Лух Авт
Няврэмат пеӆа самаӊ нэ
Аратаӆ мир ӆоватан па Россия хон мувеван ай тахайт потты тыӆащ 5-мет хатаӆан няврэмат утаӆтаты хоятат емаӊ хатӆ постаӆат. Шоши хоятӆув эӆты ар ошаӊ утаӆтаты ёх рупитсат па рупитӆат. Щи кутан Вера Макаровна Нензелова. Ӆув ветъяӊ пеӆа вет таӆ няврэмат пиӆан самаӊа рупитас па ӆувиӆаӆ ошаӊа энмаӆтас.
Эвет па похат туӊа-щира энмаӆты ураӊан ар юр понты мосаӆ. Няврэмат утаӆтаты па уӆты хотатан, ашкуӆа-интернататан хоӆна аршак юр па так ям номас тайты. Кашӊ няврэм кеша ям ясаӊ уйтты па пойкман потарты. Няврэмат пиӆан щимащ хоятат уӆӆат па рупитӆат.
Ӆув кутэӆан Вера Макаровна Нензелова. Ветъяӊ пеӆа вет таӆ няврэмат пиӆан самаӊа рупитас. Вет таӆ хащаман ӆув щутщаты этас, рупата эӆты нох воӆыйс. Туняӆ, ван хатӆап тыӆащ 8-мет хатаӆн юбилей 70 таӆ постас.
– Шеӊк самаӊ, ошаӊ, ям номпсаӊ нэӊие, — ӆув пиӆэӆн рупитам хоятат ястаӆат. — Рупитмаӆ хуват няврэматан яма нумӆа, ям ясӊат ӆув эӆтэӆ потарӆат. Кашӊ хоят пеӆа ӆув ям. Лик ант туӆ. Щимащ утаӆтаты нэӊат няврэматан самаӊа тайӆайт.
Макар Григорьевич па Агафья Архиповна Куртямовӊан хоттэӆ хоща, Ямкуртан 1955-мет таӆн Вера сэма питас. 1972-мет таӆн Овкуртаӊ ашкуӆа-интернатан нийӆ класс утаӆтыты етшаптас. Щи юпийн, мохты Пулӊаватан уӆты А.И. Зверев нэмпи педагогической училище хоща манас па 1976-мет таӆн утаӆтыты етшас.
– Утаӆтаты нэӊа йиты ма айтэӆан номас версам, — Вера Макаровна ястаӆ. — Няврэма уӆмем порайн ӆухасӆам пиӆан ёнтмеман, иса утаӆтаты нэӊа верасысам. Таӊха номпсэм так уӆмаӆ, щишан ӆувеӆ паты унты тусэм.
Рупата пеӆа утаӆтыты етшамаӆан Асов курта китам. Щита кат тыӆащ рупитмаӆ. Щаӆта еӆӆы Красноселькупской район Толька нэмпи вошан утаӆтаты па пионервожатой нэӊа рупитас. Щита уӆман па рупитман, самаӆан шеӊк ёхи, ӆув Ӆорвош районаӆа вуратас. Щишан, щи номасан, ӆув Ващъёханова китса. Щи куртан Владимир Николаевич Нензелов пиӆан уйтантыяс па поры версаӊан. Щита 1978-мет таӆ сус унты рупитсаӊан па Овкурта касаӆсаӊан. Щаня ёхан муван ӆын щутщаты мантан унты рупитсаӊан. Няӆ няврэм энмаӆсаӊан, ин па хиӆыӆаӆ энмаӆты нётаӆ.
Ӆув пеӆаеӆ вантман, Анжелика эвиеӆ ищи утаӆтыты нэӊа ашкуӆайн рупитты питас. Ин па Юлия хиӆыеӆ антимеӆ юш нюхаӆаӆ. Ӆув ищи Овкуртаӊ ашкуӆайн няврэмат пиӆан рупитаӆ. Щишан Вера Макаровна номпсаӆ ям! Ӆув пеӆаеӆ ястаӆув тумтака уӆты па шук ант вантты!
Иван Сандрин ханшам потар
Авторы
Лух Авт
Темы