Туӊа-щира так кев юш ун машинаятан яма аймтса. Хор: Сергей Зубков

<div class="content-lead">Юш верты ёх хащам ӆапатан Пулӊават эӆты Надым вош унты кев юш верты етшасат. Аратаӆ 344 километра юш яӆпа этас. Щи ураӊна таӆаӊ ветхошъяӊ таӆ мосас.</div><p>Ямал мувев ӆоватаӆан ун. Вошӆаӆ па куртӆаӆ кутан ям кут яӊхты мосаӆ. Щишан мет оӆӊа, ищки хатӆат пиӆна, айнайн ӆонщаӊ таӆ юшат верты питсайт. Туп мелак хатӆат ёхатӆат, юшев нёхла йиӆ. Ванты, щи ураӊна Ямал мувев кущайт нумасты питсат, ищи па кев юш ӆэщатты мосаӆ.</p><p>Дмитрий Кобылкин губернатора уӆмаӆан, 2011-мет таӆан юш верты вер нёхӆас. Мет оӆӊа юшаӆ кев хишан шошапса. Щиты яртъяӊ таӆ сыс кев хиш эӆты хув юш этас. Мет ӆаварт ус ёханат па соймат шоппи нормат ӆэщатты. Аратаӆан 53 норам верса. Щаӆта па вуӆы тащатан юш шоппи вуншты ураӊна, 46 пайӆы таха ӆэщатса. 2020-мет таӆан ван хатӆап тыӆащан Дмитрий Артюхов там йис округ куся ху щи кев хиш юш пуншсаӆӆы. Щи пора эӆты таӆ-ӆуӊ сыс Надым юш хуват яӊхты рахты питас. Туп уншак машинайт яӊхты верытсат.</p><p>Щи юпийн юшев ямашак ӆэщатты питса. Туӊа-щира так кев юш ун машинаятан яма аймтса. Йи леп, Надым вош па Пулнават эӆты щи рупата манты питас. Щиты юшев етшаптаты ураӊна хут таӆ еша антомшак мосас. Манты юшев кутапан тут йиӊк маты «Лукойл» нэмпи ӆапка яӆпа этас. Щи тумпийн 13 ӆойӆыты лот ӆэщатса, хота щутщаты, нампар вощкаты па вер сахат яӊхты рахаӆ.</p><p>– Хув ӆавӆам юшев яммаӆса, щит шеӊк ям! — Надым вошан уӆты Раиса па Виктор Пырысевӊан ястасӊан. — Ванты, мин катӊан Ӆорвош район эӆты, щита ун эвев па хиӆыӆув уӆӆат. Пулӊаватан ищи рутат тайӆув. Щишан ван кутан мойӆыты яӊхӆув. Еӆпи 10-12 щёс манты мосас, ин па 3-4 щёс. Щикем ям па сора!</p><p>Иван Сандрин ханшам потар</p>

Хув ӆавӆам юш ӆэщатса

Муӊ округеван мет артан вуӆы тащат тайӆув. Хор: Надежда Моисеева

<div class="content-lead">Там ӆапатан, ихощъяӊмет хатаӆан, хон мувев ӆоватан сельской хозяйство хоща рупитты мохет емаӊ хатӆ постаты питӆув. Ямал мув суӊан, хоты аратаӆн Россия ӆоватан, вой-хуӆ па ӆэтот энмаӆты онтасан мет артан уӆапса яммаӆман уӆӆа.</div><p>Муӊ округеван мет артан вуӆы тащат тайӆув. Щи веран, тащӆув ант шимӆаматы, шоши мир хоятӆув йис уӆапса ант хурӆаты ураӊан нётопсайт постаман уӆӆат. Касӆыман яӊхты хоятат пиӆан уйтантопсайт верыӆыӆайт, инщасӆайт, муйн па нётты мосӆат. Щит шеӊк ям. Ванты ар пелак, шоши хоятӆув онтасан муӊ пасанӆуван нёхи па хуӆ кашӊ хатӆ уӆӆыйӆ. Там йис ӆэвпасӆув такӆы, хоты сахат ӆуӆан еӆӆы уӆмитсув. Няврэмӆув па хиӆыӆув там хатӆатан ищи пул порэмиӆат.</p><p>Там хатӆатан «Байдарацкой» совхоз 65-мет таӆаӆ постас. Щита рупитты хоятат вуӆы, мис па ӆов тащат энмаӆӆат. Хуӆ веӆапасӆаӆат, хоятат мис йиӊкан йинщӆтаӆат, нянь верӆат па мосты пормас тыныӆат. Округ ӆоватан ӆув атэӆ туп лэпкат энмаӆӆат. Хуӆӆаӆ па вой сохӆаӆ Тюменской область пеӆа китӆаӆӆаӆ. Николай Бабин шуӊат 1984-мет таӆан совхоз кущая питмаӆан, щита колбасат верты питсайт. Ин хонна ям ӆэвпас ӆутты ураӊан вошаӊ хоятат куртата яӊхӆат.</p><p>Ӆорвош районан уӆты «Горковской рыбозавод» мохет кашӊ таӆ планӆаӆ хуӆ веӆпасӆаман тэкаптаӆат. Ӆувиӆаӆ муӊ ант ёрэмиӆӆув па кашӊ пуш кум шиттэван щита рупитты хоятӆув эӆты ханшиӆыӆув. Ӆув онтасэӆан антом туп район, округ па аратаӆ Россия хон мув ӆоватан рыбоконсервной заводан верты хуӆаӊ ӆэвпасӆаӆ уйтман тайӆайт.</p><p>Щи тумпийн «Мужевской» совхоз тащатан яӊхты мохиӆув кашӊ таӆ артан вуӆы нёхи мийӆыӆат. Щи нёхиӆаӆ садиката, ашкуӆаята па леккар хотата тутӆыӆайт. Ӆув понты юрэӆан па щёмеӆан няврэмӆув энамӆат, мушаӊ хоятат тумтакӆат.</p><p>Там постаты емаӊ хатӆ кеша муӊ ищи мойӆапса ясаӊ китӆув. Тумтак ёш, тумтак кур, ойӊа-пищаӊа, йисаӊа-нуптаӊа!</p><p>Аллина Тоярова ханшам потар</p>

Куш ӆаварт, па мосмаӊ рупата туӆат

Pulse.Mail

Дзен Платформа

Google.News

Дзен Новости

Подпись под фото: Владимир Петрович Анатолий ун похаӆ пиӆан. Хор: Альбина Тырлина

<div class="content-lead">Сусан ар пелак хуӆ веӆпасӆаты ёх ноптаӆман па сойпиман уӆӆат. Ӆорвош хуӆ веӆпасӆаты тахаята ӆуӊтасты хоятат там порайн хоӆна вар верӆат па питель понӆат. Там лопасан потрэм Владимир Петрович Сюртахов эӆты туӆэм.</div><p>Унтсыӆкуртан энмас па рупитас</p><p>Унтсыӆкуртан туп хуӆам хуӆ веӆпасӆаты хоят хасяс. Владимир Петрович няӆъяӊ моӆтас таӆ сита хуӆ веӆман ус. Ин пенсияйн уӆ, туп исипа хуӆ мосятты яӊхаӆ. Рупатайӆ эӆты ситы ястас: «Ин ма Ӆорвошан уӆӆам. Унтсыӆкуртан энампсам. Рутӆам хоӆ куртэван лоттаман уӆӆат. Ин апщеӊаӆам — Герман па Аркаша сита хасьсаӊан. Герман рыбака ӆуӊтасаӆ. Ас питаран хот тайӆам, аӊкем-асем сита усӊан, ма сита хуӆ веӆман уӆӆам. Семьяеван вет няврэм энмас. Яртъяӊ таӆ эӆты асема-аӊкема нётты питсам.</p><p>1977-1979-мет таӆӊанан Казахстан муван армияйн военной строителя усам, ударника ӆуӊтассам. «Ударник коммунистического труда» меваӆ посан юкантсайм.</p><p>Армия эӆты ёхатмем юпийн, мохты хуӆ веӆпасӆаты питсам, хутъяӊ таӆ унты рупитсам. Ин хоӆна хуӆ веӆты яӊхӆам, туп шимаӆшак. Хун верытӆам манӆам, тухаӆ порайн ант яӊхиӆыӆам. Таӆ-ӆуӊ иса хуӆ мосятман уӆӆам. Сусан ин ар пелак ноптаӆӆам. Таӆан, катра пора сирн, хуӆӆув мосятыӆыӆув. Каӆнаӊ лепан, пун, питель понӆув».</p><div class="content-new-image"><img alt="pic" src="https://storage.yandexcloud.net/ym-sites-static/0bb50811-b04.webp" style="width:100%" height="795" width="1413"/><div class="content-image_child">Унтсыӆкурт. Хор: Альбина Тырлина</div></div><p>Хоттэӆ хоятӆаӆ</p><p>Владимир Петрович ийимеӆ Ирина Ивановна Тарымова. Уӆман сыс иса яха хуӆ веӆпасӆысӊан. Пенсияя манман порайн, 2020-мет таӆатан «Ветеран ЯНАО» нэман юкантсайӊан. Ишакты нэпекатан кашӊ ӆуӊ мийӆысайӊан. 2020-мет таӆ унты кашӊ таӆ планэӆ тэкаптысэӆ.</p><p>Ханты хоятэв катра хуӆ веӆпасӆаты уӆапсайӆ нумаӆмийс: «Ийимем Катравош эӆты. Сита уйтантысман. Си порайн муӊ энамты, каркам няврэмат, мотура ӆэӆапсув па манапсув. Кашӊ ӆуӊ Ӆорвош курт эӆты хуӆ веӆпасӆаты ёх Наӊк ям посӆа па Халэв пухра ноптаӆты пана китыӆысаюв. Си порайн, туп ӆуӊтасты панан ноптаӆты верытсан, па тахаята ант эсӆысайн. Туп Унтсыӆкурт эӆты яӊкем хоп Катравош пеӆа яӊхас.</p><p>Хуӆ ар ус. Планӆув тэкаптысув. Йи пуш ёваӆмиман, хуӆамсот киӆа хуӆ хойӆыйс, хопен тэӆаӊ. Тыӆась сыс яӊ-ветхосьяӊ тонна пишьян мийӆысув. Хуӆӆув ураӊан сохаптаты охатан «Вихрь» мотур ӆутты рахас. Яма рупитӆан, тыӆась сыс кат, хуӆам сёрасан сохаптаӆайн. Си порайн сит шеӊк ям охат усат. Аршак хуӆ уӆман, яма рупитӆан, таӆ сыс сютсиӆан. Тохеӆ ант па вантӆан. Си порайн хоӆна няши (уды) поныӆысув.</p><p>Ийимем пиӆан хуӆам няврэм энмаӆсаман. Уншак отӆув пиӆаӊӊан. Евгений ай похев ин СВО хося лялясаӆ. Контракт ханшӆтас, няӆмет таӆа йис, хоты сита уӆ».</p><div class="content-new-image"><img alt="pic" src="https://storage.yandexcloud.net/ym-sites-static/5efc735a-d7b.webp" style="width:100%" height="1107" width="1969"/><div class="content-image_child">Сусан ин ар пелак ноптаӆӆам. Каӆнаӊ лепан, пун, питель понӆув Хор: Альбина Тырлина</div></div><p>Ӆуӊ сыс хуӆ веӆман уӆ</p><p>Владимир Петрович пиӆан потрэмиман, Анатолий ун похаӆ ликмас. Ӆув па ӆуӊ сыс хуӆ мосятман уӆ. Си вер эӆты ситы ястас: «Ма Ӆорвош ашкуӆайн катхосьяӊмет таӆ рупитӆам, инженера уӆӆам. Там йис модифицированной ашкуӆайт, антом катра сиран. Тут, хошам, вентиляция иса вантман тайты мосаӆ. Ӆуӊан договор хуват хуӆ веӆман уӆӆам.</p><p>Ма няврэм физкультурая утаӆтаты хоята Пулӊават вошан утаӆтысам. Сэмӆам вевтамат, леккаратан ант эсаӆсайм, сишан пуӊӆа мантсам. Социальной педагогика специальность хуват етшаптасам. Ма Татьяна опем пиӆан пиӆаӊӊан. Ӆув па ай няврэмат утаӆтыты нэӊа етшаптас. Куртаӊ ай няврэмат хатӆ сыс шавиты хотан воспитателя рупитаӆ.</p><p>Рупатая стаж ант тайман, нэмоӆты тахая ант вуйӆысайм. Канась пухаӆан музейн кат таӆкем экскурсовода рупитсам. Сяӆта ёхи йисам. Хуӆамӆэм таӆ хуӆ веӆман усам.</p><p>Ай уӆмем порайн хоӆна ун асем пиӆан хоӆап вантты яӊхсам. Там йисан хуӆ шимаӆ. Бензин норма хуват маӆа. Хуӆ веӆпасӆаты ёх яӊхты юшаӆ хув. Ӆуӊан рув порайн, хоӆап каматса пуш вантты мосаӆ. Сохаптаты охаӆ шимаӆ. Муй арат хасям яӊ таӆан хуӆаӆ маты тынаӆ ус, там хатаӆан си аратан иси хасяс».</p><p>Хуӆ веӆпасӆаты шеӊк ӆаварт. Энамты ёх симась ӆаварт рупатая ант кашасьӆат манты. Сохаптаты охаӆ па шимаӆ. Сикуш ун кусяйт веӆпасӆаты ёх пиӆан уйтантыӆат, потрэмиӆат. Кашӊ таӆ яӆап нётапсайт ӆэсятӆат, мосаӊ моӆты порайн рупитты ёх сохаптаты па хуӆӆаӆ маты охеӆ эӆатӆайт, уӆапсаеӆ кенашак па ямашак манты питаӆ.</p><div class="content-new-image"><img alt="pic" src="https://storage.yandexcloud.net/ym-sites-static/8a75a032-aac.webp" style="width:100%" height="1108" width="1969"/><div class="content-image_child">Хуӆ ар ус. Планӆув тэкаптысув. Хор: Альбина Тырлина</div></div><p>Альбина Тырлина ханшам потар</p>

Няӆъяӊ моӆтас таӆ хуӆ веӆпасӆыйӆ

Ӆув пеӆаеӆ вантман, Анжелика эвиеӆ ищи утаӆтыты нэӊа ашкуӆайн рупитты питас. Ин па Юлия хиӆыеӆ антимеӆ юш нюхаӆаӆ. Хор: Анжелика Смирнова архив эӆты

<div class="content-lead">Аратаӆ мир ӆоватан па Россия хон мувеван ай тахайт потты тыӆащ 5-мет хатаӆан няврэмат утаӆтаты хоятат емаӊ хатӆ постаӆат. Шоши хоятӆув эӆты ар ошаӊ утаӆтаты ёх рупитсат па рупитӆат. Щи кутан Вера Макаровна Нензелова. Ӆув ветъяӊ пеӆа вет таӆ няврэмат пиӆан самаӊа рупитас па ӆувиӆаӆ ошаӊа энмаӆтас.</div><p>Эвет па похат туӊа-щира энмаӆты ураӊан ар юр понты мосаӆ. Няврэмат утаӆтаты па уӆты хотатан, ашкуӆа-интернататан хоӆна аршак юр па так ям номас тайты. Кашӊ няврэм кеша ям ясаӊ уйтты па пойкман потарты. Няврэмат пиӆан щимащ хоятат уӆӆат па рупитӆат.</p><p>Ӆув кутэӆан Вера Макаровна Нензелова. Ветъяӊ пеӆа вет таӆ няврэмат пиӆан самаӊа рупитас. Вет таӆ хащаман ӆув щутщаты этас, рупата эӆты нох воӆыйс. Туняӆ, ван хатӆап тыӆащ 8-мет хатаӆн юбилей 70 таӆ постас.</p><div class="content-new-image"><img alt="pic" src="https://storage.yandexcloud.net/ym-sites-static/bd89e0fc-817.webp" style="width:100%" height="1440" width="2560"/><div class="content-image_child">Ӆув ветъяӊ пеӆа вет таӆ няврэмат пиӆан самаӊа рупитас па ӆувиӆаӆ ошаӊа энмаӆтас. Хор: Анжелика Смирнова архив эӆты</div></div><p>– Шеӊк самаӊ, ошаӊ, ям номпсаӊ нэӊие, — ӆув пиӆэӆн рупитам хоятат ястаӆат. — Рупитмаӆ хуват няврэматан яма нумӆа, ям ясӊат ӆув эӆтэӆ потарӆат. Кашӊ хоят пеӆа ӆув ям. Лик ант туӆ. Щимащ утаӆтаты нэӊат няврэматан самаӊа тайӆайт.</p><p>Макар Григорьевич па Агафья Архиповна Куртямовӊан хоттэӆ хоща, Ямкуртан 1955-мет таӆн Вера сэма питас. 1972-мет таӆн Овкуртаӊ ашкуӆа-интернатан нийӆ класс утаӆтыты етшаптас. Щи юпийн, мохты Пулӊаватан уӆты А.И. Зверев нэмпи педагогической училище хоща манас па 1976-мет таӆн утаӆтыты етшас.</p><p>– Утаӆтаты нэӊа йиты ма айтэӆан номас версам, — Вера Макаровна ястаӆ. — Няврэма уӆмем порайн ӆухасӆам пиӆан ёнтмеман, иса утаӆтаты нэӊа верасысам. Таӊха номпсэм так уӆмаӆ, щишан ӆувеӆ паты унты тусэм.</p><p>Рупата пеӆа утаӆтыты етшамаӆан Асов курта китам. Щита кат тыӆащ рупитмаӆ. Щаӆта еӆӆы Красноселькупской район Толька нэмпи вошан утаӆтаты па пионервожатой нэӊа рупитас. Щита уӆман па рупитман, самаӆан шеӊк ёхи, ӆув Ӆорвош районаӆа вуратас. Щишан, щи номасан, ӆув Ващъёханова китса. Щи куртан Владимир Николаевич Нензелов пиӆан уйтантыяс па поры версаӊан. Щита 1978-мет таӆ сус унты рупитсаӊан па Овкурта касаӆсаӊан. Щаня ёхан муван ӆын щутщаты мантан унты рупитсаӊан. Няӆ няврэм энмаӆсаӊан, ин па хиӆыӆаӆ энмаӆты нётаӆ.</p><p>Ӆув пеӆаеӆ вантман, Анжелика эвиеӆ ищи утаӆтыты нэӊа ашкуӆайн рупитты питас. Ин па Юлия хиӆыеӆ антимеӆ юш нюхаӆаӆ. Ӆув ищи Овкуртаӊ ашкуӆайн няврэмат пиӆан рупитаӆ. Щишан Вера Макаровна номпсаӆ ям! Ӆув пеӆаеӆ ястаӆув тумтака уӆты па шук ант вантты!</p><p>Иван Сандрин ханшам потар</p>

Няврэмат пеӆа самаӊ нэ

Уйтантопсая ёхтыӆыйм хоятат тынщаӊ сэвты утаӆтасайт.  Хор: Елена Федотова китас

<div class="content-lead">Хащам ӆуӊ эӆты, Югра муван «Вуӆы сох эӆты пормасат ёнтӆам» нэмпи ун проект верты питса. Там рупата Ёмвош округ куща митаӆыйм грант нётапса ох хуват ӆэщатса. Там ванан щита мет оӆаӊ верантты хар манас.</div><p>Оӆаӊ пуш верам уйтантопсая ёхтам хоятата потартса па альса, муй щиран вуӆы сох эӆты тынщаӊ тыйӆ. Хоты арсыр вуӆы сох пиӆан рупитты мосаӆ. Муй щиран ӆув ӆэпта верӆа. Хоты сахат щиӆта нюки тыйӆ. Хотащ ӆувеӆ кеӆ щира сэвты мосаӆ.</p><p>«Ма ай тэӆан вуӆы хотан энампсам. Вантсам, муй щиран ащем вуӆы лак кеӆат ӆэщатас, тынщаӊ сэвас. Юхат, уна ювмем порайн, Овс мув шимӆаӊ рут мир касапсаятан кассам. Касапса ураӊан тынщаӊ па касты ӆайм мосас. Кашӊ пох, ӆувеӆ мосты пормас ӆув верас. Муй ант тыйс, ащиӆув эӆты инщассув, кутӆуван вантман утаӆтысув.</p><p>Там проекта тынщаӊ сэвты няврэмат утаӆтаты вохмеман, мохты кашащсам. Ванта, йи пуш верантты утӆам щир па хун ёрэмаӆа. Шеӊк ям, хун энамты няврэмат тамащ рупата верты утаӆтыты вуратӆат. Шоши мувеван тамащ вер па мосмаӊа тайӆа», — Касам муван уӆты ху Юрий Тарлин ястас.</p><p>Тамащ уйтантопсайт вертыйн, айӆат ёх, ашкуӆайн утаӆтыты няврэмат, мойӊ хоятат ӆув сэмӆаӆан вантам, ӆув ёшӆаӆан сэвам рупатаеӆ нумман еӆӆы туӆэӆ. Хошты хоятан алям вер хув номпса хащаӆ.</p><p>Зоя Куртямова ханшам потар</p>

Тынщаӊ сэвты вер

Щи тумпийн таӆӆаӆ ара ювам хоятат питӆат вантты, хоты сахат йис уӆапса шавиты щиран рупата манаӆ. Хор: dumahmao.ru

<div class="content-lead">Хащам ӆапатан Ёмвошан Овс мув шимӆаӊ мир таӆӆаӆ ара ювам хоятат мет оӆаӊ съезда актащисат. Куртат па вошат эӆты 60 делегат ус. Ӆув хоӆ общественной организацияята, каш верты харата ӆоӊман уӆӆат, щи тумпийн энамты няврэмат па усат.</div><p>Оӆаӊ хатаӆан потар манас, хоты там йис порайн рут ясаӊ шавиты мосаӆ. Щи веран аратаӆ миран уятты па ванты ураӊан, цифровизация мохты еӆӆы туты мосаӆ. Кат округ мохты там хатӆатан щи рупата туп шеӊк самӆаӆ хошиты хоятат туӆат. Ӆув онтасэӆан муӊ кушкепа моӆты вантыӆув па хуӆантыӆув.</p><p>Югра муван шоши хоятат ӆыӆ сайӆаты щиран рупитты уполномоченной щиран уӆты нэ Людмила Алфёрова каматса ясаӊ там уйтантопса эӆты ястас: «Муӊ кашӊ пуш яӆап законопроектат ханшӆув, шоши мирӆув уӆапсая ӆоӊаӆӆув. Муй хорпи нётопсайт верты, муӊ иса таӆӆаӆ ара ювам хоятат пиӆан потартыӆув. Щиты муй па па щиран верты мосаӆ. Шеӊк ям, хун муӊ Совет старейшин тайӆув. Ин ӆув окружной статус тайты питас. Кашӊ курт па вош эӆты муӊ щий делегатат пирысув. Тамащ ун вер онтасан муӊ рупатаев кентат манты питаӆ».</p><div class="content-new-image"><img alt="pic" src="https://storage.yandexcloud.net/ym-sites-static/6caaa729-314.webp" style="width:100%" height="576" width="1024"/><div class="content-image_child">Югра Дума куща ӆаӊкар ху Еремей Айпин хоятат уӆапса кентатты ураӊан ар юр па щём понаӆ. Хор: dumahmao.ru</div></div><p>Щи тумпийн таӆӆаӆ ара ювам хоятат питӆат вантты, хоты сахат йис уӆапса шавиты щиран рупата манаӆ. Ясаӊ ант хурӆаты веран, каш харатан рупитты мохет муй онтас Овс мув шимӆаӊ мир вер еӆӆы туты ураӊан ищи верӆат. Щаӆта па ун хоятата энамты няврэмат пиӆан па атэӆ рупата туты мосаӆ. Ӆувиӆаӆ шоши мир уӆапсая хущты. Этнолагерят шеӊк мосмаӊа вертыя. Похла актащман рупата кеншака манты питаӆ.</p><p>Там уйтантопса хоты кущайӆув такӆы манаӆ. Щи веран щита рахас Югра Дума куща ӆаӊкар ху Еремей Айпин кащаӆаты. Ӆув там рупата тувман ар онтас шоши мир хоятӆува туӆ. Ӆув мохтэӆ иса аратаӆ законат манӆат. Аӆ хоятат уӆапса кентатты ураӊан ар юр па щём понаӆ.</p><p>«Там уйтантопса ёхтам хоятӆама мойӆапса ясаӊ китӆам. Нын онтасанан там хатӆатан муӊ шоши мирӆув хонна йис уӆапса тувман уӆӆат. Тампуш Россия Президент Владимир Путин единства Таӆа постасӆы. Щи веран муӊ па таканшак кутӆуван катӆасты питсув. Таӆӆаӆ ара ювам хоятӆув ияха акатсаӆӆув. Ун пумащипа вутщиӆам ястаты кашӊ хоята, ванты хоӆ муӊ пирасты харата яӊхсув, ямшак уӆапса муӊева пирысув. Шеӊк ӆаӊхаӆайм, ӆуӆан кашӊ районан Совет старейшин рупитас. Щи веран кашӊ куртан общественной деятельность щиран верат ямашак манты питӆат», — Еремей Айпин ястас.</p><p>Тамащ уйтантопса мохты кашӊ хоят ӆув нумасты питаӆ, ӆув ун онтас туӆ па еӆӆы туты верытаӆ. Щишан муӊева хоӆ ияха катӆасты мосаӆ. Муӊ верты рупатев эӆты муӊ няврэмӆув па хиӆыӆув уӆапса еӆӆы ӆойӆ.</p><p>Аллина Тоярова ханшам потар</p>

Таӆӆаӆ ара ювам ёх уйтантысат

Геннадий Николаевич Салтыков Асов куртан уӆ. Хор: Геннадий Салтыков

<div class="content-lead">Мосванан Мужи воша яӊхсам. Щита аратаӆ Ӆорвош район мохет «Живые традиции» нэмпи каш па тынасты хара актащисат. Хоятат кутан Геннадий Николаевич Салтыков кащаӆасэм. Муӊ, аратаӆ ханты мир, ӆувеӆ хув тэӆан уйтӆэв.</div><p>Геннадий Николаевич там уйтантопсайн верыӆыты пормасӆаӆ тынасты хара ант тутӆысӆы. Хоты ӆув ястаӆ, хащам ятан хоят моӆты партыӆыйӆ ки верты, щи порайн туп вераӆ.</p><p>Каматса ясаӊ ястас, хоты ӆув ин уӆ:</p><p>– Ма ин, ийимем пиӆан, Асов куртан уӆӆам. Хащам ятан ай пасанат верӆам. Ванты, хоятат вохӆат. Ай уӆасат вет щёрасан тыныӆӆам, ай пасанат па, тынаӆ хорасаӆ па хораптам вераӆ эӆты ӆойӆ. Ар пелакан 20-25 щёрса хойӆат. Ун пасанат ищи кеман тыныӆӆам. Тынаӆ кашӊ пуш ӆутасты хоятэм пиӆан потарӆэман, артаӆаӆэман.</p><p>Сопаса ма ищи кашӊ пуш верыӆыӆам. Матты хоята мосты порайн — иса тащ. Ай пасан тайӆам, хоӆта пасан сурыя рахаӆ омасты па шахматна ёнтты.</p><div class="content-new-image"><img alt="pic" src="https://storage.yandexcloud.net/ym-sites-static/a1f9b8e6-7c8.webp" style="width:100%" height="809" width="1440"/><div class="content-image_child">Мозаика щиран версэм, хорам ураӊан. Хор: Геннадий Салтыков</div></div><p>– Муй юх эӆты пормасӆан верыӆыӆӆан?</p><p>– Ар пелак хуӆ юх эӆты верӆаӆӆам. Туӊа-щира ӆэщатӆаӆӆам, оляпан нёсытӆаӆӆам. Люм юх эӆты ищи верӆам. Тухаӆ ишан ун юхата питыӆыӆам. Щи порайн турамсот пормас верты рахаӆ. Сортаӆ юпийн кев хорпия така йиӆ. Катра порайн ухӆат люм юх эӆты верыӆысайт, катна ант халэматэӆ ураӊан. Щаӆта па ант ӆыйӆ, поӆта ант йиӆ. Туняӆ ма йи пасан хольмаӊ щёрасан тынысэм. Мозаика щиран версэм, хорам ураӊан.</p><p>– Мозаика муй юхат эӆты верман уса?</p><p>– Аратаӆ уӆты юхат эӆты: люм юх, хуӆ юх, нохар юх, хоп юх. Хоӆ ияха верман уӆӆат. Хоп юх нови, па щишан шеӊк хорамаӊа вантасаӆ. Туп ма еша ӆувеӆ тутна вущитысэм тухаӆ тахаятан, питыяшак йитаӆ ураӊан.</p><p>– Хоӆща хоятат наӊ верам пормасӆан ӆутты ӆаӊхаӆайт? Район, округ эӆты муй па па тахет эӆты ищи ясаӊ китыӆыӆат?</p><p>– Мет шопаӊ куртаӊ хоятӆам, щаӆта Ӆорвош район куртаӊ хоятат, па мув суӊат эӆты ищи вохӆат моӆты пасан муй уӆас верты. Мозаика вермем порайн, кат тыӆащ манас. Айм щи арат манас, хонна ант ӆуӊатсэм.</p><div class="content-new-image"><img alt="pic" src="https://storage.yandexcloud.net/ym-sites-static/0b0aec54-a2a.webp" style="width:100%" height="810" width="1440"/><div class="content-image_child">Туӊа-щира ӆэщатӆаӆӆам, оляпан нёсытӆаӆӆам. Хор: Геннадий Салтыков</div></div><p>– Муй хорпи аяман наӊ рупатайӆан аймпӆаӆӆан?</p><p>– Ма иса ПВА нэман ӆутыӆыӆам. Ин там йисан ям, иса ӆапкайн ӆутты рахаӆ. Ӆув ищи ар хорпет уӆлиӆат. Тухӆат йиӊк хорпет, ма еша сорамшак ӆутыӆыӆам. Щи порайн шеӊк яма ханаӆ. Шеӊк щел от ант ӆутыӆыӆам. Ванты, нёсытӆэн па шеӊк ӆыпия манаӆ па воӆаӊ яха ант ханаӆтаӆ. Щаӆта лакки куламтаӆ. Щишан сорамшак отан аямпӆам. Ӆув рувтам ӆант хорпи.</p><p>Ин ешауӆ йи пасан па вуты вер уӆӆа. Кущайӆ Мужи вош эӆты ӆаваӆӆэм. Уйтты хоятэм па щишан, ветхощъяӊ щёрасан тыныӆэм. Йи ай уӆас Ӆапатнаӊка китсэм. Ай няврэм ураӊан верты вохиӆыса. Карты юш хуват манмев порайн поездан йи нэ пиӆан потарсув па ӆув ястаӆ: «Хуӆӆысэм, нын хощайн верантты ху уӆ. Ант уйтӆаӆӆан? Хой верытаӆ ай няврэм ураӊан уӆас верты». Ма ястасам, мосаӆ ки — верӆэм. Щит, таӊха, ма.</p><div class="content-new-image"><img alt="pic" src="https://storage.yandexcloud.net/ym-sites-static/1d5a8208-7b3.webp" style="width:100%" height="809" width="1440"/><div class="content-image_child">Аратаӆ уӆты юхат эӆты вератӆам: люм юх, хуӆ юх, нохар юх, хоп юх Хор: Геннадий Салтыков</div></div><p>Иса альсаӆӆы, нэпекан щуратсаӆӆы, хоты мосаӆ верты. Па ма щи ястам щиран иса версэм. Вермем юпийн мохты ӆутсаӆӆы.</p><p>– Геннадий Николаевич, пумащипа наӊен верам айкеӆэн ураӊан! Еӆӆы ищиты рупатаен ат манаӆ. Аршак хоят наӊ верам пасан сурэтан ат ӆавантыӆат, ям уӆасатан ат омпсыӆыӆат. Тумтак ёш, тумтак кур!</p><p>Аллина Тоярова ханшам потар</p>

Верантты тус ху

Ӆуӊ порайн Горковской рыбозаводан няӆъяӊ пеӆа ӆапат хуӆ веӆпасӆаты тахайн рыбакат рупитсат. Хор: Альбина Тырлина

<div class="content-lead">Ешауӆ ӆуӊ веӆпасӆаты пора си етшаӆ, хасям хатӆат хасьсат. Хуӆ веӆпасӆаты хоятат ӆуӊ сыс мет апраӊа рупитсат, хошам хатӆат па хуӆ манты пуляӊ хуӆӆаӆ масат.</div><p>Ӆуӊ порайн Горковской рыбозаводан няӆъяӊ пеӆа ӆапат хуӆ веӆпасӆаты тахайн рыбакат рупитсат. Си тумпийн ӆув сирэӆан хуӆ мосятты хоятат ӆуӊан па вуйӆысайт. Там таӆан план хуват йи сёрс тонна хуӆ маты мосаӆ. Сит эӆты 847 тонна питы хуӆ.</p><p>Ин суса йис. Ар пелак ёх планӆаӆ соханты ванамасат. Хасям сютсяты хатӆатан Ӆорвош рыбоучастка ӆуӊтасты хуӆ мосятты хоятат хося Унтсыӆкурта па Ай Сухаӊ Аса тутӆысайм. Ар пелак ёх хоӆ мосты арат хуӆ масат. Хойтат план тэкапты унты хуӆӆаӆ ант тарамӆайт, кашӊ хатӆ хуӆ мосятты яӊхӆат. Сус порайн ӆув ноптаӆман, сойпиман, вар омасман па петель понман уӆӆат.</p><p>«Ӆорвош рыбоучасткан штат хуват хольмаӊ пеӆа хут хоят рупитаӆ. Нийӆ хоят ӆуӊ сыс хуӆ мийӆысат. Хуӆ веӆпасӆаты хоятата таӆ сыс квота хуват 519 тонна 810 кила хуӆ мосятты мосаӆ. Там хатӆа 187 тонна 738 кила нови па питы хуӆ мийман уӆ. Таӆ етшаты унты хоӆна сот моӆтас тонна хуӆ веӆпасӆаты хасяс.</p><p>Ар пелак хоятӆув планэӆ хоӆ тэкаптасэӆ. Таӆ сыс йи хоята хуӆамхосьяӊ тонна веӆпасӆаты мосаӆ. Тыӆась сыс — 1 300 кила. Кат план хуват хуӆ маты хоятат па уӆӆат. Рупитты хоятӆама пумасипа ясаӊ ястаӆам. Тумтак ёш, тумтак кур!», — Ӆорвош рыбоучасток куся ху Андрей Кондыгин ясаӊ верас.</p><p>Альбина Тырлина ханшам потар</p>

Хуӆ веӆпасӆаты пора хасям хатӆат

Мария Павловна Самсонова группаяӆа яӊхты няврэмӆаӆ пиӆан каман ёнтаӆ. Хор: Альбина Тырлина

<div class="content-lead">Там сютсяты хатӆатан ай няврэмат шавиты хотатан па интернататан воспитателя рупитты хоятат емаӊ хатӆэӆ постаӆат. Там лопасан няврэмиет пиӆан веӆси рупитты питсям эви эӆты потрэм туӆэм. Сит — Мария Павловна Самсонова (Пырысева).</div><p>Мужи куртан энмас</p><p>Кимет таӆ Пулӊават вошан «Мувхор» нэмпи садикан щущиет пиӆан Мария Павловна Самсонова (Пырысева) рупитаӆ. Уӆапсайӆ эӆты тамиты ястас: «Ма Мужи вошан энампсам, сита утаӆтысам. Семьяеван няӆ няврэм уӆ. Ма мет ун. Кат ёх апси па йи эви апси тайӆам. Ашкуӆайн утаӆтымем порайн, «Хатӆ най» группая арыты яӊхсам. Колледжан па якты группайн яксам.</p><p>Аӊкем па аӊкаӊкем Асов курт эӆты. Аӊкаӊкем шуӊат — Любовь Прокопьевна Тогачева. Аӊкем — Надежда Валерьевна Самсонова (Тогачева).</p><p>Яртъяӊ класс етшамем юпийн, Пулӊават вош Ямальской многопрофильной колледжа утаӆтыты мантсам. Ай няврэмат утаӆтаты нэӊа етшаптасам. Вошан уӆты хасьсам. Аӊкем, апсиӆам па Пулӊаватан уӆӆат».</p><div class="content-new-image"><img alt="pic" src="https://storage.yandexcloud.net/ym-sites-static/74eff614-403.webp" style="width:100%" height="397" width="707"/><div class="content-image_child">Ма рупатаем — ияха, ӆухсаӊа ат энампсат, ёнтсат. Хор: Мария Самсонова</div></div><p>Таӆа йис, хоты рупитты питас</p><p>Щёхар тыӆасян таӆа йис, хоты ханты эвиев «Мувхор» няврэмат шавиты хотан рупитаӆ. Рупитты питсям порайӆ эӆты симась потар тус: «Ашкуӆайн рупата ант уйтсам, садика рупитты мантсам. Ай уӆмем порайн, иса утаӆтаты нэӊа уӆты ӆаӊхасайм. Апсиӆам кашӊ порайн иӆ омпсыӆысӆам па утаӆтасӆам: ханшты нэпекан мийӆысӆам, иса моӆты ханшсув, ӆуӊатсув, сюрытсув, оценкайн поныӆысӆам. Иса нумассам, няврэмат такан тайты питӆаӆӆам.</p><p>Туп па сирн этас. Ин ма ай няврэмат пиӆан рупитӆам. Мосаӊ ситы ямшак. Ашкуӆайн уншак няврэмат утаӆтаты мосаӆ. Сита па ӆаварт рупитты. Ин симась пора — няврэмат хусаӊат, ун хоята ант хуӆантӆат, ёхӆы хесьӆат. Ма нумастэман, туп хой шеӊк самаӊа няврэмат пиӆан рупитты ӆытӆа па рупатайӆ самаӊа тайӆаӆӆы, симась хоятат туп ай па ун няврэмат пиӆан рупитты верытӆат.</p><p>Ин группаема кат таӆ эӆты няӆ таӆ унты хольмаӊ пеӆа кат няврэм яӊхаӆ. Кашӊ хатӆ план хуват занятияйт маӆам, ким яӊхӆув. Таӆ сыс ма утся рупитсам. Там мосванан пиӆнэӊан понтсайм. Ин щущииӆам уншака йисат, ӆэты, ӆуматӆыты хошӆат.</p><p>Оӆаӊ порайн шеӊк ӆаварт рупитты ус. Иса нумассам, хоты кашӊ няврэм пиӆан рупатаем туты, аӊкиӆаӆ-асиӆаӆ пиӆан ясаӊ уятты. Пора хасяс, няврэмиет ма хосяем утӆапсат.</p><p>Кашӊ ай няврэмие ӆув уӆты хоттэӆаӆ, ӆув мираӆ эӆты ёхатаӆ. Ма рупатаем — ияха, ӆухсаӊа ат энампсат, ёнтсат. Ма асиӆаӆа-аӊкиӆаӆа потарӆам, нын няврэмӆын манэма шавиты масӆын. Ӆувиӆаӆа тата яма уӆты ураӊан, ма иса мосты сирн рупатаем туӆэм. Хун ӆув вантӆат, хоты ма нумман тайӆэм, муй хорпи ёнттот ӆув няврэмаӆ самаӊа тайӆаӆӆы, эвеӆ муй хорпи сэван охсохӆаӆ сэвты мосаӆ. Си порайн ӆув няврэмӆаӆ эӆты ант хурыӆат, пошхииӆаӆ пиӆан рупитты хоятэӆ ванан тайӆэӆ, пиӆтасяӊа уӆӆат.</p><p>Таӆ сыс няврэмӆам хося шеӊк хошисам. Сикуш ин ай щущиет пиӆан рупитӆам, туп еӆӆы русь ясаӊ па литература маты нэӊа утаӆтыты номас тайӆам. Ашкуӆайн шеӊк самаӊа си предметӊан тайсаӆӆам, шеӊк ям утаӆтыты хоятан утаӆтасайм».</p><p>Муӊ па, кашӊ няврэмат шавиман тайты хоятата мойӆапса ясаӊ китӆув. Нын воӆаӊ рупата верӆаты! Тумтака, ойӊа уӆаты!</p><p>Альбина Тырлина ханшам потар</p>

Щущиет пиӆан рупитты энамты эви

Хасям сютсяты хатаӆан Ӆорвошаӊ ёх яха ёхтыӆысат, 325-мет таӆа ювам куртэӆ емаӊ хатӆ постасат. Хор: moy_shur

<div class="content-lead">Кашӊ таӆ округев хуват щёхар тыӆащан вошат па куртат емаӊ хатӆат постаӆат. Мойӊ па вошаӊ хоятат яха уйтантыӆат, порыӆыӆат, каш вантӆат, тынасты, касты па верантты харата пиӆтасьӆат.</div><p>Хасям сютсяты хатаӆан Ӆорвошаӊ ёх яха ёхтыӆысат, 325-мет таӆа ювам куртэӆ емаӊ хатӆ постасат. Аӆаӊсахат Пулӊават па Мужи эӆты мойӊ хоятат ёхатсат. Хоӆ яха хорамаӊа, ольпаӊа ӆэсятам харан уйтантысат.</p><div class="content-new-image"><img alt="pic" src="https://storage.yandexcloud.net/ym-sites-static/b9081c30-2c5.webp" style="width:100%" height="653" width="1161"/><div class="content-image_child">Там емаӊ хатӆ кеша тасяӊ тынасты хар ӆарпитсат. Хор: Татьяна Салтыкова</div></div><p>Ӆорвош район куся Олег Попов, район Думая ӆуӊтасты хоят Александр Худалей па Ӆорвош утхот куся нэ Мария Истомина куртаӊ хоятата мойӆапса ясаӊ ястасат, хоятат мойӆаптасат. Си юпийн ольпаӊ, сыйӊ каш вантсат, ӆэсятам арат хуӆантсат, якат вантсат. Яха арэмисат па якан карэмисат.</p><p>Ӆорвош куртан шеӊк тусаӊ, каркам нэӊиет уӆӆат. Там емаӊ хатӆ кеша тасяӊ тынасты хар ӆарпитсат: ар хорпи хуӆаӊ, саккараӊ нянят шарытсат, энмаӆтам сюрнет, арсыр хуӆ, мисъйиӊк эӆты верам па хошапата ӆэсятам ӆэтотат тынысат. Тус ёшаӊ нэӊиет ёнтам, сэвам, сак эӆты картам пормасат этаӆтысат. Йи кураман иса ӆутапсайт, нэмоӆты ант хасяс.</p><p>Няврэмат ёнтты харатан ёнтсат, мастер-классан соӆаӊ ӆант эӆты хатӆые ханаӆтсат. Уӆапсаев тащаӊ па мортаӊ ат ус. Хор верты тахайн кашӊ хоят хоттэӆ хоятӆаӆ пиӆан хорам хорат версат.</p><p>Альбина Тырлина ханшам потар</p>

Еӆӆы уӆа, куртые!

Ван кутн Людмила Николаевна Костина шияӆаӆам. Хор: Людмила Шульгина

<div class="content-lead">Арсыр верата утаӆтаты харатн, ван кутн Людмила Николаевна Костина шияӆаӆам. Щиты, там ванан, Ёмвошн «Югра-Экспо» нэмпи вантапсэт ӆэщатты хотн ӆув пиӆэӆн уйтантысам. Еша потрэмисман па ма ӆувеӆ ӆув уӆапсайӆ эӆты еша инщассэм.</div><p>Ӆув ащеӆ-антеӆ эӆты потраӆ оӆӊитсаӆы:</p><p>– Ащем Николай Андреевич Ромбандеев 1926-мет таӆн Хошлог куртан сэма питас, щаӆта Сосьва (Ӆэв) куртан ус. Ӆаварт ляль порайн Ӆэв ёхан эӆты нови хуӆ веӆты кеша Аса китса. Касам курт эӆты хуӆ веӆты ёх Игрим курта китсайт, щита ӆыв сэм хуӆ веӆпасӆасат. Антем Дарья Ивановна Вандымова, ӆув — ханты ими, уйт ӆор тыӆащ 1-мет хатаӆан 1928-мет таӆн Касам куртан сэма питас. Щиты айӆат катӊан Николай Андреевич Ромбандеев па Дарья Ивановна Вандымова Суматвошн уйтаӊа йисӊан. Анеева куртан яха ханшӆтантысӊан па мой версаӊан.</p><p>Суматвошн ащем унт вантты вера утаӆтыйс, щаӆта Юильска (Вутвоша) рупитты китса. Антем уӆапсэӆ хуват хуӆ веӆпасӆас. Щита Светлана опем па ма сэма питсаман.</p><p>Людмила Николаевна еӆӆы потартас, хоты ащеӆ мушитты питас, щишн ӆыв щемьяеӆ Касам курта касӆас. Щита Раиса апщеӆ сэма питас. Юхат Ромбандееват Поӆнават курта уӆты мантсат, ванты, щаӆта кеншак тутаӊ хопн Суматвоша яӊхты ус. Ащеӆ мушитас, ӆувеӆа ван кутн Суматвош район леккар хота яӊхты мосас.</p><p>Ёӆн, ӆыв кутэӆн кат ясаӊан потарсат, щи вер эӆты Людмила Николаевна щиты нумӆаӆы:</p><p>– Ащем — охаль ху, туп ханты ясаӊ ищи яма уйтас, антем — ханты ими, ищи айӆтыена охаль ясаӊ утаӆтас. Йи тухаӆ ишн, антеман ляваттаӆайм ки, ма ӆувеӆ ёхӆы ястаӆам: «Я, щи, ма наӊ ханты ясӊенан потарты ант питӆам, ма ащем ясаӊан потарты питӆам». Щаӆта ащеман ляваттаӆайм ки, ма ӆувеӆа ищи щиты щи потарсам. Щимащ ощхуль вер ма ай пораеман ус.</p><p>Поӆнават куртаӊ ашкуӆая манмемн ма рущ ясаӊ ант тайсам, щишн еша ӆавартшак утаӆтыты ус. Щи кеша антем ван кутн ашкуӆая вохиӆыса па ястыӆыса, ӆуӆн ёӆн, кутэӆн, рущ ясаӊан ат потарсув.</p><p>Дарья Ивановна туса ёнтасты па сэвты нэӊа ус. Ай Люда вантман, ӆув пиӆэӆн ищи ёнтты па сэвты утаӆтыяс. Щиты яӊ таӆ ӆовата ювмаӆн аканяӆ кеша арсыр хорамаӊ ханшет пиӆн ӆуматты сохат сэвас.</p><p>Поӆнават куртаӊ ашкуӆа етшаптамаӆ юпийн Людмила Тюмень воша манас. Щита технической училища №33 хоща нянь верты вер хуват лаборанта утаӆтыяс. Ипуш ёхи Поӆнавата щутщаты ёхатмаӆн Ас охаль ху Николай Тарасович Костин пиӆн уйтантас. Ӆув, нэш, ищи Тюменян утаӆтыяс, Людмила пиӆн и общежитияйн, туп няӆмет этажан ус. Утаӆтыты етшаптамеӆ юпийн катӊан мой версаӊан.</p><div class="content-new-image"><img alt="pic" src="https://storage.yandexcloud.net/ym-sites-static/e1bfc54a-94d.webp" style="width:100%" height="1440" width="2560"/><div class="content-image_child">Кашӊ щутщаты хатаӆан имет яха актащман ёнтӆат па сэвӆат. Хор: Людмила Шульгина</div></div><p>Катрайн утаӆтыты етшаптамаӆ юпийн щи тахайн хуӆам таӆ рупитты мосас. Туп нянь верты хотн иса порайн руваӊ ус, щишн айӆат Людмилая щита шеӊк ӆаварт рупитты ус. Ӆув щи рупата эӆты йира манас па икеӆ пиӆн Поӆнават курта керӆас. Тата питы охсар энмаӆты тахайн рупитты оӆӊитас. Щаӆта ёхи хащам 1980-мет таӆатн щи таха лап тухарса. Еӆӆы Людмила Николаевна 25 таӆ Поӆнават куртаӊ леккар хотн пусанщиты нэӊа рупитас. 65-мет таӆа ювмаӆн щутщаты манас. Ияха ӆуӊатты ки, 40 моӆтас таӆ рупитас.</p><p>Еӆӆы Людмила Костина ӆув щемьяеӆ эӆты потартас:</p><p>– Икем ащеӆ Тарас Павлович Костин Вежакары емаӊ тахаеӆ вантман тайсаӆы. Николай похаӆ мосты пойкащты вера утаӆтас, щишн икем иса щий яӊхиӆыйс па арсыр йир поры верас, ма ӆувеӆа иса порайн нётсам.</p><p>Муӊ щемьяевн кат эви сэма питсаӊан, щит Галина па Виктория. Икем антома ювмаӆ юпийн ма утща эвиӊаӆам энмаӆсам. Ун эвем Поӆнават куртан уӆ, ай эвем — Ёмвошн. Ма хуӆам хиӆы тайӆам.</p><p>Щутщаман Людмила Николаевна арсыр хорамаӊ ханшаӊ ӆуматты сохат сэвӆ. Поӆнават куртаӊ культура хотн «Сорнеӊ ёш» таха уӆ. Щита кашӊ щутщаты хатаӆан имет яха актащман ёнтӆат па сэвӆат. Ёхи хащам таӆатн арсыр вантопсэта вохты питса. Щита ӆув сэвам ӆуматты сохӆаӆ этаӆтаӆ па эвет, нэӊат хорамаӊ ханшаӊ вайт, посат сэвты утаӆтаӆ. Ӆув ар пуш «Мастер-года» нэман юкантыса. 2018-мет таӆн «Шедевры вязания», 2024-мет таӆн па, верантты нэ иты Ёмвош округ куща премияйӊан ёша вус.</p><p>Людмила Шульгина ханшам потар</p>

Ай тэӆн сэвты вер самаӊа тайӆаӆӆы

Муӊ округев эӆты хуӆам ханты хоят тохи яӊхас. Хор: Иван Сандрин

<div class="content-lead">Щёхар тыӆащ хащам хатӆатан, финно-угорской ӆуӊатты нэпек ханшты мир ёх няӆмет пуш верты уйтантопсая вохиӆысайт. Хув тэӆан ханшты, потрат, ӆуӊтарат па мир ясӊа кератты ун хоятат, щаӆта па веӆщишак ханшты питам айӆат ёх Мордовия, Удмуртия, Марий Эл, Карелия, Саран мув, Пермской мув сыӆ, Югра па Ямал эӆты Ёмвошан яха уйтантысат.</div><p>Уйтантопса пуншам порайн, нэпек ханшты воӆаӊ хоятат вуща ясаӊ ястасат. Юхат, сот моӆтаскем яха ёхтам ёх, арсыр секцияйт хоща, еӊта пасан суратан, мойӊ хоятат па няврэмат ещаӆт ӆув ханшам рупатайӆаӆ эӆты потар тусат.</p><p>Муӊ округев эӆты хуӆам ханты хоят тохи яӊхас. Зинаида Викторовна Лонгортова па Валентина Даниловна Вакуленко хув пора эӆты ханты па рущ ясаӊан потрат па ӆуӊтарат ханшӆаӊан. Айӆат ху Иван Эдуардович Сандрин ван потар шупиет нэпека акатаӆ па ханты газетайн рупитаӆ.</p><p>«Тамащ уйтантопсая ма кимет пуш ёхтыӆысам. Оӆӊа аӆ щиты хуӆантсам па вантсам. Тампуш па ханшам потар шупӆам тый тутӆысӆам. Ма хорпем веӆщи ханшты айӆат ёх, ӆэщатам потарӆаӆ ошаӊ уншак ханшты хоятата альсаӆӆаӆ. Там уйтантопсайн муӊ утаӆтасаюв па ястасаюв, хоты па маты ханшам потарӆув ямашак ӆэщатты мосӆат. Кашӊ хоят моӆты порайн рупата веӆщи верты питыӆыйӆ. Хота мохты тыйӆ, хота еша ёвра манаӆ. Хоят уӆтаӆ хуват иса щи утаӆтыйӆ. Ванты, тамиты утаӆтыман, ошаӊ номпсат, потрат хуӆантман, айӆат ёх еӆӆы ханшты уратты питӆат», — Иван Эдуардович ястас.</p><p>Зоя Куртямова ханшам потар</p>

Финно-угор ханшты ёх уйтантопса

Там лопасан Елизавета ай эвем ханшам потар ӆуӊтаӆн. АНО "Ямал-Медиа"

<div class="content-lead">Хоттэӆ хоятӆам пиӆан арсыр муват хуват яӊхӆув, камн хоятат пиӆна яха ёхтыӆыӆув. Юхат вантам верӆув нэпека ханшӆаӆӆув. Там лопасан Елизавета ай эвем ханшам потар ӆуӊтаӆн.</div><p>Восна унӆтам рут ясӊем</p><p>Вуща уӆаты, вуща уӆаты, вуща уӆаты! Ханты уӆапсаям эват йиӆап хансапса ма яра, Порават ныӊ Елизавета Накова, ӆэщатсам.</p><p>«Нул юх» потар хар. 1999-мет эват 2014-мет таӆ моса опем Лилийи па яйм Елисей «Нул юх» нэмпи потрат няврэмат куссы омем пиӆна ӆэщатсат.</p><p>2014-мет таӆна манэм вет таӆ ус. Щи порайна «Радио Ямала» хоща рущ ясаӊна «Россыпи Севера» оӆаӊ потар тайсам. Юхат «Нул юх» потар хар ханты па рущ ясаӊна ӆэщатты омемна вохсаям, касащсам.</p><div class="content-new-image"><img alt="pic" src="https://storage.yandexcloud.net/ym-sites-static/76e4555b-5b6.webp" style="width:100%" height="438" width="780"/><div class="content-image_child">Щи порайна «Радио Ямала» хоща рущ ясаӊна «Россыпи Севера» оӆаӊ потар тайсам. Хор: Герман Наков</div></div><p>«Лизавета потрат»</p><p>Хоттэӆ нэӊхыӆам пиӆна таӆан-ӆуӊан щучаты хатӆатна мувӆув хуват яӊхӆув. Рутэв пиӆна яха ёхтыӆыӆув, потарӆув. Вантам, хуӆам верӆам юхат яӆан потарӆаӆам. Яймна Елисейна нётӆаям. Нэпекна понӆаӆы, тоӆмащӆаӆы рущ ясаӊ пеӆа. Щиты манэм унӆтасӆы.</p><p>2014-мет таӆ эват па 2022-мет таӆ моса хоттэӆ нэӊхыӆамна нётман ханты па рущ ясаӊ пеӆа тоӆмащам «Лизавета потрат» ясаӊ хар ӆэщатсув. Щита касаӊ ӆапат юӊкем минут арат потарсам. Вантам, хуӆам верӆам алиӆысӆам.</p><div class="content-new-image"><img alt="pic" src="https://storage.yandexcloud.net/ym-sites-static/d5f157a6-14d.webp" style="width:100%" height="675" width="1200"/><div class="content-image_child">Итта вус «Ханты ясаӊ — яха» потарты харэм 20 потарна тукаптасэм. Хор: Герман Наков</div></div><p>«Ханты ясаӊ — яха» интернет хуват</p><p>2023-мет таӆна, ай кер тыӆащ, оӆаӊмет хатаӆна интернет хуват, АНО «Ямал-Медиа» хоща «Ханты ясаӊ — яха» йиӆап потар харэм этты питас. Итта вус ма яра хансам потарӆам.</p><p>Омем рут Кев эват овты Суп ёхан муваӊ нэӊхэт ясаӊна потарӆам. Щи ясаӊ тайтыт там йисна 100 моӆтаскем нэӊхы туп. Яйм Елисей па опем Лилийи ӆын Порават ху ащем ясаӊ щирна ар пелак потарӆаӊан.</p><p>Потар харэм ӆэщатты омемна нётсаям. Тухаӆысна еӆамӆам, нумасӆам: Щуктат потрэм рут ясӊемна манӆ, ясаӊ сыяӆам поталэӊи щащӆат. Омем ӆаваӆ: «Аӆ паӆа! Ант мосӆ еӆамты, мола кем верытӆан, ям вура тая, ясӊен еӆащ тайи!»</p><p>Номсэмна щи вер ям, Мохсарт нэ щащем — Прасковья Евгеньевна Накова, Порават ху йирэм — Егор Ӆазаревич, Тови пухӆаӊ вуӆомем — Марфа Яковлевна па Юӊквосаӊ ху вуӆащем — Николай Андреевич Сязи ма яра вансаӆам, хуӆсаӆам, ӆув век ханты ясаӊна потарсат, нумассат.</p><div class="content-new-image"><img alt="pic" src="https://storage.yandexcloud.net/ym-sites-static/591fd282-7c6.webp" style="width:100%" height="607" width="1080"/><div class="content-image_child">«Лизавета потрат» ясаӊ хар ӆэщатсув. Хор: Герман Наков</div></div><p>Рутӆам хоща каӆаӊ хотна, хуӆ веӆты лотатна яӊхсам. Омем эӆты хораӊ потрат «Тут суӆтам», «Северный колорит» ӆэщатты нётсам. Щиты щи аяӆтайи ханты ясӊем рутэм мохты уӊӆэмна питас.</p><p>Итта вус «Ханты ясаӊ — яха» потарты харэм 20 потарна тукаптасэм, хоӆна рущ ясаӊна тоӆмащӆэм. Тыӆащ йи пус, 10 минут арат.</p><p>Интернет мохты рахӆ камн лотна хуӆантты. Сайт АНО «Ямал-Медиа» хоща, щиӆта ВК, группа «Этноарктика», раздел «Аудио», щиӆта «Яндекс Музыка» харна. Хоты верытӆам, щиты ханты мурэм эӆты нётӆам. Сора куссы па ям вуӆам уӆаты!</p><p>Герман Наков ӆэщатам потар</p>

Хоттэӆ хоятӆам потрат

Тэк куртаӊ каркам няврэмат. Хор: Людмила Шульгина

<div class="content-lead">Там ванан Тэк куртаӊ ашкуӆайн няврэмат ханты ясӊа па рут литературая утаӆтаты нэ Олеся Вячеславовна Хандыбина пиӆн уйтантысам. Ӆув ар таӆ щи рупата туӆ. Тэкн сэма питас, щита энмас, Ёмвошн ун нэпекаӊа ювмаӆн, рупитты ёхи ёхтас.</div><p>Муй щирн там йисан рут ясӊа утаӆтаты вер ӆэщатӆ, щит эӆты айкеӆ верас.</p><p>– Ванты, ин там хатӆатан, ёӆн рут ясаӊ ант щащӆ. Антет-ащет няврэмӆаӆ пиӆн рут щирн ант потарӆат, щишн эвет-похат ханты ясаӊ ант тайӆат. Муӊ, няврэмат утаӆтаты ёх, рупатаев яӆап щирн ӆэщатӆэв. Интерактивной сохаӆ хоща умащ урокат туӆув. Щи тумпийн арсыр касапсэт ӆэщатӆув, тухаӆ отат антет-ащет пиӆн верӆув.</p><div class="content-new-image"><img alt="pic" src="https://storage.yandexcloud.net/ym-sites-static/8635b98b-988.webp" style="width:100%" height="742" width="1320"/><div class="content-image_child">Кашӊ таӆ рут ясаӊ хуват олимпиадайн касӆув. Хор: Людмила Шульгина</div></div><p>Муӊ ашкуӆаева куртаӊ уна ювам ёх мойӊа ёхтыӆыӆат па няврэмата ӆув уӆапсаеӆ, рупатайӆаӆ эӆты потарӆат. Щаӆта арсыр ханты пормасат верты харат рупитӆат, верантты ёх арсыр мосты пормасат верты няврэмат утаӆтаӆат.</p><p>Там таӆ ун кер тыӆащ 30-мет хатаӆн веӆщи Россия мувев шоши мир хатӆ постасув. Щи хатӆ сыс «Ханты ёх» (ай няврэмат), «Каркам ёх» (ун классатан утаӆтыты няврэмат), «Ун ёх» (утаӆтаты ёх) па «Тэк ёх» (куртаӊ ёх) командайт кутэӆн номпсаӊ касапсэтан кассат.</p><p>Кашӊ таӆ рут ясаӊ хуват олимпиадайн касӆув. Суматвош район касапсайн кассув. Тампуш 9-мет классан туп кат эви ус, ванты, йи эви нэман ӆэщатам программа хуват утаӆтыйс, щишн округ касапсая вохты нэпек ант китсув.</p><p>Олеся Вячеславовна ястас, ям арат таӆ ёхӆы «Ас нэ» нэмпи арыты группа куща нэ Анастасия Алексеевна Новьюхова «Ай Ас ёх» нэмпи няврэмат арыты-якты группа ӆувеӆа еӆӆы туты партас.</p><div class="content-new-image"><img alt="pic" src="https://storage.yandexcloud.net/ym-sites-static/ba4b17a6-a0e.webp" style="width:100%" height="614" width="1092"/><div class="content-image_child">«Ай Ас ёх» нэмпи няврэмат арыты-якты группа. Хор: Людмила Шульгина</div></div><p>– Ванты, ин Анастасия Алексеевна щутщаман уӆ, щишн ӆувеӆа ӆаварт ипуляӊ кат таха туты, щишн «Ай Ас ёх» нэмпи арыты-якты няврэмаӊ таха манэма еӆӆы туты партас. Муӊ ашкуӆаевн етн эвет-похат пиӆн актащӆув, ханты ясаӊан арат арыты па якат якты утаӆтыӆув, щи тумпийн монщат хуват вантапсайт ӆэщатӆув. 9-мет класс етшаптам эвет еӆӆы колледжата утаӆтыты манӆат, щишн ай классат эӆты яӆап няврэмат вуӆам. Ай эвет-похата шеӊк умащ рут ясаӊан арыты па якат якты. Ин там «Охшамаӊ як» утаӆтаӆув. Муӊ, ванты, ром Ай Ас хонаӊан уӆӆув, щишн муӊ хощаев якат рома якӆат, «Куренька» як ищи айӆтыена якӆув.</p><p>Тэк куртан уӆмемн няврэмат манэма етнхот альсат, шеӊк умащ вантты ус. Утаӆтаты хоятата па няврэмата ун пумащипа ястаӆам.</p><p>Людмила Шульгина ханшам потар</p>

Яӆап щирн ханты ясӊа утаӆтаӆӆам

Юлия Егоровна па Геннадий Михайлович, еӆӆы пеӆа тумтака уӆаты, хоӆапӆын ар хуӆан ат хойӆайт. Хор: Альбина Тырлина

<div class="content-lead">Ӆорвош рыбоучастка ям араткем хуӆ веӆпасӆаты таха ӆуӊтасаӆ. Панзи пан па тохи ӆоӊаӆман уӆ. Тампуш сита ӆапат хоттэӆ рупитаӆ. Ӆув кутэӆан Максароват ёх хуӆам хоттэӆ. Там лопасан потрэм Геннадий Михайлович па Юлия Егоровна Максаровӊан эӆты туӆэм.</div><p>Хоттэӆ хоятӆаӆ</p><p>Геннадий Михайлович асеӆ-аӊкеӆ шуӊат Ӆорвошан усӊан. Уӆман сыс хуӆ веӆпасӆысӊан. Хоттэӆ хоятӆаӆ эӆты ситы ястас: «Ун асем Егор Макарович, Воӆаӊ Ляль ураӊан хуӆ веӆман рупитас. Хуӆам няврэм тайс. Йи похаӆ, ма асем — Михаил Егорович Максаров.</p><p>Асем йи яйӆ — Дмитрий Егорович, уятты хуӆ веӆты хоята ус. Кимет апсеӆ — Владимир Егорович, там хатӆ унты вуӆы тасян яӊхаӆ. Ешауӆ ӆапатъяӊ таӆа йиӆ, хоӆна рупитаӆ. Куртан уӆты ант ӆаӊхаӆа, ёӆан омасты ант верытаӆ. Няврэмӆаӆа нётаӆ: вуӆыӆаӆ акатман яӊхаӆ, лохан хухатӆыйӆ».</p><p>Уӆапсайӆ</p><p>Ханты хоятэв ай пора эӆты асеӆа хуӆ мосятты нётас. Муй пора эӆты рупитты питас па каматса ясаӊ верас: «Семьяеван ар няврэм энмас. Ма туп йи пох па хуӆам эви хасьсув. Ашкуӆа етшамем юпийн, армияя вусайм. 1990-1992-мет таӆатан Нижний Новгород вошан служитсам. Йи шуп СССР хося, йи шуп Россияйн. Армия эӆты ёхатмем юпийн, мохты хуӆ веӆты питсам. Оӆӊа утся рупитсам. Си порайн бударкайн хуӆ веӆпасӆаты яӊхсув. Няӆ кукла арат хуватаӆан хоӆап утся эсӆыты верытсам.</p><p>Хольмаӊ моӆтас таӆ хуӆ мосятман рупитӆам. Ӆуӊан — Панзийн, сусан па Ӆар ёхана манӆув. Си еӆпийн, сус порайн Хаш пухра касӆысув. Ин па Ӆар ёханан сойпиман уӆӆув. Хун ёханэв потты питӆа, каматса таха ермаӆӆув па пунат омасӆув. Сорт мосятман уӆӆув. Катра пора эӆты ун асем, асем сита хуӆ веӆман усӊан. Ин па няврэмӆаӆ па хиӆыӆаӆ. Ма йирэм пиӆан рупитӆам, ийимем па нётаӆ. Кимет хопан па ӆэхуем. Порайн няврэмӆам ёхтыӆыӆат».</p><div class="content-new-image"><img alt="pic" src="https://storage.yandexcloud.net/ym-sites-static/48efd930-485.webp" style="width:100%" height="913" width="1624"/><div class="content-image_child">Ӆуӊан — Панзийн, сусан па Ӆар ёхана манӆув. Хор: Альбина Тырлина</div></div><p>Пиӆ хоятаӆа нётаӆ</p><p>Ӆуӊ порайн, Юлия Егоровна икеӆа нётаӆ, яха хоӆап вантты яӊхӆаӊан. Ӆув па каматса ясаӊ рутӆаӆ, рупатайӆ, там пора уӆапсайӆ эӆты потартас: «Ма Щаня муван Ямкуртан энампсам. Эви опрась нэмем Пырысева. Асиӆам-аӊкиӆам сита усӊан, тасян яӊхсаӊан. Асем шуӊат — Егор Алексеевич Пырысев, аӊкем — Татьяна Петровна Пырысева (Озелова), Васьёханов ӆар рут эӆты. Асем передовика ус. Хут яй па йи нэ апси — Дарья Алексеевна Нензелова (Пырысева) тайс.</p><p>Муӊ семьяеван яӊ няврэм энмас. Ма мет ай. Кат яем па йи опем тащ хотан вуӆы тащан яӊхсаӊан. Опиӆам хоӆ рупитты сира утаӆтысат, районэван рупитӆат.</p><p>Ма Ёмвошан ай няврэмат шавиты па ай няврэмат рут ясӊа утаӆтаты нэӊа утаӆтысам. 1991-мет таӆан педагогической колледжан оӆаӊ ай няврэмат рут ясӊа утаӆтаты отделение пуншса. Хун утаӆтыты етшасам, направление хуват Питӆор курта китсайм. Сита ай няврэмиет хатӆ сыс яӊхты хотан воспитателя рупитсам. Питӆор куртан икем пиӆан уйтантысам. Си юпийн Ӆорвоша касаӆсаман.</p><div class="content-new-image"><img alt="pic" src="https://storage.yandexcloud.net/ym-sites-static/f47d62db-aa1.webp" style="width:100%" height="1107" width="1969"/><div class="content-image_child">Сорт мосятман уӆӆув. Хор: Альбина Тырлина</div></div><p>Си пора эӆты тата уӆӆаман. Ешауӆ хольмаӊ таӆа йиӆ, хоты яха мантсаман. Хуӆам няврэм энмаӆсаман. Хоӆ высшой образование тайӆат, рупитӆат. Таӆ сыс садикан рупитӆам. Ӆуӊан па, хун сютсяты манӆам, пиӆ хоятэма хуӆ веӆты нётӆам. Панзийн уӆӆаман. Хун ун эвеман сэма питас, ийикем асеӆан па яйӆаӆан хотан омассайман. Си пора эӆты тохи яӊхӆаман. Кашӊ ӆуӊ сита уӆӆув, няврэмӆув сита энампсат. Похем ай уӆмаӆ порайн, хут таӆ кеман, бударкая опсыӆыйс, сэвс тайс. Похат си вер шеӊк самаӊа тайӆэӆ. Ин уна йисат, асеӆа нётӆат.</p><p>Панзийн хуӆ веӆпасӆаты тумпийн, унтан вонсямот вонсьӆув. Ӆуӊ сыс иса сита. Няврэмӆув ёхтыӆыӆат, сютсиӆат. Тампуш хуӆ шимаӆ, йиӊкаӆ ай. Хатӆ сыс ветъяӊ, хутъяӊкем киӆа мийӆысув. Туняӆ аршак ус».</p><p>Геннадий Михайлович па Юлия Егоровна, еӆӆы пеӆа тумтака уӆаты, хоӆапӆын ар хуӆан ат хойӆайт. Тумтак ёш, тумтак кур!</p><p>Альбина Тырлина ханшам потар</p>

Максароват хуӆ веӆты ёх

Потар ханшам хоятат. Хор: Альбина Тырлина

<div class="content-lead">Тамхатӆ Пулӊават вош хоятат Национальной библиотекайн диктант ханшсат. Там потар Расул Гамзатов ханшиӆыйс, Зоя Куртямова ханты ясӊа тоӆмащсаӆӆы. Альбина Тырлина хор верас.</div><p>Ма рут ясӊем! Наӊ ма тащем, наӊ ма щунем, аратаӆ муш эӆты портун. Ма самеман тэӆыя ар, ма турсый тайӆам. Щи турсый — наӊ, ма рут ясӊем.</p><p>Ай няврэм иты, ёш эӆты катаӆман, уӆапса вантты, наӊ манэм хоятат хоща тусэн. Ма па уӆты мувем эӆты еӆӆы потарӆам. Наӊ манэм Похатур хоща тусэн, ӆув нэмаӆ — воӆаӊ рущ ясаӊ. Ӆув ищи манэма рут ясӊа йис. Ӆув манэм кимет ёшем эӆты вусӆы па па мув суӊат вантты тусӆы.</p><p>Кашӊ ханшам нэпекеман ма рут мирэм кат аӊки тайӆ. Оӆаӊ аӊкем — ма рут мувем. Тата ма сэма питсам, тата ма рут ясӊем хуӆсэм, потарты питщасам, ӆув ма вурэма, ма ӆыпема ӆыӆӆаман уӆ. Тата ма рут ясаӊан арыты ар оӆаӊ пуш хуӆсэм. Щаӆта па ишканщап арэм арэмасэм. Тата ма нянь па йиӊк вурт моштасам. Камн пуш кев вурама хуӊхман, ма курӆам кева хойӆысат, вура ӆыӆӆысат, рут мувем йиӊкатан па торнатан яммаӆсайм.</p><p>Кимет аӊкем — Россия хон мувем. Энмаӆсайм, юран масайм, хува манты юша тусайм, мир ӆоват уӆапсайн альсайм.</p><p>Кат аӊки — юр маты кат тохаӆ, кат ёш, кат сэм, кат ар. Кат аӊки хошам ёшатан охем хуват вощхисайм, мосты порайн паӆӆам эӆты таӆӆысайм. Пох щиран кат аӊкем ещаӆ ма шанша ӆойӆам.</p><p>Расул Гамзатов</p>

«РОССИЯ – МИР ХОТТЭЛ»

Ям арат таӆ юпийн Софья Шесталова опера ар еӆӆы ханшты питас. Хор: Людмила Шульгина

<div class="content-lead">Йис тэӆн хантэт па охалят йис потрат тайсат, щит эӆты оша йис, муй щирн Туром, Мувев-Йиӊкев, Най-Уртат, хатнэху, войт па па отат тыйсат. Сорни-Най эӆты йис потар кашӊ шоши хоят уйтаӆ. Там ванан «Сорни-Най» нэмпи опера ар тыйс.</div><p>Щи опера ар ханшты вер эӆты муӊева Югра мувев опера арат арыты нэ Софья Алек-сеевна Шесталова айкеӆ тус:</p><p>– Щит эӆты мин икем, охаль мир оӆаӊмет композитор ху Владимир Иванович Шесталов пиӆн хувн нумассамн. 2012-мет таӆн ӆув «Овс мув ар сов» нэмпи араӊ щуӊк дискаӆ эсаӆсаӆы. Щита Югра мувев духовой оркестр ёх (дирижёр ху Антон Яковлев ус) арсыр нарасъюхатн В.И. Шесталовн ханшам ар соват нарассат, щи тумпийн щита шоши мир нарасъюх па торсапӆ ханащсаӊан. Ма ёӆн щи диск яма хуӆантмемн роман Владимир икема ястасам: «Володя, щи ар совӆан шеӊк хорамаӊат, щишн арыты ӆаӊхаӆайм. Там ар совӆан хуват опера ар ханшӆамн!» Ӆув кашащас, туп така партас, щи опера ар туп манэма арыты мосӆ!</p><p>Софья Шесталова ясӊаӆ щирн, щи эӆты айкеӆат акатты ху Виктор Журавлёв «Тюменские известия» газетайн 23.11.2012-мет таӆн ханшас. Щи айкеӆ эӆты С.А. Шесталова ӆуӊатӆ:</p><p>– Владимир Иванович Шесталов ястаӆ: «Ма — охаль мир композитор ху, щишн шоши мир йис потар эӆты опера ар ханшты вутщиӆам. Мосаӊ, еӆӆы ма ханшам симфонической ар совӆам хуват «Сорни-Най» нэмпи опера ар тыйӆ. Ин итухӆ арат имем Софья Алексеевна утаӆтаӆ, ӆув, ванты, драматической сопрано турсый тайӆ».</p><div class="content-new-image"><img alt="pic" src="https://storage.yandexcloud.net/ym-sites-static/43555725-dfe.webp" style="width:100%" height="720" width="1281"/><div class="content-image_child">Щита Югра мувев духовой оркестр ёх (дирижёр ху Антон Яковлев ус) арсыр нарасъюхатн В.И. Шесталовн ханшам ар соват нарассат, щи тумпийн щита шоши мир нарасъюх па торсапӆ ханащсаӊан. Хор: Людмила Шульгина</div></div><p>Софья Алексеевна ястаӆ, «Сорни-Най» опера ар — щит Шесталов рут и номас эӆты тыйм ар. Мет оӆаӊан охаль мир писатель ху Юван Николаевич Шесталов 1976-мет таӆн «Сорни-Най ханя» нэмпи потраӆ ханшсаӆы, 2005-мет таӆн Владимир Шесталов, ӆув похӆ, охаль мир оӆаӊмет композитор ху, «Сорни-Най» сюита ар совӆ ханшсаӆы. 2013-мет таӆн В.И. Шесталовн ханшам «Музыка и мифология Медвежьего праздника обских угров» киникайн Сорни-Най эӆты ар ханшман ус, щит Софья Шесталова ханшас. Щиты айӆтыена шоши мир йис потар эӆты опера ар тыйты питас. 2011-мет таӆн Юван Шесталов антома йис, 2014-мет таӆн ӆув похӆ Владимир хув паната шушмас, щишн щи рупата воӆыйс. Ванты, опера ар ханшты вер — щит ун па ӆаварт рупата, щит, матты ки, ар сов потар.</p><p>– Опера ар — щит ипуляӊ нарасты, арыты па якты ун потар, щита ищи оӆаӊмет потар, мет воӆаӊ вер па сохантты вер уӆӆыӆат, — Софья Шесталова ястас.</p><p>Туп ям арат таӆ юпийн Софья Шесталова опера ар еӆӆы ханшты питас, щита Ю.Н. Шесталов ӆуӊтарӆаӆ уӆӆат, щи тумпийн Софья ищи ханшас. Ма С.А. Шесталова эӆты инщассам, муй эӆты «Сорни-Най» опера ар питӆ, ёхӆы ӆув ястас:</p><p>– Ма туса щи эӆты нумассам. Опера арн мет сыры увертюра — щит муй эӆты потар. Щаӆта оӆаӊмет ар — щит Мувев сэма питам вер, кимет — Сорни-Най сэма питам вер, хуӆмет — щит Куль Отыр Сорни-Най пиӆн таранӆаӆ, няӆмет — щит Сорни-Най ханя, ветмет — щит Сорни-Най эӆты тыйм йис потар, хутмет ар эӆты ин ан потарӆам, ханяя тайты питӆэм. Уйт ӆор тыӆащ 8-мет хатаӆан опера ар ханшты верэм сохнас.</p><p>Интам «Сорни-Най» опера ар арыты порайн етнхот альты вер эӆты нумасӆам. Щи верн манэма «Хатӆ» нэмпи ханты-охаль мирӊан театр артистат, «Ёмвош ёх» тахайн арыты нэӊат па «Монщ хот» арыты-якты няврэмат нётӆат.</p><p>Там опера 35-кем минута арат щащты питӆ. Софья Шесталова ясӊаӆ щирн, щи операйн арсыр европейской нарасъюхат эӆты шоши мир нарасъюх, торсапӆ, хутаӊъюх па пенщар щащты питӆат. Мосаӊ, еӆӆы щи опера ар охаль ясӊа тоӆмащты нётӆа. Софья Алексеевна Шесталова — творческой хатнэху, щишн хонна ант ястас, хун ӆув «Сорни-Най» опера арыты питӆ, туп щи альты вер там таӆн тыйӆ. Муӊ ӆувеӆа ар ям ясаӊ ястаӆув, ӆуӆн ар хоят «Сорни-Най» опера самаӊа ат хуӆантсат!</p><p>Людмила Шульгина ханшам потар</p>

«Сорни-Най» йис потрэв хуват опера ар тыйс

Ёлах па ертаӊ хатаӆан ищипа тохи щёрас еша антомшак хоятат пиӆтащисат: айӆ, унаӆ иса аматман хухаӆсат. Андрей Ткачёв/Ямал-Медиа

<div class="content-lead">Хоятат, хой хухатӆыты вер самаӊа тайӆат, тампуш Пулӊават вошан ӆапатмет пуш «Полярный круг» касапсая яха актащисат. Ямал мувев тумпийн, касты ёх 11 регионат эӆты пиӆтащисат. Казань, Сыктывкар, Воркута, Уфа, Сосногорск, Новосибирск, Москва па Хон Петра вошат эӆты хоятат там касапсая нэман ёхтыӆысат.</div><p>Унт ӆор тыӆащ 30-мет хатӆ кеша Пулӊават вош хулат хуват хухатӆыты юшат ӆэщатсайт. Мет оӆӊа 500 метра хухаӆты кут хоятат эсаӆсайт. Ёлах па ертаӊ хатаӆан ищипа тохи щёрас еша антомшак хоятат пиӆтащисат: айӆ, унаӆ иса аматман хухаӆсат.</p><p>– Ванты, ма ай пора эӆты касты лотата яӊхӆам, нёхамтыты па хухатӆыты карӆыман уӆӆам. Ин па няврэмӆам щи вера ищи утаӆтаӆӆам, — Александр Лонгортов ястас. — Щиты, похӊаӆам пиӆан ван кутан хухатӆыты ӆойӆыӆув. Айшак, Богдан похием мет харщи. Ӆув пиӆэӆан там хухатӆыты касапсая нэман ӆэщатысув. Кат ӆапат сыс, кашӊ хатӆ, вош хулат хуват хухатӆысув па нёхамтысув. Ар юр понам верӆув нох этсат. Щёрас кем хоят кутан Богдан нох этас. Мет оӆӊа хухаӆмамаӆан еша ёхи хащамтыйс, щаӆта нумаӆмасӆы, хоты муӊ ӆэщатысув, муй арат юр версув па еӆӆы таканшак курӆаӆ нёхтасӆы. Щиты похием 500 метра хуват хухаӆман оӆаӊ места шитас, карты мевал посан мойӆаса.</p><div class="content-new-image"><img alt="pic" src="https://storage.yandexcloud.net/ym-sites-static/b67cf720-04f.webp" style="width:100%" height="1440" width="2560"/><div class="content-image_child">Мет оӆӊа 500 метра хухаӆты кут хоятат эсаӆсайт. Хор: vk.ru/salekhard_adm</div></div><p>Щаӆта катсот антомшак хоят 3 километра хухаӆсат. Ар хоят кутан, Роман Талеев мет харщи уӆмаӆ. Касапсая ӆув нэман Охсар вош эӆты ёхтыӆымаӆ. Айӆат ёх кутан уншак ханты хоятӆув ищи такан ёхи ант хащаптысат. Ардалион Павлович Пырысев касты юшаӆ кентат хухаӆсаӆӆы.</p><p>– Ма там хухатӆыты касапса эӆты интернет хуват айкеӆ кащаӆасам, щаӆта па эвеман заявка ӆэщатты нётсайм. Щи кеша щёрас соӆкува сохаптасам. Аратаӆан, тата кашӊ хухатӆыйм хоят ох шук тый сохаптссат. Там охат «Ямине» фонд хоща акатӆайт па мушаӊ няврэмат яммаӆты нётӆайт. Нумастэман, хухатӆыман няврэмата нётты, щит шеӊк ям вер, –Ардалион Пырысев ястас. — Муй арат манэм нумӆэм ма иса хухатӆыӆам, ашкуӆа пора эӆты ӆохан касты самаӊ. Оӆӊа Мужи вош, щаӆта Ӆорвош район, еӆӆы па Пулӊаватан утаӆтыман, Ямал мувев сахат хухатӆыман кассам. Ин па пенсияйн уӆман аӆ щиты ант омасӆам, порайн хухатӆыӆам, хиӆыӆам патан тутӆыӆӆам, утаӆтаӆӆам.</p><p>Хащам катсот-кем хоят 10 па 21,1 километра хухаӆсат. Хой ёхтыӆыйс иса верытсат финиш унты ёхтаптаты. Кашӊ хоят нётап верас, аратаӆан 727 щёрас соӆкува ох акатса па няврэмат яммаӆты кеша «Ямине» фонда китса.</p><p>Иван Сандрин ханшам потар</p>

Хухатӆыман няврэмата нётсат

Эдуард Сандрин ар таӆ вой леккара рупитас.  Хор: Иван Сандрин

<div class="content-lead">Там ӆапатан, унт ӆор тыӆащ 31-мет хатаӆан Россия хон мувев ӆоватан войт яммаӆты хоятат емаӊ хатӆ постасат. Мир ӆоватан артаӆыман ки, Ямал мувеван мет аршак вуӆы тащат уӆӆат. 700 моӆтас щёрас вуӆэт яммаӆман 250 вой леккарат рупитӆат. Щиты Эдуард Сандрин ар таӆ рупитас. Там лопасан ӆув эӆтэӆ ӆуӊтаӆан.</div><p>Тащ хотан сэма питас</p><p>Катра, тарам ищки хатӆат ёхатты еӆпийн, таӆ пора кеша вуӆы тащат Ас па пелак унты воштыӆысайт. Роман Иванович па Елена Семеновна Сандринӊан хоттэӆан 1962-мет таӆан ун похаӆ сэма питас. Эрик нэмн понтсэӆ. Щи порайн Ас потты тыӆащ ус. Катра Кевавт курт леп вуӆэӊ ёх хотвоӆ версат. Щиӆта ай няврэм пиӆан Мужи воша ёхаттыйн Ван хатӆап тыӆащ 17-мет хатӆ уӆмаӆ. Щи хатӆ нэпека сэма питам хатӆа понӆа па Эдуард нэм ханшӆтаӆа. Щишан, ёӆан Эрика айӆты питса, нэпек щиран — Эдуард.</p><p>– Ма ащем ун ащи, Павел Данилович, ийимеӆ пиӆан хуӆ веӆман вусӊан па няӆъяӊкем ӆов тащ тайсаӊан. Айнайн вуӆы сахат пелатты питсэӆ. Щиты ай вуӆы тащ тайты питсаӊан, — Эдуард Романович ащеӆ потрат нумаӆмас. —  Еӆӆы па ма ун ащем, Иван Павлович, уна энаммаӆан вуӆы тащаӆ пиӆан Кев пеӆа касаӆты питас. Щиты щи муӊ вуӆэӊ хоятата йисув.</p><p>Соӆтан пора</p><p>Мужи вош ашкуӆа 1979-мет таӆан етшам юпийн, ӆув мохты вуӆы хота рупитты манас. Щита кат таӆ еша антомшак рупитас. Имоӆтыйн, Ас нопатты тыӆащ оӆаӊ хатӆатан вер сахат воша ёхтас, щита па ӆувеӆ соӆтана манты нэпекан ёхатам. Хота манты хоятатан щий айкеӆ ащеӆа-антеӆа китса.</p><p>– Соӆтан щира ма Мордовской АССР мува, Рузаевка воша китсайм. Щита карты юш шавиман усам. Туп оӆаӊ сыс тыӆщат хащсат, мохты соӆтан куща ёхтас па муӊев пирыты питсаӆӆы, — Эдуард Сандрин ястас. — Щиты, ма пиӆэман хоӆна хут хоят Белоруссия мува, Гомель воша тусаюв. Щи муван муӊ хуӆам тыӆащ сыс арсыр тохты нёӆат утаӆтысув па артаӆасув хоты сахат ӆувиӆаӆ мосӆат ӆап нёратты. Оша ант пайтӆув, хоӆта муӊ щиты такан ӆэщатӆаюв. Юхат, пора хащаман, хун соӆтан пора соханты питас, муӊев айкеӆ ёхтас — Афганистан мува ляльсты лота китты вер уӆмаӆ. 1983-мет таӆан ёхи ёхатсам…</p><p>Соӆтан пора хуван хащас, туп тохи яӊхам порайӆ Эдуард яма нумӆаӆӆы. Айнайн паӆӆаӆ атмащ хуӆты питсат. Айӆат ёх порайн хой щий эӆты нумасаӆ. Вуӆы хотаӊ ёх леккар хота яӊхты кум ант шитӆат. Имоӆты порайн ӆув ищипа паӆ леккар хоща яӊхас. Леккаран ястаса, хоты там мушаӆ соӆтан пора эӆты питас.</p><p>– Соӆтан порайн, тохты нёӆат утаӆтыман, мув хоща иӆ хырыӆысӆув. Щаӆта щуӊк нёртман ӆув лакки тохсат, — Эдуард нумаӆмас. — Хоты нёӆӆув рыйсат, ванты мантсув. Тохи ванамеман, йи нёӆ ёхи хащман, тохнамтас. Щах ракантсам. Сэмӆам пуншман, нумасӆам лунщи йиӊк охем эваӆт манаӆ. Щит вур уӆмаӆ… мохты леккар хота тусайм.</p><p>Вуӆы тащат яммаӆман</p><p>Соӆтан юпийн ӆув утӆам щираӆан вуӆы хота рупитты манас. Ай пора эӆты, Кев уншты порайн вантас, хоты керыйм па нохты вуӆэт ёӆта хащиӆысат. Яммаӆты кум антом, хойн нётӆайт. Щи пора эӆты вуӆы леккар вер пеӆа утаӆтыты нумасты питас.</p><p>– Щи номпсэм пиӆан совхоз куща хоща мантсам. Ӆув вантӆаӆы ма утаӆтыты уратӆам. Нэпек ханшас па манэм Пулӊавта Зооветеринарной техникума китсаӆӆы, — вуӆы леккар ястас. — Щита ма няӆ таӆ утаӆтысам. Рупитты ащем-антем хоща китсайм. Оӆаӊ сыс хуӆам тащ хуват рупитсам. Сибирской язва па пирам эӆты вуӆэта портун поныӆысам. Ӆуӊ порайн, Кев пуӊаӆан войт шеӊк такан нохты питыӆыӆат. Щи порайн вуӆы тащат иса эӆты вантман тайты мосӆат.</p><p>Щиты, Эдуард Сандрин хольмаӊ моӆтас таӆ вуӆы леккара рупитас. Ар пелак таӆ оӆаӊмет тащ «Мужевское» сельхозпредприятие хоща касаӆман яӊхас. Леккар верат тумпийн ӆув вуӆы тащ ӆаваӆты ант ёращас. Щи онтасна, ат ӆаваӆман, вантас хоӆна муй хорпи вуӆы мушитты питас.</p><p>Эдуард Романович ийимеӆ пиӆан кат пох па йи эви энмаӆсаӊан. Ин ӆын пенсийн уӆӆаӊан, хиӆыӆаӆ энмаӆты нётӆаӊан. Шоши Катра Кевавт куртаӆа щутщаты яӊхӆаӊан. Хун марэмаӆӊан, актащӆаӊан па вуӆы хота яӊхӆаӊан.</p><p>Иван Сандрин ханшам потар</p>

Вуӆы леккар

Щи тахайн №1206 Овкурт участковой комиссия рупитас. Хор: Анна Родионова

<div class="content-lead">Ямал мув ӆоватан унт ӆор тыӆащ 30-мет хатӆ вуш эӆты щёхар тыӆащ 17-мет хатӆ унты касӆыман, хуӆ веӆпасӆаман уӆты мохет пирасты питсат. Россия ӆоватан 36 мув суӊан аӆаӊшак пирасӆа. Хойтат ай куртатан уӆӆат, па ӆув хощаеӆ шеӊк ӆаварт ёхтаптаты, хой ТЭК муй тутаӊ хопан рупитаӆ.</div><div class="content-new-image"><img alt="pic" src="https://storage.yandexcloud.net/ym-sites-static/a332a1f8-95d.webp" style="width:100%" height="1440" width="2560"/><div class="content-image_child">Кашӊ хоят унты ёхатты юш сот моӆтас километра тохӆаӊ хопан манты мосаӆ. Хор: Анна Родионова</div></div><p>Хащам ӆапат вуш эӆты участковой комиссияя ӆоӊам хоятат тохӆаӊ хопан, мотур хопан, тутаӊ хопан, карты юш хуват яӊхты питсат. Няӆ регионан беспилотник онтасан пирасапса верӆа, щий ӆоӊксат Красноярской край па Кемеровская область — Кузбасс, па безэкипажной катьратна Карелия Республика па Архангельская область.</p><p>Ӆорвош район хуват ин ищи Избирком хоща ӆоӊам хоятат ай куртат па касӆыман яӊхты мохет унты яӊхӆат. Ӆорвош район Территориальной избирательной комиссия секретарь Анна Родионова ясаӊ верас: «Хащам хатӆатан муӊ аӆаӊшак нэпек эсаӆты мохет хоща яӊхсув. Овкурт эӆты Эрнст Ильич Рохтымов па Владимир Григорьевич Лонгортов усӊан. Тохӆаӊ хопан Мужевской совхоз няӆ бригадайн усув. 39 хоят нэпек эсӆас. Щи тахайн №1206 Овкурт участковой комиссия рупитас. Муӊ ӆув пиӆӆаӆан рупата вантман яӊхсув».</p><p>Марина Лонгортова хув тэӆан касӆыйӆ, авка тайӆ, иса ӆув юпеӆан яӊхаӆ. Нэпек эсаӆты ищи яха ёхатсаӊан. «Муӊ авкаев нэмаӆ — Ром пох. Туняӆ вуш эӆты муӊ пиӆэван уӆ. Кураӆ каши, щишан иса ванан тайӆэв. Иса ма пиӆэман яӊхиӆыйӆ, щишан ин нэпек эсаӆмем порайн ищи ма пиӆэман ус», — Марина ястас.</p><div class="content-new-image"><img alt="pic" src="https://storage.yandexcloud.net/ym-sites-static/e19c0055-977.webp" style="width:100%" height="1440" width="2560"/><div class="content-image_child">Ӆуӊан па сусан ар пелак йи тахайн хотӆаӆ ӆойӆат. Хор: Анна Родионова</div></div><p>Кевн каматса хоттэӆ Мужевской совхоз эӆты уӆ, щит Лонгортоват, Епринат, Рохтымоват. Пирасты нэпек эсаӆты еӆпийн, кашӊ хоят па валэмийӆ, хой ураӊан ӆув тур сыеӆ маӆэӆ. Кашӊ хоят унты ёхатты юш сот моӆтас километра тохӆаӊ хопан манты мосаӆ. Ям хатӆ порайн мет еӆаншак уӆты ёх унты яӊхӆа.</p><p>Юш альман шоши хоятат уӆӆат, Эдуард Макаров ин яӊхас. Ӆув катра зоотехника рупитас, хащам хольмаӊ таӆан ӆув Избирком хоятата юш алиӆыйӆ. «Там йисан шеӊк ӆаварт антом, кашӊ хоттэӆ спутниковой телефон тайӆ. Кашӊ ӆапат ясаӊ верыӆыӆат. Щи веран уйтӆэм, хота ӆув ӆойӆат. Ӆуӊан па сусан ар пелак йи тахайн хотӆаӆ ӆойӆат. Шеӊк хува ант касӆыӆат, 10-15 километрайн. Щишан кен», — Эдуард ястаӆ.</p><p>Андрей Гиберт ясаӊ щиран: «Аӆаӊшак пирасты харатан 55 участковой комиссия хоятат рупитты питӆат. Ма нумасӆам, постам план щиран рупатаев иса туӊа-щира манаӆ».</p><p>Щёхар тыӆащ 18-20-мет хатӆатан аратаӆ мир пирасаӆ. Кашӊ хоята тамащ хатӆат амтап туӆат. Аратаӆ мир ӆаӊхаӆ ямашак уӆты. Щишан, нын ищи яӊхаты, пирасаты. Нын эӆтайн еӆӆы уӆапса ищи ӆойӆ.</p><p>Аллина Тоярова ханшам потар</p>

Лух Авт

Публикации автора