Лух Авт
Хув ӆавӆам юш ӆэщатса
Юш верты ёх хащам ӆапатан Пулӊават эӆты Надым вош унты кев юш верты етшасат. Аратаӆ 344 километра юш яӆпа этас. Щи ураӊна таӆаӊ ветхошъяӊ таӆ мосас.
Ямал мувев ӆоватаӆан ун. Вошӆаӆ па куртӆаӆ кутан ям кут яӊхты мосаӆ. Щишан мет оӆӊа, ищки хатӆат пиӆна, айнайн ӆонщаӊ таӆ юшат верты питсайт. Туп мелак хатӆат ёхатӆат, юшев нёхла йиӆ. Ванты, щи ураӊна Ямал мувев кущайт нумасты питсат, ищи па кев юш ӆэщатты мосаӆ.
Дмитрий Кобылкин губернатора уӆмаӆан, 2011-мет таӆан юш верты вер нёхӆас. Мет оӆӊа юшаӆ кев хишан шошапса. Щиты яртъяӊ таӆ сыс кев хиш эӆты хув юш этас. Мет ӆаварт ус ёханат па соймат шоппи нормат ӆэщатты. Аратаӆан 53 норам верса. Щаӆта па вуӆы тащатан юш шоппи вуншты ураӊна, 46 пайӆы таха ӆэщатса. 2020-мет таӆан ван хатӆап тыӆащан Дмитрий Артюхов там йис округ куся ху щи кев хиш юш пуншсаӆӆы. Щи пора эӆты таӆ-ӆуӊ сыс Надым юш хуват яӊхты рахты питас. Туп уншак машинайт яӊхты верытсат.
Щи юпийн юшев ямашак ӆэщатты питса. Туӊа-щира так кев юш ун машинаятан яма аймтса. Йи леп, Надым вош па Пулнават эӆты щи рупата манты питас. Щиты юшев етшаптаты ураӊна хут таӆ еша антомшак мосас. Манты юшев кутапан тут йиӊк маты «Лукойл» нэмпи ӆапка яӆпа этас. Щи тумпийн 13 ӆойӆыты лот ӆэщатса, хота щутщаты, нампар вощкаты па вер сахат яӊхты рахаӆ.
– Хув ӆавӆам юшев яммаӆса, щит шеӊк ям! — Надым вошан уӆты Раиса па Виктор Пырысевӊан ястасӊан. — Ванты, мин катӊан Ӆорвош район эӆты, щита ун эвев па хиӆыӆув уӆӆат. Пулӊаватан ищи рутат тайӆув. Щишан ван кутан мойӆыты яӊхӆув. Еӆпи 10-12 щёс манты мосас, ин па 3-4 щёс. Щикем ям па сора!
Иван Сандрин ханшам потар
Авторы
Лух Авт
Темы