Няръяна Ӈэрм
Илна’’ саиро манэ’’лабтамби’’
Горнокнязевск’ хардахана ӈэда Ямал’ тер’’ ила’ саиро манэ’’лабтамбада музей’ манзаравада сидя ю’’ самляӈг похонда тэвы’’. Тикы яля’ ед’ вэба’ иры’ 19 яля я’ ханярид ненэця’’ ӈобт’ ма’’лыць.
Юкад вата сибимдей векхана таняӈы я’’ хабей’’ ӈарката’’, Тайшин’ еркарм’ мэта’’ ненэцие’’ я’’ ӈэвы’’. Сяхари’ пыдо’ таня’ та’ есям’ мадаванзь ӈэсоӈгавы’’. Еркарадамдо’ Василий Обдорский хасава’ нюнда Тайша’ нюмгад ӈадимдевы. 1768 похона не’ параӈода Екатерина II вато’ сер’ Матвей Тайшинм’ хаби’’ тэнзхад нерденя князьӈэ ӈэсь табэдавэда. Тев’ тенат таняна Тайшин’ еркарм’ мэта’’ ненэця’’ иле’’, яханандо’ манзара’’.
2001 похона Горнокнязевск’ харад’ вэкана ӈэрм’ яна’’ тер’’ илам’ манэ’’лабтамба мэта музейм’ тидхалевы’’. Нердехэва тикы’’ серо’’ няю’ сабе ӈока сертавы ӈамгэдо’ яӈговы. Сянамбой ненэй мято’ мярвы’’. Мюсертахат хомбвы’’ ӈамгэридо’ манэ’’лабтярӈэ мэ’’мы’’. Ненэця’’ тикана ӈэда’’ ӈаво тэри мание нивыдо’ пэр’’. Хусувэй ӈамгэм’ ня’’марпа, серыба пирмыдо’. Тамальӈгад турта’’ мядондидо’ хуркари’’ илека’’ серк’ тарабтамбидо’. Ханяӈэхэ’’на мядо мярыби’’, есена’’, сэдора’’, ӈавар’’ пиремби’’. Таня’ тэворта’’ хибярихи’’на музейхана мэва сяхаринда нюрцьм.
Сидя ю’’ самляӈг по’’ ямбан’ таняна сянри’’ юнета’’ ненэця’’ мядомы’’. Неноховавна 2004 похона Владимир Путин тэвормы. Я’ тиӈгывна юнета Ямал’ ирина’’ 2007 похона мята ӈани’ таня’ ӈэсовы. 2023 похона едэй мутра’ сермана ӈэрм’ тер’’ илм’ ӈоб’’ кинодарев’ манэ’’лабтамбада мядм’ сертавы’’. Ненэця’’ по’ ямбан’ хуркари’’ ӈарка ялэ музейхана ӈобкана ядабтамби’’.
Ӈэсындо’ сидя ю’’ самляӈг похонда тэввам’ мэ’’манзь я’ ханярид ненэця’’ ма’’лыць. Ӈули’’ нерде’ манзаранито’ ед’ ненадо мядондидо’ сава вади хэтыбиць. Мал’ ӈокхандо’ минрена серто’ няю’ ненадумда’’ми’’ падро ня’’маць. «Ямал — нюна’’ я!» ассоциация’ нерм’ пэртя Эдуард Яунгад, тикахад Ӈэрм’ тер’’ серо тасламбада департаментм’ ня’’амбада Ульяна Каленюк ӈобтикы ихид миндя’’ вади мэ’’ӈаханзь.
Автор: Алла Вануйто
Авторы
Няръяна Нгэрм
Темы