовна тырабтамбидо’. Тарем’ сертавы’’ тарканато’ сабвы’’ паддо’ ӈани’’ ё’’ ня’ ӈэдабтамбидо’. Таняна сэдоранидо’ ты’ тарм’ мэё тохос’ ни’ мэмбидо’. Тад пуна тикы тохокад тецьдахана мэ’’манда’’ ембдяро сэдыби’’. Пюдвы хоба’ нярахад хуты’’ ӈылдад паркыби’’. Ӈобкарт’ няра’ ютек ни хаюр’’.</p><div class="content-new-image"><img alt="pic" src="https://storage.yandexcloud.net/ym-sites-static/808992d4-ba1.webp" style="width:100%" height="543" width="966"/><div class="content-image_child">Сидяӈг’’: t.me/dark_yanao няд ханавы</div></div><p>Сидндет по’’ ямбан’ ты’ таркана мэйравы тохокад сэдвыдо’ хуркари’’ тэнз’’: мальця’’, ханена’’ ембдяр’’, сава’’, ӈоба’’, хэбицяко’’ пива’’, хонё мэта’’ то’’. Тикы’ хавна ея сэдыба пявы’’. Вадавнандо’ ненэй таретейхат саӈгомдо’ тянёрка, ю’’ яӈорэй’ пирувна сибё’’. Тамна няндо’ сыра ни палаӈг’’. Ты’ тар’ мюй’ хоркадёсавэй’’ ӈэвам’ ӈули’’ саву’’ӈадо’. Ма’’ним’’, сэдвы’’ паныдо’ са’’невы’’ ӈэбто’, мер’ тыраӈга’’. Варо’’мы’’ ӈэбто’, машинкахана халтаб’’, ни’’ вомд’’. Няра мальцям’ тарем’ вунир халтаӈгу’’. Нялеӈгу нив’’.</p><p>«Мань Юрибей’ хабарталвахана ӈока по’’ манзарадамзь. Тамальӈгана хаюрта’’ хоба парадамбасетына’’. Ини ӈыламна хамедамбивась: ёльце сава ӈамгэ’’ тэри хан’’ӈа’’, ханзеркав’ тародамдо’ хось тара. Янамбовна тарця серт’ тэвыв’’. Теда’ ты’’ таркана сабвы’’ ембдяро мале ӈока ненэця’’ мэ’’эйдо’. Омскхад тэмдормы’’ альпинист’’ вадавна, едэй паныдо’ ӈули’’ иба’’, сибё’’. Ӈопой ты пэртям’ лахана ня’’ӈадамзь, пыда сэдвы мальцява’’ серхая хаця пивна ядэрӈась. Ма’’нив’’, ёльце сава, ненэй мальця’ пир’’, ӈопой, саӈгомда яӈгу», — юне тэволанаха’’ Владислав Мулявин минрена манзаянда нямна тарем’ лаханавысь.</p><p>Ты’’ саполана ирыхына харто’ «сайт»амдо’ сертаӈгу’’. Тодо’’ я’ тер’’ таняд тэмдорць пирта’’. Сата тецьдаха’’на серуванда панэдамдо’, пивадамдо’, тамна ӈани тарана ӈамгэридамдо’ хоӈгу’’.</p><p>Автор: Галина Окотэтто’ падвы</p>

Ты’ тар’ таром’ ховы’’

<div class="content-lead">Ӈамыԓи нешиӈ нянта куше диԓимам дёԓимяшо’, дюничаԓьш маӈктата намтнаӈата. Таԓям Хаԓяӈкаԓтыхина мансԓанна’’ веԓвы’’ Пуровский’ районнан тcвпанантоӈ, нешаӈкна’’ дилтуӈ нямна дюничаԓьшту’’.</div><p>Няматаԓакуԓма дяԓяхана Таԓкан депутатӈc мэна неша няма, Ямална Законодательный’ Собранихина ӈайта экологиӈ, промышленность и делам КМНС дет тасԓёта комитет веԓв маԓьшхи Эдуард Яунгад тоӈаш. Чикиӈ камна Эдуард Хабэчевич ӈаԓка ассоциацина «Ямал-потомкам!» президентӈc мансԓаӈа.</p><p>Хаԓяӈкаԓтыхит томы веԓвы ненэй мякна выӈкна диԓина’’ нешаӈкна’’ дёԓимяшуӈаш. Дилтуӈ нямна дюничаԓьш куше диԓимамтуӈ нымтыпиш. Мэ’эвтатуӈ ватантуӈ тадяӈайта неша’’ таньняӈ няӈта тоштуш. Эдуард Яунгад нешаӈкна мунуш чуки похона куԓка нятакома шеԓ’’ ӈычимам кэ’тӈаш. Куше округханана выӈкна диԓина’’, мюшиԓта’’ Ӈэԓм чеԓ’’ нешади’’ нятапёмамтуӈ вачаӈаш. Ямалхана ӈука программа’’, нятакомаӈ дет ӈайта, тадя’’. Выӈкна мюшаԓта’’ нешади’’ нятапёмантуӈ камна, округханана мансдяӈ дет тохоԓкота’’ ӈашки’’ нятапи’’. Пуровский’ районхана выӈкна мансԓанна’’ неша’’ куше диԓимамтуӈ депутатан вачаӈаш’’. Ӈамы’’ тасԓавта шеԓутуӈ тадяӈcймям кэ’тӈаш’’. Округхатна нешаӈк мичиԓпёта’’ ӈамыку’’ де’эмня мунуӈаш’’, диԓишатуӈ дянтуӈ нямна ӈайта вачитуӈ вачаӈаш’’.</p><p>Чикиӈ пут Эдуард Хабэчевич Пуровский’ районхана ӈайта ассоциацина «Ямал-потомкам!» правленихина мэна’’ нешаӈкна дёԓимяшуӈаш. Куше мансԓамантуӈ нямна дюничаԓяш, ӈамы ватантуӈ тадяӈcймям нымтыпиш. Нешади’’ няӈта мэмы’’ ваче’’ Эдуард Яунгад таньдет мансԓанна’’ веԓву’’ каха’’ тcвԓандята, тат неԓьняӈ ӈокна тасԓамантуӈ мэт. Чуки ноптухуты куԓкаԓи’’ деты шеԓ’’ ӈычимшту’’, таԓям таньше нешаӈкна дилтуӈ нямна дюничаԓма хома.</p><p>Автор: Андрей Пяк патмы</p>

Нешаӈкна’’ мунуӈаш

<div class="content-lead">Чуки похона Пуровский’ районхана ӈука ты’’ кыԓаӈаш’’. Шича диԓиӈ дямпан кынԓна’’ неша’’ шанат тонна’’ ӈамши’’ кынԓаш мэта цеххана мимчиӈаш’’.  Четаӈ неша’’ понтуӈ шеԓ пихиня ниш’ту’’ кынԓ, дюпа деты мякна тытоӈ кыԓапёштутуӈ.</div><p>Пюԓ дяханана ты’’ падеԓьш’’ няхаԓ сельхозпредприятии мансԓаӈа’’, шича совхозхиӈ «Верхне-Пуровский» ними «Пуровский», ӈуп КФХ «Ихъяхинский». Каԓиташ мансԓанна’’ неша’’ каԓьтуӈ тытуӈ падиԓя’’. Таԓкахана ӈайта совхозхана хампԓяӈк тытуӈ ӈысы’’. Ԓакхай’’ похо’’ты кынԓна’’ неша’’ дюпа цеххана кынԓашту’’, шан’ пихиня ниш’ту кынимтоԓ. Чики цехтоӈ дюпа, шанат мятута пен’’, куԓкаԓи’’ кынԓаш мэта ӈамыдёта тадя’’. Кынюй мятуӈ пендяай таймана ӈаԓка, ӈуп мэмахана шанат ты’’ ӈамши кынипчешту’’. Таԓям меԓ тытоӈ кыԓаштутуӈ, деты похона маньԓе кынԓаш хитадяташ’’.</p><p>Совхоз’ ты’’ пут, «Пуровские олени» нимита компания’ кынԓаш чепьӈаш. Каԓьтуӈ тытуӈ падиԓта’’ куки неша’’ таньняӈ тытуӈ ӈамше’’ миштутуӈ. Кынԓаш мансԓана Олег Хэно маньшту, понантоӈ чешчахана пихиня кынԓаштуш, четаӈ цеххана ӈайвашту’’. Дюпа мякна кынԓма неньшаԓ, ӈуп дяԓяхана шанат ты’’ кыԓашту’’. Нешаӈ ӈамԓат мэмпюта’’ ӈамса’’ хомаӈаймятуӈ таԓа’’. Таԓям кыԓамайтуӈ тытуӈ ӈамши, хомана масхадя чики минхантуӈ кынипчештутуӈ.</p><p>Чикиӈ камна тытуӈ ӈамше’’ таньдет мансԓана ты’’ ле’каԓ манысаԓьштута. Чики предприятии’ нешаӈкат ня’аммайта ӈамши’’та пеԓь маня’’ дяханана ӈайта’’ ӈашки тохоԓковш мяту’’ таамна тонԓаштута, таняӈ миштута. Пеԓьтуӈ наӈича дяха’’ ӈайтапташтута, ӈамсахат ӈамԓу’’ — колбасу’’, тушёнки’’ шеԓтапётаха’’ миштута. Самбуԓкаӈ няӈи совхозхана мансԓанна’’ ӈупчики ӈука ты’’ кыԓаӈаш’’. Каймы пуӈ хусыкана «Пуровский» совхозхана кынԓаш мэта деты мят шеԓтаӈаш’’. Таԓьша цехтуӈ ӈычимахат, кынԓна’’ дюпа мякна кынԓӈаш’’. Таньняна мансԓанна’’ ӈопшеԓы маньԓе няхаԓдю’’ тоннахат ӈука ты ӈамсам планыхинтоӈ ми’ӈаш’’. Совхозтуӈ тэта маньшту, навэт кыԓамайтуӈ тытуӈ ӈамса’’ тадёмшей ӈокты’’, чет’дю’’ тонна ӈокӈc кайны’’.</p><p>Маня’’ Ямалханана таԓьша кынԓаш мэта деты цех’ху’’ выӈкна диԓина’’, ты’’ падиԓта’’ нешади’’ нятапё шеԓтаӈаш’’. Дюпа мякна ӈайвана’’ меԓ кынԓмантуӈ камна, кыԓамайтуӈ тэтуӈ ӈамса’’ хома ӈcшту’’. Тэхэ’на’’ мансԓанна’’ ӈука’’ ӈамши’’ планыхинтуӈ митӈа’’, чикехена ӈука вешам ня’амны’’.</p><p>Автор: Андрей Пяк патмы</p>

Дюпа мякна кынԓӈаш’’

Фото: Анна Яптик / Няръяна Нгэрм

<div class="content-lead">Мале ӈока’’ по’’ тяхана Панаевск’ хардан’ Сергей Дмитриевич Белов манзараванзь тось. Пыда иланда ямбан’ ӈацекы тохоламбадаӈэ тарась. Ӈэрм’ тер’’ сёбар’’ сянакова 1987 поход минресь.</div><p>Таӈок’’ по’’ ямбан’ тохолавыда ёльце ӈока. Ӈацекыда район’, округна’’, Россия’ тиӈгывна ӈэда’’ пирдырмаха’’на вырэй’’ ӈэсеты’’. Яна’’ ханяримна ядэланида ӈобкад’ нерняна мэсеты’’. Ӈацекыда нюдрев’ пэрцетыда. Ӈадьбята сиддо’ вадавы нисямдо’ тедалахана тенедо’. Няданда намдавы’’ табекудо’ ӈани’ нидо’ юрыбю’’, тев’ ёльцянд’ нёдэйдо’. Ӈэто’ ни’ ӈабтавыда тянё ни ӈа’’. Ханяӈыда мале ӈарка ненэцяӈэ хаяць. Тарем’ ӈод’’ ӈахат пявы серто’ нидо’ хаебю’’, тамна нерня’ минредо’. Харто’ индо’ сер’ Ты пэртя’’ сянакова’ яляхана пирдырӈа’’. Сензувна илевандо’ е’’эмня пыхыдадо’ высылпи’’.</p><p>Тандая’ нянанда лаханаковани мальӈгана си’’ми таминда тумдась. Манзара’’мида хайна вадець пяйдась:</p><p>— Панаевскан’ 1981 похона тэвываць. Нерня воспитательӈэ тарадамзь. Пуна ӈобӈгуна округна’’ ӈэрм’ тер’’ сянакубц’’ сёбар’’ школа’ ӈудандана Геннадий Сысолятин’ няни ма’’нив’’: «Северное многоборье»м’ хардахананда’’ пявы ӈэява». Тамальӈгана яӈга сёбар’’ мэлва’’ я’’ яӈгу’’нисям’’, илма’’ тояна’’нисяв. Ӈаводана 1983 похона сидя яӈорэй’ ӈэда школам’ нэць. Таняна спортзалда, хусувэй ӈамгэда танясь. Тасалко’’ма’ пуд 1987 похона ӈэрм’ тер’’ сянакубц’’ тэнзо минре пядамзь. Воспитатель’ манзаяхад несэй серт’ лабцейваць. Тамальӈгэхэд сёбарли тохоламбидм’. Тюку по’ манзара пэ’’мами няхар’’ ю’’ хасава ю’’ поӈэ ханда.</p><h3 style="font-size:19px;font-weight:500;margin-bottom:12px">Тохоламбавыда мал’ тенейда</h3><p>Няданда хонаркудамзь: «Тохоламбавы’’ ӈацекыд тенеяд? Россия’ латдавна нерня’ хибядо’ ереберца’’?» Пыда ма’’нисяв:</p><p>— Ханян тене’’. Нюртей тохоламбвэсавэй’ тенеян. Ӈули’’ нюрте’’э’ тидхалемба пявыни тиць: Александр Ламдо, Валерий Пырирко, Виталий Тайбери, Геннадий Лаптандер, Яков Сэротэтто, Борис Сэротэтто, Николай Лаптандер… Пуна тохоламба пявыни Илья Хороля, нюдяко няхаюда Всеволод няби Игнат. Малмбой’ вадець пяхаваб’’, тикэри’’ вуни’’ ӈа’’. Валерий Пырирко сидя’ нерня’ ха’’морӈась. Владимир Салиндер, Илья Хороля «Мастер спорта России» нювм’ мэ’’ӈаханзь. Мале сяндонзь. Округ’ тиӈгыхывавна неновна ӈокасей. Сава ӈуда’ терси’’ ӈоб’’ вунисятыва’’ тур’’. Ӈацекэри тохоламбварими мась ӈэсеты. Ӈани’ манзаям’ пэрць нисетыдм’ товор’’. Ӈобӈгэв’ пирдырмаха’’ ядэрцетыва’’. Ӈавна яра’ ирыхыд пэсь хусувэй иры’ пирдырма’’ ӈэсеты’’. Ӈацекы’’ харбёць. Хусувэйдо’ ӈаркамбой пирдырман’ еремян, несэй харадм’ манэ’’ман харвась. Санарць, яркула, сюрберць варемдо’ мэ’’ӈаць. Пудана’’ похо’’на несэй’’ секция’’ ӈадиберць пэйдаць. Ӈоб’’ ирсу’’ минзету’’ним’’. Хибя ханя’ харва таня’ хан’’ӈась. Ӈадьбята няни турта’’ тянёмяць. Сидя мандалкавм’ ма’’ламбасетыдм’. Ӈокханда няхар’’ юкад васаркаць. Теда’ ӈод’’ ӈэрм’ тер’’ сянакубцха’’ пыхыдадо’ тохоламбван’ харвана’’ таня’’. Округ’ тиӈгывна тарця’’ сёбар’’ ӈокамдана’’. Хусувэй нюдяко хардахана яӈга тоходана’’. «Рекорд»до’ ӈобтикы янамбовна вадёдана’’, ӈобӈгэв’ нидо’ нертемби’’.</p><p>Тамбирувнанда манзаямда тид’’ минреванда, мэневанда, сёбар’’ ӈацекы вадаванда няю’ Сергей Дмитриевич «За вклад в развитие Ямала» ӈарка ненадумда’’мам’ ня’’мась. Ненадумдавамдо’ намда Ӈытарми’’ Саля’ терӈэ маня’’ ёльце маинаць. Тюку хардахана сита ехэрана яӈгу, ӈацекэсавэй’, ӈармы ненэцясавэй’ теневава’’. Пивна ядбата хусувэй хибяхана тороватсеты, няндерси’’ ӈэдарамбдада яӈгосеты. Мал’ ненэцяӈг’’ тэясеты.</p><p>Небой по’ ӈарка пэвдей ирыхыд Сергей Дмитриевич манзаямда маледась. Теда’ инда сер’ нылана.</p><p>Автор: Анна Яптик’ падвы</p>

Сёбар’’ ӈацекы’’ нися

Сидяӈг: Афанасий Окотэтто’ тавы

<div class="content-lead">Ямалханана’’ Ты пэртя’’ сянакова’ яля’’ ӈули’’ паӈодо’. Ханяӈы’’ яха’’на мале ӈэрм’ тер’’ нидо’ ядабтамбидонзь. Ӈани’ тамна ӈатена’’. Тадри’ пирдырма’ ялэдо’ ӈодь пэваридо’ хаи’’. Я’ мал’ няна пирдырмандо’ нерня тыдо’ ӈахакуд мэць хорпидо’. Теда’ нензахалмы ты сэбинева’ ёльцяӈгана ненэцям’ нида пуня’ ха’’авраӈгу’’.</div><p>Пудана’’ по’’ ты пэртя’’ хардан’ ха’’амвандо’ нерня харто’ помнандо’ сянакурӈа’’. Выӈгана ӈахакуд таславы яхана нидо’ ядабтамбидо’. Хусувэдо’ тарця ненадо ялян’ ӈахакуд хамеку. Ты пэртя’’ помнандо’ тенева’’, сяха’, ханяна ӈобт’ ма’’лёда’’. Таславы яляхана тодо’’ выӈгат ӈэдалёда’’ ӈопой мя’’лин’ пэрӈадо’. Ӈэсыхына ӈод’’ сидто’ ӈате’’, мякана хорто’ якэ’’ тэри путра’’. Вэн’’ мад’’ ненэцие’’ това’ нямна хонаркодараха’’. Ӈоб’’ тарця нюрцьм’ ялям’ Ямальской районхана мэ’’ӈаць. Сер’’ тарцясь.</p><p>Сёяха’ хой’ няӈы ты пэртя’’ харто’ помнандо’ сянаковам’ мэ’’мыць. Виктор Ерменявич Сэротэтто’ мякана пивня ядэрта мале ӈокась. Тодо’’ выӈгат тэхэ’’на мерета еся’ ханха’’на ӈэдалёда’’ няндо’ мят’ паромбиць. Виктор Ерменявич нида ӈатейдась. Ӈадьбята хусувэмдо’ харта ядабтамбидась. Ӈокханда юкад вата ӈэдалёванда’’ ӈопой ӈэсын’ ма’’лёвыць. Пирдырманда’’ хасава’’ етя пахалавы’’ тыдо’ подермыць. Вымна тёрридо’ совыць. Няваталаӈгоди’’ пуд мерцяри’’, хадри’’ хан’’мыць. Тарця нюрцям’ ООО «Ямальское» серм’ нерня’ минреня’’ сертавыць. Тикахана манзарана Афанасий Окотэтто тарем’ мась:</p><p>— Ты пэртина’’ е’’эмня Сёяха хардахана ӈэванда сянакова’ нерцюна ӈахакуд пирдырми серта таславаць. Ханяӈы’’ ненэця’’ ӈани’’ хардаха’’ пирдырманзь ханаць ни’’ тэворцету’’. Теда’ товы’’ ӈокаюм’ пелядо’ общинаха’’на тыдо’ пэрӈа’’. Хахаярка илена’’ харто’ тыдо’ пэртя’’ ӈани’ тоць. Виктор Ерменявич Сэротэтто’ ӈэсыхына ма’’люрӈаваць. Тикахана таравы’’ нина’’ ӈули’’ сававна сидна’’ нядаць. Нерня’ ха’’амвэхэ’’ ненадумда’’ми, ӈуда’ тер ми’’ӈаваць. Харта ӈод’’ ненэй ненэциена’’ ӈобт’ тэвормам’ харвобтадо’. Тарця тарана юн вымна минханда хан’’ӈа.</p><div class="content-new-image"><img alt="pic" src="https://storage.yandexcloud.net/ym-sites-static/b78e4017-640.webp" style="width:100%" height="1329" width="2362"/><div class="content-image_child">Сидяӈг: Афанасий Окотэтто’ тавы</div></div><p>Ханзер’’ сянаковандо’ хэвам’ ненэця’’ нивэдо’ хамеда’’. Ханя, выӈгана илена’’ хусувэй яля’ нидо’ ни’’ хомбю’’, тарем’ сянакова’ нянандо’ саць сава. Ханяӈы’’ мэць тохолавы’’ тыдо’ тамна Сёяха’ харад’ няю’ пирдырманзь подертыдо’.</p><p>Тандая’ Лариса Николаевна Вануйтахад ӈани’ ӈоб’’ юнм’ намдаваць. Ӈобтикы Сёяха’ выӈгана луци’’ яля’ падаркана не’’ хэбидя яляӈэ таславэхэна лаха ты пэртя’’ ма’’лёвыць. Пыдо’ Евгений няби Константин Вануйтаха’ ӈэсыхына мэвыць. Не’’ помнандо’ ныхыдырмыць. Ярколавыць. Хасава’’ ӈани’ варедо’ мэ’’мыць. Сата тыдо’ подеркая, няваталаӈговыць. Саць мере’’мы’’, мэбе’’мы’’ мал’ ӈудито’ терад, ненандумда’’ми ня’’амвыць.</p><p>Тарем’ помнандо’ сянако’’махадандо’ сямянхат ва’’лёйто’ юн ӈыхы ян’ тэваӈгу. Помнандо’ тикы няхандо’ тосаӈгу’’. Мэць вэварка’’ тыдо’ ӈарка ян’ ӈэдалавандо’ нерня сава няхато’ тадаӈгудо’.</p><div class="content-new-image"><img alt="pic" src="https://storage.yandexcloud.net/ym-sites-static/b026625c-47e.webp" style="width:100%" height="1081" width="1922"/><div class="content-image_child">Сидяӈг: Афанасий Окотэтто’ тавы</div></div><p>Тюку по’ Сёяха’ хардахана ненадо ялям’ мэ’’манзь тасламби’’. Сие ниць ирыхына яндо’ тер’’ мат’’ ю’’ самлянзимдей сянаковахана ӈобт ма’’лёда’’. Ӈарка ялямдо’ мэ’’манзь я’ ханярид мядонда’’ тута’’. Тедари’ варемдо’ вы’ тер’’ хамеку’’. Ныхыдырманда’’ — ӈэсоӈодо’ высылпи’’, ярколаванда’ — тынзяӈодо’ вэнпи’’. Не’’ ӈобтикы тэри ни’’ ӈамдю’’. Пыдо’ серуванда’’ вар’’ мадавы’’ паныдо’, си’’ив падрота’’ пибидо’ сэдыби’’. Нюхуто’ сырэй’’ паской’’ панэци, мальци серибтеӈгу’’. Хардахана илена’’ нидо’ ядабтаванзь няркана’’. По’ ямбан’ нивы’’ манэпавы’’ няхато’ саць маймбаӈгу’’.</p><p>Автор: Руфина Окотэтто’ падвы</p>

Сянакованзь хамеды’’

Сидяӈг: Фёдор Воронов’ тадтавы

<div class="content-lead">Сидя по’ тяхана Ямалхана Пэ хоё’’ хэвхана илена’’ ты’’ пэрти’’ яхана кином’ сертабиць. Нюмда «Цинга». Тюку по’ яра иры’ сидя юдимдей яля’ Москвахана «Октябрь» нюбета кинотеатрхана нюртей ӈадимдевэдонзь.</div><p>Владимир Головнёв’ кином’ серта таславэдась. Тованда нерня илна’’ саирм’ теневана’’ ненэцие хонрамбись. Тад пуна 2024 по’ пиркана ненэцяндамдо’ ма’’лавыць. Маня’’ илна’’ нямна ӈэванда е’’эмня округва’’ кином’ тадтава’ яӈэ тэравыць. Си’’ив Харв харад’ техэ’’, Пэ хой’’ няна мэвыць. Мятамдо’, тэдамдо’, тамна ӈани’’ тарана’’ ӈавэдамдо’ ӈэрм тер’’ ненэциена’’ ми’’мыць. Пыдо’ сидто’ ӈод’’ таминдо’ кинохона тадтавыць.</p><div class="content-new-image"><img alt="pic" src="https://storage.yandexcloud.net/ym-sites-static/f46e5fda-2e7.webp" style="width:100%" height="885" width="1575"/><div class="content-image_child">Сидяӈг: Фёдор Воронов’ тадтавы</div></div><p>Ӈамгэри серкана ила’ саирм’ техэ паӈгхаданда теневана’’ табекуртаӈэ тарасеты’’. Теда’ ӈод’’ ненэй ненэця’ нява’’ сюдбабц, ярабц, лаханако ма’’ламбада, мел’ хасава, Евгений Варьевич Худи нида тидхалембавысь. Ненэй вадахад луца вадан’ вади тэволанаӈэ манзаравысь, тамна ӈани’’ серка’’на табековысь. Нямэхэна редакцияхана мядоманзь турӈась. Ӈэдалёромита нямна лаханась, кино’ нямна инда ядэробцо ваде’’ӈась:</p><p>— Москвахана ма’’лёвы’’ ненэця’’ ӈокаць. Актёрӈэ таравы’’ ӈобтикы таняна мэвыць, пыдо’ тодо’’ яхат ӈэда’’ Россия яна’’ тер’’. Ӈани тарем’ кино сертабада’’ няндо’ манзаям’ манэ’’манзь товыць. Тикахана таравэӈэ маня’’ мале ӈокаваць. Хусувэва’’ тодо’’ ӈамгэхэ’’на тидхалеӈгусь. Нерня сцена’ ни’ сидна’’ хаӈаць. Мань тикы яля’ ӈарка соя’’ма’ ялями ӈась. Кинохона таравы Никита Ефремов, тамна ӈани’’ ненэця’’ е’’эмнани сейхад ӈэда’’ вадидо’ мэ’’ӈаць. Манэсо’’мана’’ пуд ненэця’’ помнандо’ тасалкурӈаць. Хусувэдо’ инда ядэробцом’ хэтась. Неноховавна Ямалхана’’ тэвормадавэй’’ хонравандадо’ ӈокась. Теда’ ихиняни тарця кино танявада ӈули’’ сава’ то’’олха. Ӈэрм яна’’ ты пэрти’’ илам’ манэ’’лабтамби. Тикы’ сер’ ӈани’’ я’’ тер’’ илна’’ саирм’ хамедаӈгу’’. Сертавэва’’ хаӈгулавы луца’ нямна ӈа. Ӈавхы’’ похо’’на сиӈгэ’’лараӈгавы’’ танявыць. Яхана’’ тэвормы’’ луцаха’’ тарця хабця’ ӈани’ палаӈгавысь. Саць хаӈгурта ненэць’ ханзели’’ хэсь пир’’ӈада. Ӈаводикы манэпи. Ханяӈэхэна хабця’ тэри ӈадибертя не’ мирабцахана турмы. Хаӈгурти ты’ вэяхана савумдамбавыдонзь. Вэям’ ӈэрпата — савумда. Маня’’ ӈэрм’ терӈэ ты’ ӈамза, вэя ӈаврадана’’ таславы. Тарем’ иринана’’ едяхат ехэравы’’. Кинохонана’’ тикы серм’ ӈадимдемби’’. Едэй’’ похо’’на ненэциена’’ тарцяхат ехэра’’.</p><p>Евгений Варьевич’ нямэхэна мат’’ ю’’ поданда хэвысь. Ӈарка ялянда няю’ нянда сава вади хэтыбива’’: сензӈэ илея. Нюда, нюта ню’’ сита нядабая’’, майбтамбая’’. Минреня серода тидхалё миӈая’’. Тамна хуркари’’ мэкад’’ серка’’на варемда мэ’’ӈая.</p><p>Саляӈгардахана ныланава’ яляхана тодо’’ тэнз’’ ненэцие’’ ила’ саирм’ лэтрамбава’ мякана кином’ ӈани’ манэ’’лабтамбавэдонзь. Тадри’ Ямална’’ тер’’ ӈани’ манэць пиртадо’. Хусувэй маркана ӈадимдембаӈгудо’.</p><p>Автор: Руфина Окотэтто’ падвы</p>

Тедахав’ манэтава’’

<div class="content-lead">Саляӈгардан’ 11-13, 14-15 похо’’на мэна’’ ӈацекы’’ турӈаць. Пыдо’ мале сян яля’ помнандо’ сянакуць. Мэбе’’мамдо’ санарма’, сюрберма’, тубкам’ моёпава’, яркулава’ сер’ хорпидонзь. Едэйвана тоходанана’’ сёбаркоця’’ тодо’’ районто’, хардато’ ед’ пирдырӈаць.</div><p>Сидяхаюдо’ Ямал’ рекордм’ мэӈаханзь. Самбург’ тер Константин Адер сюрамбахая ӈопой яхад няхар’’ мэва санармахана 10 метр’ 12 сантиметр’ ёльцянд’ тэвавыць. Белоярск’ тер Артём Талеев 710 ханм’ санавысь. </p><p>Пел’’ пирдырмидо’ мякана спортзал’ мюня ӈаць. Ӈанидо’ пихина пэръядонзь. Тубци моёпавадо’ яха’ сэр’ ниня ӈась. Яля’ еркана таняна ма’’люрӈаць. Ӈопой хасава ӈацекы’ тубкада ӈули’’ сававна тирць хаясь. Харампур’ няд товы сибимдей классахана мэна Никита Айваседо ӈэвысь. Юкад вата сидя потнанд вадада мин’’ӈась:</p><p>— Тубками 119,50 метра хунат’ тий’’. Ни’’ни нерня’ еремядм’. Тарця сянакубц самляӈг по’ пирт’ торомдамбин. Моётава’ мальӈгана нянани сабе ни саӈговос’’, ныхыри тара. Саць тю’’умна нисетыв ӈэдарамбю’’, тасикумна пэрцетыв. Няръяна ене’’мым’ тяха’ танхалӈга вэва. Ентевы’ хэвнямна ханпата ни тара’’. Хано санарпа ӈани’ пир’’ӈав. Сидя юркад тянём’ нисетыдм’ санарпю’’. Си’’ми тарця серт’ неками Сергейми тэврась. Няхар’’ по’ тяхана рекордм’ мэсь. Тюрамда 222 яркадась. Сидна’’ тохоламбдава’’ ӈобкарт’ матадм’ нибат мы’’, манзеты: «Ӈанихи’’на ябдаӈгун. Тамна варева’’ мэць хамекоива’’». Сёбар’’ ӈацекы’’ нерняри’ ӈэя’’. Выдараӈгвахад ехэрая’’, хусувэхэт ныхыдамдо’ хомбая’’.</p><p>Сита тохоламбадада Иван Пяк тарем’ мась:</p><p>— Тет ӈацекым’ тадамзь. Никита Айваседо няби Артём Пяк 11-13 пота’’ поӈгана пирдырӈаха’. Даниил Айваседо няби Анна Агичева 14-15 пота’’ поӈгана мэӈаха’. Маня’’ яхадана’’ Самбург’, Тарка Саля’ тер’’ тоць. Пелдо’ няби нями тэврэйдась. Сяхаӈгав’ си’’ми тохоламбись. Илни ямбан’ хэвханани мэ. Теда’ си’’ми ӈани’ нядабасеты. Овгортхад ӈа. Тарка-Саляхана иле. Таняна физкультурам’, «северное многоборье»м’ минре.</p><p>Ваде’’мы Никитава’’ сита ӈар’’ нита поӈгана ваць нерняна миӈа. Пыда сюрамбахая няхар’’ яӈорэй’ санармахана нябимдеясь (мэвыда — 7,50 м.). Яркулавахана ӈани’ нерня’ ха’’мыць. 250 ханм’ санавысь, няхаромдэйм’ ханавысь.</p><p>Сямянхат пэдавыдо’, харбёдо’ «Арктические игры» сянаковахана мэӈгу’’. Россия’ тиӈгыхыд ӈэда’’ няха’’нато’ Саляӈгардахана няби Си’’ив Харв хардахана пирдырта’’.</p><p>Автор: Анна Яптик’ падвы</p>

Яханандо’ пирдырмы’’

Фото: Марина Яр тадтавы

<div class="content-lead">Ямална’’ тиӈгывна санаторно-лесной школахана тохолковы’’ ӈацекы’’ ӈока’’. Пыдо’ тодо’’ яхат ӈэдаць, ӈэрм’ тер’’ ню’’. Хусувэдо’ таняна мэ’’мамда сава ихиня тензебтембида. Неноховавна сиддо’ тохоламбавы’’ ӈарка нидо’ ни’’ юрыбю’’.</div><p>Ӈоб’’ тарем’ ӈацекы илева’ тидхалембавы — Нина Геннадьевна Кельчина. Тохоламбавыда я’ ханярина иле’’, мале ӈарка ненэцяӈэ хэвы’’ хибяри’’ сидто’ табедамбавы нямдо’ нидо’ юрыбю’’. Сава вадахана ивхалпидо’. Нямэхэна яра иры’ 24 яляхана ӈарка соя’’ма’ яляда ӈась, си’’ив ю’’ поданда хаясь. Нина Геннадьевна тидхалембавыда мал’ ибе’’яда. Хурка ӈэвамдо’, ханзер’’ тохолковамдо’, ханяд ӈэвамдо’ мал’ вадець пиръяда. Тикы ӈацекыда ӈобт’ ма’’люрпнандо’, тензебтевандадо’ ӈока ӈэсеты. Теда’ Нина Геннадьевна Саляӈгардахана иле. Нюда, нюта ню манзая’’ӈа. Сяхаӈгарт’ тэри ӈамдё ехэра. Сяхари’ ядабтаб’’, иламда тарем’ вадецетыда.</p><p>Пыда ӈавнанда Ӈысми’’ яхана 1956 похона Тойма нюбета ӈэсыхына вадёданавысь. Школам’ мале’’мяхаданда Саляӈгардан’ тохолкованзь товысь. Ӈацекы тохоламбадаӈэ тоходанавысь. Пуна «Артек» нюбета лагерькана манзаравысь. Тарем’ вадамбой’ Саляӈгардахана ӈэда, тивакадо’ едена’’ ӈацекы’’ ед’ таславы школан’ тэввыць. Тет юкад вата по’’ ямбан’, хойхад турта’’ ненэцие’’ ню ехэрана илам’ торомдамба нядабись. Хусувэмдо’ харе’’ нюдрев’ пэрӈадась. Тикыта поӈгана ӈобкартамдо’ ни тэрабасету’’, вэваӈэ, саваӈэ ни тасламбасету’’, мал’ ӈэбато’ ӈоб’’ пирсувна мэнейдась. Хусувэй ехэрана серм’, илаӈгана тарана’’ ӈавэ Нина Геннадьевнахад намдасетыдо’, манэ’’цетыдо’. Ӈадьбята ӈод’’ тяхасовна манзаямда минреванда няю’ хуркари’’ ненадумда’’мида таня’’. Маниевы, тидхалембавы ӈацекыда сидта тамна тене’’. Ӈямэхэна интернетувна лаханась. Тарем мась:</p><p>— Мань тохоламбавы ӈацекыни’’ тенеян. Пыдо’ си’’ми нива юрыбава ихиняни ӈули’’ сава. Сяхари’ телефонувна, падна лаханако няцетын’. Няндо’ тарем’ ма’’ман’ харвадм’: «Етри’ нерняри’ ӈада’’. Минрена’’ серода’’ тидхалё миӈая’’».</p><div class="content-new-image"><img alt="pic" src="https://storage.yandexcloud.net/ym-sites-static/102de366-940.webp" style="width:100%" height="1290" width="2295"/><div class="content-image_child">Сидяӈг: Нина Кельчина’ архивхад ханавы</div></div><p>Мань ӈод’’ Нина Геннадьевнам’ етри’ сава ихиня тенесетыв. Сибимдей классхана мэдамзь. Ӈобанзер’ сидна’’ табедамбасеты. Хибяхартм’ ни тэрабасету’’. Савари вадам’ няна’’ хэтыбасеты. Та’ мальӈгана нюдяко хардахат товэӈэ марадм’ ехэраваць. Ханяӈэхэна тарана’’ ӈаводикы мякданда тэволасеты. Вадахана, ӈани ӈамгэхэна нядаӈгосеты.</p><p>Сёяха’ хардыхы школахана тохолковы Илья Сэротэттом’ хонрамбидамзь. Теда’ я’ тебтм’ нэкалпава манзаям’ пэрӈа. Яр-Саляхана иле. Тензебтемба’’мида тарем’ ваде’’ядась:</p><p>— Мань школахана тохолковани мальӈгана «санаторкахана» мэдамзь. 2007 похона сибимдей классм’ пэрӈадамзь. Нина Геннадьевна матдомдей классхана мэни’’ воспитательӈэ тарась. Ханяӈэхэ’’на маня’’ группаханана’’ тарасеты. Ӈули’’ сававна тенев. Сидна’’ харта нюдрев’ табедамбасеты. Няданда сяхаӈгарт’ вэва вадам’ нива’’ намдасету’’.</p><p>Маня’’ «Няръяна Ӈэрм» газетахана манзаранаӈэ нянда соя’’ма’ ялянда няю’ сава вади мэ’’ӈава’’, сенз ӈэя, таӈга илея. Нюда, нюта ню’’ сита етри’ майбтамбая’’.</p><p>Автор: Руфина Окотэтто’ падвы</p>

Соя’’ма’ ялянда ед’

<div class="content-lead">Ты пэртя’’ Сянакова’ яляхана сёбар’’ пирдырма’ хавна «Кочевая семья» конкурс ӈэсеты. Тюку по’ Нядаӈгардан’ сидндет мяд’ тер’’ мандал’’ товыць. Пыдо’ округна’’ тодо’’ си’’ив яхад ӈаць.</div><p>Пирдырмадо’ сидя яля’ миӈась. Сянакода’’ ненэцие’’ ирмня няндо’ сырӈаваць. Пихий сцена’ ниня ембдяродо’, мэта ӈаворидо’ манэ’’лабтамбиць. Невхы иринато’, хаданато’ сё мэ’’ӈаць. Ханяд товамдо’, хибя ӈэвамдо’ ваде’’ӈаць. Не’ ханодо’, харе’’ ӈудаха’’нато’ сертавы ӈамгэридо’ ӈадимдець. Сыртаӈэ маня’’ сэврина’’ ӈэнадаӈгаць.</p><p>Ӈопой мяд’ тер Салиндер еркарм’ мэ’’мыць. Тасу’ я’ Паюте’’э’ харад’ выӈгад ядэрмыць. Хой’ нямна мюсерта’’ ненэця’’. Не’ хандо’ хэвхана мэвахандо’ ядабтэйнась. Небямдо’ лаханако ня’’ӈадамзь. Нонна Владимировна тарця вади няни мэ’’ӈась:</p><p>— Хэбидя ялян’ мат’’ӈэ товаць. Ӈани’’ нюни’’ ниць ту’’. Хасава нюми тыда манзая’’ӈа. Ӈарка не нюми хаюпи. Ӈани ӈопой не нюми Тюмень маркана иле. Тохолко’’мамда мале’’мяхаданда таняна манзара пэяць. Техэ яхадана’’ пон’ миӈаваць, ява’’ ёльце хубта. Тальня’ машинахана тэвынаць. Ява’’ Ямбург’ хой’ няюна харахана ӈа. Нядаӈгардахаван’ ӈоб’ тэворцетыдм’. Няхаромдэй’ пирдырманзь тодм’. 2018 похона мя’’ни тер’’ ня’ нюртейваць, тедахав’ хурка ӈэбцу.</p><div class="content-new-image"><img alt="pic" src="https://storage.yandexcloud.net/ym-sites-static/4116b62e-0d2.webp" style="width:100%" height="1328" width="2362"/><div class="content-image_child">Фото: Анна Яптик / Няръяна Нгэрм</div></div><h3 style="font-size:19px;font-weight:500;margin-bottom:12px">Сёётэй мяд’ тер’’</h3><p>Нонна Владимировна сё мэць ӈули’’ теневавысь. Сёда ӈод’’ харта падыбида. Ӈопоймда намдавась, порцам’ пирембава’ нямна ӈась.</p><p>— Сёми хар’’н падвэми. Та’ ӈэдалёванд сер’, ӈамгэхэв ӈаварм’ пирембаванд сер’ ханяӈэхэ’’на ихинд хайнана’’ вада’’ ха’’маӈгуд’’. Ядэро’’мини’’ пуд харвобта едэй сём’ падӈгодакэдм’. Тарем’ ерембата тикыми тамна Новой Уренгойхана мэтнакэв. Тарця ӈэсетынё’’: сыртан, сыртан ӈамгэ’ пиркана сёкоцям’ ханаӈгун. Нюдяко не нюхуртами Юннеми си’’ни’ тотрев’ хыноцеты. Нябими Лилия. Ӈопойдо’ — Виталина. Нядаӈгардахана ӈацекы тохоламбадаӈэ тохолкурӈа. Тохолкованда хавна тара. Пуна сцена’ ниня мядонда’’ е’’эмня тараӈгу, хынота.</p><p>Мяд’ терсавэй’ мал’ ӈобнзер’’ ӈани’ хыно’’ӈаць. Мэ’’мы сёмдо’ харто’ падвэдонзь. Хыно’’мандо’ нерня вэсакода Иван Яковлевич мась:</p><p>— Ӈавна ӈобт’ 1996 похона тэвынинзь. Теда’ ӈобкана няхар’’ ю’’ по’ илени’. Тюку по’ «Жемчужная свадьба»м’ мэ’’ӈани’. Пухуцяни ня’ си’’ив нюм’ ваданинзь. Ханяӈыдо’ харто’ мяд’ терсавэй’’, нюдякудо’ тамна школа-интернатхана тохолку’’. Выӈгана иленина’’, харад’ илам’ минренина’’ таня’’. Сямян манзаям’ ӈобнзер’ сертабива’’, нина’’ етри’ нядабина’’.</p><p>«Мюсерта’’ мяд’ тер’’» пирдырмахана хибямдо’ нерня’ мэвамдо’ хэбидя яля’ малева’ нерцю’ намдаваць. Салиндер еркарм’ мэта’’ нина’’ нябимдейӈэ таславыдонзь. Нядаӈгардан’ мядоманзь товы’’ ненэй ненэцие’’ нямна намда’’. Хуркари мел’’мана сертавы ембдяро манэ’’ӈа’’, хайнана сёхо’’ инзеле’’.</p><p>Автор: Анна Яптик</p>

Иламдо’ сёхона салмрамбидо’

<div class="content-lead">Яра иры’ 21 ялям’ тодо’’ тэнз ненэцие’’ помна ненадо яляӈэ мэ’’цетыва’’. ЮНЕСКО’ ватовна 2000-й поход харе’’ вадина’’ лэтрава’ е’’эмня наӈэдя таславы ялява’’ таня. Ӈарка яна’’ ӈардан’ хуркари’’ илека’’ серо минресетыва’’. Тандая’ Ямална’’ тиӈгэвна юдимдей ӈарка паднавам’ мэ’’ӈаваць. Таӈок по’’ ямбан’ яна’’ тер’’ етри’ ӈобт’ ма’’люрцеты’’. Тикы’ няю’ харто’ вадамдо’ лэтравандо’, сямандо’ няю’ диктантм’ падыбасеты’’.</div><p>Саляӈгардахана тет тэнз’’ ӈэрм’ тер’’ яра иры’ сидя юдимдей яляхана ма’’люрӈаць. Хусувэдо’ толаӈгова’ мякана харта вадавнанда паднась. Тодо’’ лохохо’’на паднава’ серкана теневабцудо’ тасламбиць. Ненэй ненэця’’, хаби’’, тасу’ хаби’’, ӈысми’’ вади намдаваць. Ӈарка ненэця’’, тохолкода’’, мяд’ терсавэй’’ товы’’ таняць. Вадамдо’ мэнена’’, теневана’’ варемдо’ мэ’’ӈаць.</p><p>Мале ӈока по’’ «Няръяна Ӈэрм» газета’ манзарана’’ диктантм’ минредо’. Пыдо’ мале падвы техэ яхандо’ тидхалембидо’. Сиддо’ няд’’мяць округханана’’ харе’’ нина’’ хайнана диктатм’ падыби’’. Маркана илена’’ е’’эмня ненэй вадавна толаӈгодаӈэ «Няръяна Ӈэрм» газета’ ӈэвахана мэна Марина Тэтакучевна Яр тарась. Ӈобнзер’ падыбавэва’’ сёбар’’ ненэцие’’ нямна ӈась. «Мэбете’’э Тэсида»м’ нюбе’’ӈась. Газетахана манзарана Анна Яптикы’ падвы. Тароць мэбета Кирилл Тэсида’ нямна паднавысь. Пыда Тасу’ яхад, Ӈэдя’ хардахад ӈа. Нямнанда ӈэда юнм’ намдаванда сер’ тарем’ мась:</p><p>— Ихинани ӈули’’ сава ӈэ’’нив’’. Си’’ни’ тотрев’ сёбарӈэ харвана’’ нини’’ иле’’мями толаӈгу’’. Тандая’ вадёдана’’ ӈацекы’’ си’’ми пыдаӈгу’’. Е’’эмняндо’ табекоми тарця: «Индата’’ пирпата’’ — нерняри’ ӈада’’».</p><div class="content-new-image"><img alt="pic" src="https://storage.yandexcloud.net/ym-sites-static/2a6418a1-edd.webp" style="width:100%" height="647" width="1151"/><div class="content-image_child">Фото: Анна Яптик / Няръяна Нгэрм</div></div><p>Тюку пова’’ «Сензувна илева»‘ поӈэ таславы. Яна’’ тер’’ сяхари’ пыхыдадо’ мэйрамбидо’. Ӈопой яхана ни’’ ӈамдю’’. Сенз ӈэвадо’ таняд паӈгды. Паднаванзь товы Юрий Хасавович Лапсуй тарця’’ вади хэтась:</p><p>— Мань Панаевскхад тодамзь. Ихинани тарем’ ӈобт’ тэвор’’мава’’ сава’ то’’олха. Тев’ ёльцяӈгана маркана мэсетыдм’. Тикы’ сер’ диктантм’ падыбава’ ёльцянд’ ха’’морцетыдм’. Няхаромдэй мэва’ паднадм’. Сяхаӈгав’ манзаям’ тохоламбава’ мякана ма’’люрӈаваць. Та’ мальӈгана Валентина Нёлёковна толаӈгусь. Ӈэрм’ тер’’ тюку’’ похо’’на харто’ вадамдо’ теневабто’ тара. Маня’’ ненэй ненэцяӈэ вадава’’ юрыба ни серос’’. Лэтрамбахава’’. Нюху’’на’’, нюна’’ нюху’’ тэврамбахава’’. Ӈани похона ӈани’ тутнакэдм’.</p><p>Ӈармбэй ненэця’’ поӈгад Тамара Очевна Окотэттом’ ядабтадамзь. Пыда тарем’ лаханась:</p><p>— Мань нянани ненэцие’’ ма’’люрма ёльце сава. Нивы манэпавы’’ нина’’ хомбива’’ма’’. Небо’ нюху’’нани турӈадамзь. Теда’ ӈани’ тось таславась. Падыбавэва’’ ӈули’’ сава рассказкоця ӈэвы. Вареми мэць ӈарханда падавась. Илебей’’ ненэцяӈг’’, ӈацекэхэ’’ мэ’’манда табекоми тарця: «Вадамдо’ мэ’’ӈамдо’, нерняри’ минремдо’, харто’ вадавнандо’ ибедорӈая’’. Вадамдо’ теневаван’ харвана’’ — тохоламбамдо’. Яна’’ тер’’ сензувна илея’’».</p><p>Тарем’ харе’’ вадина’’ лэтрамба ненадо ялява’’ сававна мэ’’ӈаваць. Ханяӈы’’ теневабцудо’ хорпавандо’ хавна пон’ нивы хомбавы нидо’ ядабтамбиць. Неноховавна ӈопой яхана ӈока тэнз’’ ӈэрм’ яна’’ вабц намдаваць, паской’’ ембдяродо’ манэ’’ӈаваць.</p><p>Автор: Руфина Окотэтто’ падвы</p>

Ненэця’ вада ‒ минтарка вада

Фото: Галина Кинчина / Няръяна Нгэрм

<div class="content-lead">Си’’ив Харв маркана ӈэрм’ тер’’ сёбар’’ ӈацекы’’ ӈани’ таня’’. Пыдо’ тохолковандо’ ирманя ханяӈэхэна помнандо’ невхы’’ сянакубцха’’на пирдырцеты’’. Сиддо’ тикы ненадо серкана «Ямал-нюна’’ я!» Ассоциация’ тер’’ нерня’ тидхалембасеты’’.</div><p>Тандая’ сидна’’, «Няръяна Ӈэрм»хана манзаранаӈэ, таняд Сотруева Анна мядоманзь хаӈась. Пыда сёбар’’ серо нерня’ минрена не. Ямал’ тиӈгэвна юнда пили’’ сосеты. Манзаита нямна тарем’ лаханась:</p><p>— Мале сян по’’ ямбан’ Центр технического творчества’ тохолкось’ яхана сёбар’’ ӈацекы тохоламбадаӈэ тарадм’. Теда’ Ассоциация’ няд минрена манзаями пэрӈадм’. Илебей ненэцие’’ е’’эмня Ӈэрм’ тер’’ сянакубц’’ пирдырмам’ сертабидм’. Ныхыдырць сямянхат мэбетидо’ таслаӈгува’’. Пыдо’ ӈахакуд тикы’ е’’эмня ниць хамекур’’. Сиддо’ сирё хибяхарт нись табедамбю’’, ӈадьбята ханяӈыдо’ нид минзь нидо’ тохоламбаӈгу’’. Пирдыртина’’ поӈгана луца’’, хадян’’ хасава ӈацекы ӈани’ таня’’. Ӈэрм тэнз мэта’’ нидо’ нядабидо’, тидхалембидо’.</p><div class="content-new-image"><img alt="pic" src="https://storage.yandexcloud.net/ym-sites-static/b58b01df-428.webp" style="width:100%" height="1329" width="2362"/><div class="content-image_child">Фото: Галина Кинчина / Няръяна Нгэрм</div></div><p>Колледжхана физкультура’ урокадо’ минрена Минхаиров Рустам Галимджанович сиддо’ ёльце саву’’ӈась:</p><p>— Я’ ханярина ӈэрм тер’’ илебей’’ ненэця’’ сяхари’ сёбар’’ ӈэсеты’’. Тюку тохолкось’ яханандо’ ӈани’ ненадо’’. Хуркари’’ тоенана серкана няндо’ енасетыдм’. Ханярина пирдырць тарабата хонрабасетын — сяхаӈгарт’ пуня’ нисеты’’ ӈа’’. Тохолкода’’ илебей’’ ненэциена’’ пирдырман’, сёбар’’ илам’ нёдаван’ харва’’. Ӈопой, маня’’ колледжханана’’ Ӈэрм’ тер’’ пирдырми минрева’ няю’ ӈанэдярма’’ яӈгу. Теда’ ныхыдырць тархалмадава’’ «Авангард»хад ханаваць. Нянана’’ тамна хан’’, ныхыдырць мэта’’ лата’’, тынзя’’, тубка’’ тара’’.</p><p>Нерня’ ха’’амвы’’ хасава ӈацекы’’ «Ямал-нюна’’ я!» Ассоциация’ нермбэртя Эдуард Яунгад’ ӈудахат мядонзэйдамдо’ ня’’маць. Тарем’ саӈгомто’ сер’ сидя явна ныхыдырӈаць. 65 кг-хад вата’’ поӈгад сямянхат мэбета Ядне Юлиан ӈэвы. Пыда Тасу’ явхы Паюте’’э хардахад ӈа. Таняна тарця мэбета’’ ӈока’’ ӈэрха’’. Нябимдей ян’ ха’’амвы — Витязев Николай. Пыда Крышмарь Семёнм’ нэкал’’ӈась. Саӈгоманато’ няхатато’ 65 кг-хад сибёрка’’ ӈани’ мэбетидо’ таслаць. Тикы’’ Сегой Альберт, Хороля Николай, Сэротэтто Вячеслав ӈэвы’’. Ти, тарця’’ сёбар’’ яна’’ тер’’ Саля яв’ тяханяна Си’’ив Харв маркана ӈэда колледжхана тохолку’’.</p><p>Сянхав’ иры’ хэ’’мяхад Анна Сотруева тамна ӈани ӈоб’’ пирдырмам’ сертаӈгу. Тедари’ тикамда нидась вадес’’. Ма’’нисяв, товани ёльцянд’ ӈацекы’’ ныхыдамдо’ ма’’ламбая’’.</p><p>Автор: Галина Окотэтто’ падвы</p>

Ныхыдырӈаць

<div class="content-lead">Дюԓкат ва’та шичадю’’ шеӭв тыӈкан’’, хампԓяӈк команда’’, шичадю’’ шитчет’ ненэй мят’’. Пуровский’ районхана няматаԓакуԓма дяԓям мэ’ӈаш’’. Таԓкан мянаԓмантуӈ мэты шанат дяхат мэна’’ неша’’ ӈомаш’’.</div><p>Чуки похона хампԓяӈк команда’’ — Самбуԓкахат, Каԓясамэхэт, Ханымейхат, Каԓпюԓкат, Таԓкахат мэна’’ мянаԓяш’’. Праздник найпёш культурахана мансԓанна’’ деты постановкам’ «Оленевод — сила Ямала» ӈычимчеӈаш’’. Чикиӈ пут сценаӈ кӭвмана кан’’ мансхаԓяш’’. Чуки похона парадхана ӈопшеԓы шича дю’’ шитчет’ тыӈ кан’’, неша’’ мюшинатԓям ӈуп пумна миньдяш’’. Тытуӈ топдяма’’, канутуӈ дёԓьше мэкат’’. Чикехет праздникан томы’’ веԓв’’ нешади’’ поздравийпёш мунуӈаш’’. Таԓкахана ты’’ падеԓьш мансԓани’’ дяԓям Пякупур нимита дяхаӈ няна ӈайта пуԓ ӈыԓна мэ’ӈатоньш’’.</p><p>Праздникан томы’’ хомана ныптакомаӈ мэты таняӈ шичадю’’ шитчет ӈок мяту’’ меӈаш’’. Куԓкаԓи’’ ӈамыдю шеԓтаӈаш’’, шанат пԓощадка’’ мансԓаӈаш’’. Мянаԓта’’ неша’’ шича дяԓяӈ дямпан поӈкнатуӈ мянаԓяш’’. Чуки похона дюԓкат ва᾿та шичадю’’ шеӭв тыӈкан’’ няматаԓакуԓяш’’. Неԓьчеэй дяԓяхана няматаԓакуԓта’’ масс-стартхана ӈуп диԓьшуӈ мансхаԓяш’’. Таньше ӈуп диԓьшуӈ ӈайтаԓёма неньшаԓ ниӈа. Ӈука нешади’’ маныдеш куки’’ ты’’ шехеԓэхэт ӈатан шуԓхаԓьштуташ.</p><div class="content-new-image"><img alt="pic" src="https://storage.yandexcloud.net/ym-sites-static/eacdaee7-8f3.webp" style="width:100%" height="1154" width="2049"/><div class="content-image_child">Фото: Андрей Пяк</div></div><p>Таньше ӈайтаԓёш мянаԓчи’’ поӈкна ӈайвахай местам Ханымейхат мэна Виктор Пяк канаӈата. Пы’та финиш’ дёԓьшат мат’ минута чет’дю ӈуп секундахана тайвай. Нимимты местан ӈупчики Ханымейхат мэна Вячеслав Пяк ка’амдяш, пы’та неԓьчена няхатата ӈуп секундамна хатхаԓьдяш. Няхамты местам Самбуԓкахат мэна Сергей Хатанзеев канаӈата. Нимимты дяԓяхана ӈопумана ӈайтаԓёта’’ мянаԓяш’’. Ӈопумана ӈайтаԓёта’’ касами’’ поӈкты Ханымейхат мэна Владимир Пяк ӈайвахай местам канаӈата. Ни’’ поӈкат тыӈ кан’хана ӈайтаԓёш ӈайвахай местан Жанна Агичева ка’амдяш.</p><p>Шича дяԓяӈ дямпан мянаԓта’’ шана’куш’’. Вяԓкуԓоԓяш’’, нэхэԓумпиш’’, няхаԓ ха’мхана ха’муԓяш’’, шалди’’ ӈыԓна нюмкупёԓьш нетуӈ конуԓпиш’’, этно-биатлонхана шуԓвиԓьш мянаԓяш’’. Каԓьтуӈ детуӈ мянаԓчи’’ поӈкна няхаԓ ха’мхана ха’моԓьш, этнобиатлонхана мянаԓьш, кан’ну’’ нимня ха’моԓьш ӈайвахай местам Самбуԓкахат мэна Афанасий Тэсида канаӈата. Пы’та праздникхана удостовереним’, знак’ «Мастер спорта России по Северному многоборью» ня’амӈа. Ӈокна командахана мянаԓтахат’’ няхаԓ ха’мхана ха’моԓьш Каԓпюԓкат мэна Николай Пяк нэхэԓя, кан’ну’’ нимня ха’моԓьш Самбуԓкахат мэна Анатолий Вора ӈайвахай местам канаӈата. Этнобиатлонхана шуԓвиԓьш Ханымейхат томы командахат мэна нэхэԓя’’. Няԓяӈпаӈк вяԓкуԓпёш Самбуԓкахат томы Иван Вануйто хомана вяԓкуԓоԓяш, пы’та ӈайвахай местам канаӈата. Ӈокна мянаԓтахана’’ вяԓкуԓоԓьш Таԓкаӈ командахат мэна Филипп Пяк ӈайван ка’амдяш. Каԓьтуӈ мянаԓтахат’’ шалди’’ ӈыԓна нюмкупёԓчи’’ поӈкна Алексей Кунин нэхэԓя. Ӈокна мянаԓтахат шалди’’ ӈыԓна нюмкупёԓьш Каԓясамыӈ командахат мэна Евгений Пяк ӈайвахай местам канаӈата. Каԓьтуӈ нэхэԓумпёш мянаԓтахат’’ ӈайвахай местан Дмитрий Айваседо ка’амдяш. Ӈокна командахана мянаԓтахат’’ нэхэԓумпёш Каԓпюԓкат мэна Леонид Пяк нэхэԓя. Тыӈ канхана ӈайтаԓё ӈайвахай местам’ канамы’’, шана’ко мянаԓьш нэхэԓмы’’ тотуӈ миԓита’’ мячисы’’ ня’амӈа’’. Чуки похона мянаԓмы поӈкат ӈайвахай местам ӈай Самбуԓкахат мэна команда канаӈата. Нимимты местан Таԓкахат мэна команда ка’амдят, няхамты местам Каԓпюԓ команда канаӈата.</p><div class="content-new-image"><img alt="pic" src="https://storage.yandexcloud.net/ym-sites-static/8e3a224d-bac.webp" style="width:100%" height="1232" width="2189"/><div class="content-image_child">Фото: Андрей Пяк</div></div><p>Выӈкна, каԓтыхина диԓина’’ нешаӈкна’’ няматаԓакуԓма — пиԓи хома ныптакома дяԓя. Шанат тэмс неша’’ ӈопт ӈомшту’’, куптат ниня манымайтуӈ нетуӈ, диԓюнатуӈ кошту’’, няханатуӈ дёԓимяшошту’’, поӈкнатуӈ шана’кош мянаԓьшту’’. Праздникан томы’’ хомана ныптакомаӈ мэт культурахана, спортхана мансԓанна’’ куԓкаԓи’’ мероприятии’’ шеԓтаӈаш’’. Няматаԓакуԓма дяԓяӈ вильма мэт шанат предприятии’’ нятакуш. Чуки похона куԓкаԓи’’ праздникхана тадяӈаш. Ӈашки’уди’’ шана’комаӈ мэт шанат площадки шеԓтаӈаш’’. Меԓь ни’’ конкурсхана «Ямальский колорит» ненэй паныдётуӈ ӈычимчимпиш’’. Куԓкаԓи’’ матамэй’’, меԓьмана шеԓтамы’’ паны’’, пема тадяӈаш’’. Кынутаха’’ дюньшиԓеман ха’та’’ «Напевы тундры» нимита фестивальхана кынучи’’ мэта’’ кынсыхи’’ дюньшиԓеӈаш’’.</p><p>Чикиӈ камна няматаԓакуԓма дяԓяхана шича свадьбам’ мэ’ӈаш’’. Павел и Софья Пяк патнаӈаханьш, Тимофей и Алёна Айваседо ӈопт каймямч дяԓямч мэӈаханьш. Няматаԓакуԓма дяԓян томы’’ неша’’ хомана ныптакуш’’. Чики праздник’ шеԓтапёш предприятия ТЭК нятакуш. Ӈука неша’’ няматаԓакуԓма дяԓям маныдемаӈ мэты «Пуровская медиагруппа» шича дяԓяӈ дямпан трансляцим’ минԓеӈаш. Куше чики праздник’ мэсумам Пурмедиа интернетмана ӈычимчеӈаташ.</p><p>Автор: Андрей Пяк патмы</p>

Няматаԓакуԓма дяԓя

<div class="content-lead">Дюԓкат ва’та кашем’дюԓ мянаԓта’’, шанат дют ты’’ кан’’. Надым’ нимита каԓтыхина тэхэ’’на  мансԓани’’ шана’кома дяԓям мэ’ӈаш’’. Чики праздниким Надымхана маньԓе няхаԓдючимты мэмаӈ шеԓтаматуӈ. Чуки похона поӈкнантуӈ мянаԓьш Ямална ӈаԓка веԓв Кубок’ митумантуӈ мэты шанат дяхат мэна’’ Ӈэԓм’ чеԓ’’ неша’’ тоӈаш’’.</div><p>Ӈопшеԓ кашем’дю’’дяӈкня команда’’, дюԓкат ва’та кашем’дюԓ мянаԓта’’. Надымхана шана’кома дяԓям шича дяԓяӈ дямпан мэӈатоньш. Маня’’ Пуровский’ районхатна мэна команда ӈупчики мянаԓяш. Праздникхана хыниԓмантуӈ мэт Надыман шанат тэмс неша’’ тоӈаш’’. Неԓьчеэй дяԓяханантоӈ тыӈ кан’ну’’ парад’ шеԓтаӈаш’’.</p><p>Чуки похона чет’дяӈкня кан’’. Мюшинатԓям ӈуп пумна миньдяш’’, тытуӈ топдяма’’, кан’нутуӈ дёԓьше мэкат’’. Праздникан томы’’ нешаде’’ Ямална ӈаԓка веԓв Дмитрий Артюхов поздравийдяташ. Пы’та мянаԓмантуӈ мэт томы’’ нешаӈк мунуш хома, лимпьта’’ вачи’’ мэӈаш. Праздникхана шанат пԓощадка тадяӈаш’’. Тэхэ’’на мансԓани’’ дяԓян томы’’ нешай’’ хомана ныптакомаӈ мэты, куԓкаԓи’’ мероприятии’’ шеԓтаӈаш’’. Хӭтмайтуӈ ӈамыкутуӈ ӈычимчемпюта’’ тадямэӈаш’’, ӈамԓу’’ мичиԓпëта’’. Чуки похона «Кочующая семья — 2026» нимита конкурсхана ӈопшеԓ шитчет мюшаԓта’’ мятчеԓ’’ мянаԓяш. Чики конкурсхана мянаԓьш шича мятчеԓ нэхэԓя — Климовы Приуральский районхат мэна, Талигины Шурышкарский районхат томы’’.</p><div class="content-new-image"><img alt="pic" src="https://storage.yandexcloud.net/ym-sites-static/96cdcaa7-b2f.webp" style="width:100%" height="885" width="1575"/><div class="content-image_child">Фото: Андрей Пяк</div></div><p>Чикиӈ камна неӈи паныдю’’ конкурсхана демьпчаԓутуӈ ӈычимчеӈаш’’. Паныдётуӈ, пемитуӈ дёԓьше мэкат, чупей’’ меԓьмана хcтмы’’. Таԓьша праздникхана пиԓи вильта — тыӈ канхана няматаԓакуԓма. Няматаԓакуԓьш касама’’, неӈи’’ мянаԓяш’’. Тыӈ канхана ӈайтаԓëш чепиԓмы’’ поӈкна ӈайвахай местам’ ӈай Надымский’ районхат мэна Владимир Хатанзеев канаӈата. Непоӈ пы’та ӈупчики нэхэԓяш. Няматаԓакуԓьш мянаԓмы’’ ни’’ поӈкна Нина Лаптандер Приуральский районхат мэна ӈайвахай местан ка’амдяш. Шича дяԓяӈ дямпан мянаԓта’’ шана’куш’’: няхаԓ ха’’мхана ха’’муԓяш’’, нэхэԓумпиш’’, шалди’’ ӈыԓна нюмкупёԓьш пы’татуӈ конуԓпиш’’, няԓяӈ паӈк вяԓкуԓпиш’’, кан’ну’’ нимня ха’’муԓяш’’, этно-биатлонхана мянаԓяш’’.</p><div class="content-new-image"><img alt="pic" src="https://storage.yandexcloud.net/ym-sites-static/1685101f-52a.webp" style="width:100%" height="1329" width="2362"/><div class="content-image_child">Фото: Андрей Пяк</div></div><p>Пуровский’ районхат мэна’’ нена’’ няхаԓ ха’’мхана ха’’муԓта’’ нешади’’ поӈкна мянаԓьш ӈайван ка’амдят. Каԓпюԓкат мэна Николай Пяк ӈайвахай местам канаӈа. Пы’та няхаԓ ха’’мхана 9,61 метраӈ кунат ха’’мдяш. Николай дёԓьше нюӈк, ха’’муԓмам хомана чедимяӈа. Нэхэԓманта де’эмня пы’та снегоход’ мячисайӈа. Тыӈ канхана ӈайтаԓёш ӈайвахай местам’ канамы’’, шана’ко мянаԓьш нэхэԓмы’’ тотуӈ миԓита’’ мячисы’’ ня’амӈаш’’.</p><p>Ямална ӈаԓка веԓв Кубок’ чуки похона Ямальский’ районхат мэна’’ нешади’’ команда ТСО КМНС «Харп» канаӈата. Пуровский’ районхат мэна’’ нена 20-21 февральхана ӈай мянаԓты’’. Таньдёԓьшкана Таԓкахана ты’’ падиԓьта’’ нешади’’ дяԓям «День оленевода» мэтӈама’’. Шича дяԓяӈ дямпан Ӈэԓм’ чеԓ’’ неша’’ поӈкнатуӈ шана’ко мянаԓты’’. Таԓьша ныптакома дяԓя — пиԓи хома дяԓя. Праздникан томы’’ неша’’ куптат ниня манымайтуӈ нетуӈ кошту’’, няханатуӈ дёԓимяшошту’’, поӈкнатуӈ нэхэмтуӈ, нюӈк ӈаймямтуӈ конуԓпëш мянаԓьшту’’.</p><p>Автор: Андрей Пяк патмы</p>

Тэхэ’’на мансԓана’’ мянаԓяш’’

<div class="content-lead">По’ ямбан’ ӈатена’’махадана’’ ты пэртя’’ Сянакова’ яля’’ пэяд’’. Хэбидя’’ ялэна’’ ты’’ ниць иры’ това’ нерцю’ малеӈгуд’’. Ӈокханда округна’’ тиӈгывна сидя ю’’ мат’’ хардахана тарем’ ма’’люрта’’. Хэвы сидя ныланавахана ӈарка ненадо хэбидя ялям’ Нядаӈгарад’ няна мэ’’ӈаваць. Хусувэй по’ пыдо’ яндо’ няна нерня мэцетыва’’.</div><p>Тюку по’ ты пэртя’’ няхар’’ юдимдей мэва’ пирдырӈаць. Яна’’ ӈэвахана мэна ервана’’ ненадо ӈуда’ терм’ матопиць. Округна’’ ханярид юкад вата хасую’’ сёбар’’ мандал’’ товыць. Тёняӈы хахаяда Хаби’’ яхад ӈэда’’ ӈани’ таняць. Ӈокханда пирдырмы 190 ненэцясь. Сямянхат ӈокавна Ямальской район’ няд товыць, сидндет мандалтонзь. Ӈани’’ нидо’ нядандо’ тянёркаць. Тасу’ я’ няд тетрись. Нядэй яхад няхар’’. Пэ’’ няд, Пяку’’ яхад, Шурышкарской районхад ӈопой’’мана ма’’лавыць.</p><div class="content-new-image"><img alt="pic" src="https://storage.yandexcloud.net/ym-sites-static/8081a6f4-15b.webp" style="width:100%" height="1440" width="2559"/><div class="content-image_child">Фото: Анна Яптик / Няръяна Нгэрм</div></div><p>Ненадо Сянакова’ ялям’ нермбэртява’’ нэмбидась. Хэтуванда вадида маня’’ нунаӈэ ёльце ӈатейнаць. Ты пэртяха’’, хардахана иленаха’’, хэвняд ядэртаха’’ ма’’нисяв: «Няхар’’ юдимдей мэва’ тюку ян’ ма’’люрӈава’’. Пэдарата яхана сяхаринда сидна’’ сававна ядабтасеты’’. Ӈобт’ тэвавана’’ сер’ тецьдахартада яӈгода то’’олха. Ненэця’’ няхато’ тэри маймби’’. Яна’’ ӈарка ерв’ табековна Тодо’’ тэнз’’ ненэцие’’ ӈоб’ няю’ нятва’ пом’ мэ’’ӈава’’. Ненэсянда ӈод’’ ӈэрм’ тер’’ ила’ саирм’ тамна ханяхартана тарем’ нир манэт’’. Тарця хэбидя ялярихина манэтар. Ӈадьбята ты пэртя’’ Сянакова’ ялэ хуркари’’ марка’’на, нюдяко’’ хардаха’’на сертабина’’. Хой’ няӈы илм’ ехэранахана тикэр неновна нюрцям’».</p><p>Яля’ ер’ нерцюна подермы хан’ ты манэ’’лабтамбиць. Тыто’ ё’’ иня’’, сёя’’мя’’, ямдётана’’ пелей’’ иня’’ ӈули’’ сомбояць. Ӈобкарт ӈобтолас халцо’’лы, пясик, сян яӈгусь. Хусувэй хибя ханяӈы хан сава ӈэвам’ харта тасла, тэра пирӈадась: падроко ӈэся’ мю’ моёпиць. Пуна сырахад ӈонавы ӈарка пирмда’’ма’ хэвувна ханодо’ валкая ядаць. Сэй’’махадандо’ таранаха’’, сё мэтаха’’ сырць пэйнаць. Сёбар’’ ненэця’’ ӈоб’’ пуд ӈадимяць. Ӈамгэ яхад ӈэвамдо’ хамэдава’ пирась. Си’’ив яхад товы’’ мальцито’ таӈга’’, махато’ няна пададыдо’ мал’ яӈгаць.</p><div class="content-new-image"><img alt="pic" src="https://storage.yandexcloud.net/ym-sites-static/812a34a6-45d.webp" style="width:100%" height="1440" width="2559"/><div class="content-image_child">Фото: Анна Яптик / Няръяна Нгэрм</div></div><p>Сянакова’ ялям’ нэ’’махадандо’ хубтыхы пявы’’ пирдырма’’ ӈани’ пэйдаць. Нюртей яляхана яркулава, хано санарпава, тэхэ’’на няваталаӈго ӈэдалёва, таро’’ма, этнобиатлон ӈаць. Нябимдей яляхана — ламбита сюрамбава, не’’ няби хасев’’ ныхыдырма, сюрамбахая няхар’’ мэва санарма, хулейма. Тикы’ ирмня сидя яля’ сер’ «Кочевая семья» конкурс, лекар’’ сертабада’’ «Медицина — всем и каждому», «Ты пэртя, сензан ӈа’’», «Чтобы сберечь традиции — сохрани здоровье» акция’’ ӈаць. Сё мэти’’ «Открытый микрофон», «Магия тундры» няби «Три солнца» концертха’ ӈаханзь.</p><p>Автор: Анна Яптик </p>

Няръяна Ӈэрм