Фото: Юлия Талеева / Няръяна Нгэрм

<div class="content-lead">Тандаярка округна’’ тодо’’ тэнз’’ ила’ саирм’ вадета центрхана «Истории Тыко» проектм’ минрена’’, «Ясавэй» Ассоциация’ тер’’ нина’’ ӈобнзер’’ ма’’люрӈаць.</div>Илья Константинович Вылка’ соя’’махад 140 по’’ ваера’’. Ӈарка, мэбета ненэць’ яндаха’’на юнета падтаӈгода ӈэвы. Вадако, сюдбабц теневавы. Илья Вылка соя’’ма’ ялян’ «Ясавэй» Ассоциациява’’ мэкад серм’ хамадавысь. Округханана’’ «Истории Тыко» сидндетимдей проект конкурсхана нерня’ тарпвыць. «Ясавэй» няби ӈармы ненэцие’’ Советхана мэна Марина Хатанзейской таняна мэвысь. Пыда тарця’’ вади хэтась: «Ельцьхананда ӈадимы тарана манзая округна’’ ӈацекэхэ’’ ӈока несэй ӈамгэм’ Тыко Вылка’ ила’ нямна хэтаӈгу. Едэй Я’ хурка ӈэвам’, ӈамгэ таняна вадёдавам’ тохоламбаӈгу’’. Тамна ӈани’’ ӈавэ харто’ илесь’ ӈэсыхынандо’ сертабаӈгу’’. Маня’’ ӈарка няхадана’’ ӈармдыва’’»!Александр Терлецкой илаӈгад мэвы сер’ нямна тарем’ лаханась: «Мань хасава нюни ня’ пивна ядэрць, мурал’ хэвувна миӈанинзь. Пыда Илья Константинович’ падта’’мам’ сэвтесь, хонаркусь: «Тикы хибя?» Мань ханзер’’ мян’’ӈав, нянда хэтав. Тарем’ тасла, Тыко Вылка’ ил’ тэри ил’ вуни ӈа’’. Пыда варемда мэць харта яхананда илевы, ӈокавна манзаравы, ямда сахарамбавы. Тюку ялян’ таслась, иламда ӈацекэхэ’’ вадець тара. Харто’ ныхыто’ ена вадёнабто’, ивнандо’ ӈэда’’ харвабцудо’ нерня’ минаць минреӈгудо’. Илесь ямдо’ мэнеӈгудо’. Тыко Вылка’ нямна ӈадимдевы’’ книга’’ сиддо’ табедамбаӈгу’’».Едэй проектм’ ханзер’’ минревам’ таняна манзараванда’’ ненэця’’ тасладонзь. Ӈацекы’’ е’’эмня падвы сидя книга тадри’ мале ӈадимдаӈаха’. Вэба ирий’ пудана яля’ ӈэсонд’ сертабаӈгудо’. Тикы’ поӈгана ӈацекы’’ е’’эмня «Вокруг Новой Земли вместе с Тыко» нюбета хэбидя ялям’ хамадабаӈгу’’. Ненадо ялэдо’ хор’’ ирий’ пудана яляха’’на мэтыдо’.Манзаямдо’ «Ясавэй» ассоциация’ ня’ сертаӈгудо’. Паднавы’’, книга’ терм’ ма’’ламбавы’’ ненэцие пуна’ нядаӈгодадандо’ нюмдеӈгудо’.Автор: Юлия Талеева’ падвы

Ӈацекы’’ е’’эмня падвы манзая

<div class="content-lead">Россия’ яна’’ тиӈгэвна илена’’ ненэцие’’ тэнз’’ поӈгад туӈго’’ тэнз нито’ пуй ӈадимы. Пыдо’ паӈгодо’ юкад вата сидндетимдей векхад якут’’, эвенк’’, ӈэрм’ няӈы’’ луцахат пере’’.</div>Ӈокаюм’ туӈго’’ илелава’ ядо’ Енся’ няна ӈа. Ханяӈыдо’ Якутия’ республикахана иле’’. Толыр’’манандо’ туӈго’’ сидндет ёнаркад ӈодь ӈокамбой’’. Илева’ пыдо’ хэвханандо’ эвенк’ тэнз’’ нидо’ мэ’’. «Дуулган»ӈэ — «еркы ненэця»ӈэ сиддо’ нюмдебавы’’. Харто’ пыхыдадо’ «тыа-кихи»ӈэ — «мюсерта»ӈэ нюмдебавыдо’.Тяхакуй’ похо’’на туӈго’’ вадам’ якут’’ вада’ хара’ тэнзӈэ толабидонзь. Учёной’’ тохоламба пява’’ пуд, ӈаркавна яӈгаванда нид, яӈгня вада’ тэнзаӈэ толаба пядонзь. Туӈго’’ помнандо’ самляӈг вабцандо’ тэнзм’ мэць лаханакурӈа’’. Ӈэрм’ ненэцие’’ поӈгад вадавнандо’ ӈани’’ нито’ пуд падвы’’ падродо’ ӈадимяць. 1979 похона алфавитм’ сертаць. Сидя по хэсь, букварьдо’ ӈадимясь. Теда’ харто’ вадавнандо’ лаханакурць теневанадо’ тянё.<div class="content-new-image"><img alt="pic" src="https://storage.yandexcloud.net/ym-sites-static/96a4995d-1ef.webp" style="width:100%" height="1218" width="2167"/><div class="content-image_child">Фото: Марина Яр / Няръяна Нгэрм </div></div>Пыдо’ ӈобтикы хане’’, халям’ пэрӈа’’. Та’ мюсертидо’ выӈгана тыдо’ пэрмыдо’, сыв’ пэдари’’ я’ няюмна ядэрмы’’. Я’ ниня сыранда яӈгоб’’, тыдо’ масито’ ниня ӈэдалёрць мэ’’мыдо’. Сыв’ ненэй ненэцие’’ няби тавысо’’ мысодовна ӈэдалёрць хано мэ’’мы’’.Невхэт туӈго’’ ненэй мядо мярыбавы’’, «дю»ӈэ нюмдебавыдо’. Ненэй ненэцие’’ тотрев’ ӈани’ ты’ хобахат сэдвы’’ мюйкохо’’на, еяха’’на есебавыдо’. Ханяӈыдо’ мядодо’ пя’ сябтаха’’на, я’ хобаха’’на синдабавыдо’. Тамна луцадарев’ харад’ мядо мимбавы’’. Теда’ мюсертидо’ мятандо’ балок мэ’’ӈа’’. Тикыто’ нярмаӈэ ӈани’ ты’ хоб мэ’’ӈа’’. Тюку илаӈгана тэхэ’’на мэна’’ туӈго’’ тяню’’, ӈокаюм’ пелдо’ хардаха’’на иле’’.Ембдяродо’ ӈани’ хуркари’’ ӈэсь пэрӈа’’. Сыра’ мэта паныдо’ ёря’’ ты’ хобахат сэдыбидо’. Яндадатандо’ носи’’ хобахат, тэваси’’ хобахад сэдвы’’ ӈаво мэ’’ӈа’’. Таӈы’’ ӈамгэридо’ нойхад сэдвы’’. Мяканато’ тохокад сэдвы’’ имбытадо’ мэць ядэрӈа’’. Тикы ӈамгэридо’ хуркаривна падтамбидо’. Не’’ туӈгосы’’, хэвханандо’ илена’’ якут’’ не’’ тотрев’, ненэй есяхад ядвы’’ хавопи, сыдыр мэ’’ӈа’’.<div class="content-new-image"><img alt="pic" src="https://storage.yandexcloud.net/ym-sites-static/8a806364-c5c.webp" style="width:100%" height="402" width="714"/><div class="content-image_child">Фото: Марина Яр / Няръяна Нгэрм</div></div>Туӈго’’ поӈгана ӈока хибяридо’ луца’ хэхэн’ туёць иле’’. Мюсертидо’ тикы яхана илевы’’ невхы’’ ненэцие’’ тотрев’ я’ хэхэн’ — «иччи» ныхын’ пунры’’. Якутато’ тотрев’ ӈани’ сава’ няӈы, вэва’ няӈы хэхэюдо’ таняӈаха’: «айыы» няби «абаасы». Хэбидя ныхым’ мэта сармикадо’ ӈани’ ӈобтикы таня’’. Тарця ӈамгэӈэ вэнеко’’, ты’’, пивна ядэрта’’, варк’’ ӈэсь пирӈадо’.Невхэт вадета’’ лаханакудо’, ва’’алдо’ ӈани’ хэвхы’’ нито’ вадета’’ то’’олха’’ ӈэвы’’. Тиканда туӈго’’ сёдо’ якут’ «олонхо»‘ тотрев’ пон’ мэ’’эйдо’. Хуркари’’ серка’’на тикы’’ ненэцие илелава’ яханандо’ нерня’ пэръядо’. Харто’ вадамдо’ тохоламби’’, невхы’’ иринато’ пэрмы’’ серо тензебтембидо’. Ӈарка яляха’’на вадавнато’ сё мэ’’ӈа’’, тара’’. Сэдорава’, мирма’ серм’ вадёдана’’ ӈацекэхэ’’ ӈани’ манэ’’лабтамбидо’. Ӈобт’ ма’’лёбто’ «хэйро» тарабцом мэ’’ӈа’’. Маймба тараваханандо’ таняӈы я’ тер’’ ӈоб’ ня’ ӈэвамдо’ манэ’’лабтамби’’.Автор: Алла Вануйто’ падвы

Тыа-кихи – мюсерта’’ ӈэрм’ тер’’

Фото: Анна Яптик / Няръяна Нгэрм

<div class="content-lead">Ӈацекы тохоламбади’’ ӈарка яля’ нерня хусувэй хибя сита тохоламбвыда тензибтембасеты. Тикы няхатато’ ненэця’’ хуркари’’ илека’’ серк’’ тохосеты’’. Пыдо’ ӈока хибям’ иландо’ сер’ тидхалць нядасеты’’.</div>Теда’ харто’ вадидо’ минрена’’ нина’’ нямна лаханаван харвава’’. Ямал’ яханана’’ ӈэрм’ тер’’ ненэцие’’ вадам’ ӈока школахана тохоламбидо’. Хари’’ вадам’ минрена’’ ненэцие’’ нямна Виктория Лаптандер лаханась. Теда’ округна’’ ӈацекы тохоламбади’’ манзаям’ тидхалембада институтхана «старший преподаватель»ӈэ тара. Школаха’’на ӈацекы тохоламбада’’ нида ӈоб’’ ядабтамба пэръяда.Виктория Викторовна’ вадавна, ӈыхы’’ харад’’ няна манзарана’’ няха’’ната манзаравада ихинянда сава. Институтхана хари’’ вадам’ минрени’’ серо тасламбвадо’ Ямална’’ ваць ненадумдӈэ тарана сер’’. Ӈэрм’ тер’’ вади’’ нямна идо’ нярканани’’ нидо’ ма’’ламби’’. Ӈобкана тасалко тохолкова’ падродо’ тидхалембасеты’’. Ӈэрм’ тер’’ вадавна миндя’’ урок’’ ед’ ӈэда’’ падро несэймдамби’’. Тарем’ ненэй вадавна, хаби’’ вадавна, тасу’ хаби’’ вадавна несэймдавы’’ тохолко падар’’ ӈадимяць. Теда’ школаха’’нана’’ ӈацекы’’ ӈокаюм’ пелядо’ едэй учебник’’мана тохолку’’. Хусувэхэт школа’ серка’’на едэй ӈадимдембада’’ сер’’ ӈадиберцеты’’. Тиканда ӈацекы тохоламбади’’ манзаям’ сибилембава’ няд’’маӈэ тохолковадамдо’ сертабасеты’’. Сяхаӈгав’ Ямалханана’’ «Учитель родного языка Ямала» пирдырма ӈадимясь. Тедахав’ маня’’ школаха’’нана’’ манзаранина’’ ӈани’’ я’ терха’’на пирдырманзь ханцеты’’.Харто’ вадидо’ тохоламбади’’ ӈацекы’’ ед’ хуркари’’ илека’’ серо ӈани’ ӈадимдемби’’. Неноховавна сямян ва’’лёйто’ ед’ конкурс, олимпиада, фестиваль сертабасеты’’. Тюку по’ сававна пыхыдадо’ тохолкова’ серкана табэдавы’’ ӈацекы’’ няць ӈарка’’ маро’’ няю’ ӈэдалёрманзь хан’’ӈаць.Виктория Викторовна’ вадавна, хэ’’ли’’ хибяха’’на ӈацекы’’ тохоламбава нензел’’ сер’’ ни ӈа’’. Пыдо’ невхы’’ сяхаӈгав’ иринато’ мэ’’мы вадам’ тохолкодахато’ минре’’. Харто’ вадандо’ грамматикам’ тохоламбавадо’ вади лэтрамбава’ няю’ ӈани’ ӈарка сава сер’’. Паднавадо’ вацьдандо’ мэпто’ хуркари’’ конкурсаха’’на тара.Лаханакурць ня’’мы нява’’ ӈацекы тохоламбади’’ нита’ ед’ савари’’, сейха’’нато’ пойда вадаридамдо’ ӈэдарамби: «Ӈацекы тохоламбада’’ сяхаринда манзаямдо’ сава ихина минремдо’. Теневана’’ серодо’ тохоламбадахато’ ваде’’ядо’, пыдо’ иринато’ мэ’’мы вадам’ пилибт’’ намдорӈамдо’. Ва’’лёй ӈацекыдо’ хуркари’’ илека’’ серк’’ тидхалембидо’, намдвыдо’, тохолавыдо’ сяхаӈгав’ илаӈганандо’ таротыдо’».Автор: Алла Вануйто

Вадам’ минрена’’ нина’’ ед’

<div class="content-lead">Вэба’ ирыхына Законодательной Собрание’ ӈэвахана мэна ерв ненадо тасалковам’ мэ’’ӈась. Пыда ӈобт’ ма’’лёвы’’ депутатха’’ Ӈэрм’ тер’’ илам’ савумдава’ няю’ ӈэда вато’ нямна лаханась.</div>Россия’ яна’’ нермбэртя’ табековна небой поход яханана’’ ервона’’ «Концепция устойчивого развития коренных малочисленных народов Севера ЯНАО» нюбета проетм’ падыби’’. Теда’ ӈока нита сякана Сергей Миронович Ямкин падвыдо’ ваде’’мы.Я’ мидыхыд харто’ яха’’нато’ илена’’ толыродо’ тянё Ӈэрм’ тер’’ ед’ сертавы’’ табекудо’ 2036 по’ ёльцянд’ нёдаӈгуна’’.Неноховавна ӈэвахы сертандо’ мат’’ илна’’ паӈгӈэ толёда’’ серо мэвы’’, тикы’’:— я’ сяр’ нийм’ сяма, хабтомдамбава;— невхы ила’ саирм’ нёдава, ты пэрмам’, ёрмам’, ханевам’ тарулава;— илесь, мюсерць ё лэтрамбава, таӈга нись тоса илева;— тохолкова’ серо нерня’ тидхалембава;— тодо’’ тэнз’’ ненэцие’’ вади, иландо’ саирм’ лэтрамбава;— харто’ индо’ харвабцовна ӈоб’’ няю’ нятна’’ ненэцие нядабава, ӈобкана община’ терӈэ мэвамдо’ таруламбава.Тикы’’ серо иланд’ тэврава’ е’’эмня округна’’ тиӈгывна мэта’’ закон’ вато хаця несэймдамбаӈгудо’, едэй программа сертабаӈгу’’. Тохолкова’, вади лэтрамбава’ серкана едэй мутра’’ няд’’маӈэ тараӈгу’’. Ӈэрм’ тер’’ илам’ тасламбава’, тоенана’’ серо сибдамбава’ мальӈгана ӈэрм’ тер’’ ненэцие хонрамбаӈгу’’.Сергей Ямкин’ вадавна, 2036 по’ пиркана Ямал’ ӈардавна мюсерта’’ ненэциена’’ таӈга илеӈгу’’, невхы’’ иринато’ мюсерць недарми тамна нёдаӈгудо’. Тикы’ е’’эмня ервона’’ падыбада’’ падродо’ тяхасовна таслаӈгудо’, тикы’ пуд Ямална’’ ӈэвахы ерван’ ӈадимдеӈгудо’.Автор: Галина Окотэтто’ падвы

Илна’’ няю’ ӈэда ватом’ падыби’’

<div class="content-lead">Хор’’ иры’ нюртей ялям’ ӈармы’’ ненэцие’’ яляӈэ ваде’’ӈадо’. Ненадо яля’ нерцю’’ манзара нята няни ня’ «Мел’’ не. Тус нэ» клубан’ ядэрӈанинзь. Ӈобӈгэв’ ма’’люрць ялямдо’ едтенинзь. Пыдо’ си’’ив яля’ сер’ ӈопой’ ма’’люрцеты’’.</div>Мел’’ не’’ ӈуданданаӈэ тарана Инна Харючи’ нита нерня товысь. Няби’’ нина’’ товам’ ӈатевахана’’ лаханакурӈаваць. Инна Анатольевна вадада тарцясь: «Ямал-ню’’на’’ я!» ассоциация’ ӈармы ненэцие’’ Совет’ паӈгсавэй, «Мел’’ не»м’ нюбе’’ӈа. Ӈадиво’’мада мале ю’’ по’ тяхама. Тамальӈгана ӈарктаӈэ Борис Григорьевич Шушаков хасаи тарась. Ӈобӈгуна ӈармы не ма’’ламба идейдаць. Анна Дмитриевна Ламдой’ хасаи, Елена Николаевна Ӈокадэтэй’, Татьяна Александровна Ямщикова тасалко пэйдаць. Сие ниць иры’ 2016 похона «Мел’’ не. Тус нэ» ӈадимясь. Елена Николаевнадо’ ӈацекы тохоламбада, ӈадьбята нида тидхалемба ёльце пир’’ӈадась, ӈамгэм’ пэрма’ нямна етри’ теневасеты. Тарем’ яебтюртахандо’ турта’’ харто’ ӈокмаць. Теда’ ӈокханда сидя ю’’ самляӈг пирва’’.Галина Хывдалевна Саляндеры’ ӈобкарт’ ма’’люрмахадандо’ нисеты варка’’. Нита понд’ ханзер’’ тэв’’мамда тензибтембись: «Елена Николаевнан’ Харп’ няд мядоманзь турцетыдм’. Си’’ми пыда тюкон’ тэврась. Юд’ по’ нянандо’ мэдм’. Сэдорасетыдм’, хуркари ӈаво ӈодякохот паӈгалпасетыдм’. Ханяӈэхэ’’на сертавы’’ ӈамгэрина’’ мирдапсетына’’. Ӈобт’ ма’’люрмава’’ нянани ёльце сава, ядэръянд таняб’’ ӈэт ни паромба санаӈгаӈгун, мякананд нин лэкдёд’’».Анна Николаевна Корнилова туӈго’’ тэнзм’ мэта не. Ӈавна Саля’ хардан’ Забайкальской край’ няд товысь. Ямал яхана илевамда саву’’ӈада. «Сэдъям’ ня’’амбавам’ ӈули’’ харвабтав. Тюкохона хар’’н си’’ни то’’олха’’ нини’’ ходамзь. Хусувэхэт маймба няндо’ ядсетыдм’. Лаханакуртава’’, иле’’мина’’ тензибтеӈгува’’, ир таӈгамды’’ — неноховавна тикы’ е’’эмня ма’’люрӈава’’. Сертабада’’ серона’’ ӈани’ таня’’, сайнорта нина’’ нядабива’’, носкадамдо’ паӈгалпива’’, тарана ӈамгэридамдо’ ма’’ламбива’’», — пыда тарем’ лахана.Тарем’ лаханакурмахана’’ сидя хабей’’ нехэ’ тюӈаханзь. Пуданди’ ӈармы ненэцие’’ Совет’ ӈаркта Кузьма Николаевич Ямкин тось. Таминда хонаркусь: «Няръяна ӈодям’ ма’’лада’’?» Тарця хонаркодам’ ӈатевэдрев’ нито’ ирмня малкурмидо’ вадець пяць. Пыда мась: &quot; Мань нини вэде’’манзь етри’ турцетыдм’. Няхата’’на’’ ӈоб’’ теневасетыва’’. Ӈармы ненэцие’’ яля’ ед’ савари вададамда’’ мэ’’ман харвадм’. Пыдара’’ иланда’’ ямбан’ манзаида’’ тид’’ минрейдаць. Ямал яна’’, Россия яна’’ илам’ савумдамба варемда мэць нерняри’ ӈадаць. Нюда’’ ӈэто’ ни санабтадаць, тохоладаць. Сензда’’ ӈада’’. Маймба, ябда иледа’’. Мята’’ тер’’ сенз’’ ӈэя’’».Автор: Анна Яптик’ падвы

Ӈармы’’ ненэцие’’ яля

Фото: Алла Вануйто / Няръяна Нгэрм

<div class="content-lead">Горнокнязевск’ хардахана ӈэда Ямал’ тер’’ ила’ саиро манэ’’лабтамбада музей’ манзаравада сидя ю’’ самляӈг похонда тэвы’’. Тикы яля’ ед’ вэба’ иры’ 19 яля я’ ханярид ненэця’’ ӈобт’ ма’’лыць.</div>Юкад вата сибимдей векхана таняӈы я’’ хабей’’ ӈарката’’, Тайшин’ еркарм’ мэта’’ ненэцие’’ я’’ ӈэвы’’. Сяхари’ пыдо’ таня’ та’ есям’ мадаванзь ӈэсоӈгавы’’. Еркарадамдо’ Василий Обдорский хасава’ нюнда Тайша’ нюмгад ӈадимдевы. 1768 похона не’ параӈода Екатерина II вато’ сер’ Матвей Тайшинм’ хаби’’ тэнзхад нерденя князьӈэ ӈэсь табэдавэда. Тев’ тенат таняна Тайшин’ еркарм’ мэта’’ ненэця’’ иле’’, яханандо’ манзара’’.2001 похона Горнокнязевск’ харад’ вэкана ӈэрм’ яна’’ тер’’ илам’ манэ’’лабтамба мэта музейм’ тидхалевы’’. Нердехэва тикы’’ серо’’ няю’ сабе ӈока сертавы ӈамгэдо’ яӈговы. Сянамбой ненэй мято’ мярвы’’. Мюсертахат хомбвы’’ ӈамгэридо’ манэ’’лабтярӈэ мэ’’мы’’. Ненэця’’ тикана ӈэда’’ ӈаво тэри мание нивыдо’ пэр’’. Хусувэй ӈамгэм’ ня’’марпа, серыба пирмыдо’. Тамальӈгад турта’’ мядондидо’ хуркари’’ илека’’ серк’ тарабтамбидо’. Ханяӈэхэ’’на мядо мярыби’’, есена’’, сэдора’’, ӈавар’’ пиремби’’. Таня’ тэворта’’ хибярихи’’на музейхана мэва сяхаринда нюрцьм.<div class="content-new-image"><img alt="pic" src="https://storage.yandexcloud.net/ym-sites-static/1e278530-5f9.webp" style="width:100%" height="1108" width="1969"/><div class="content-image_child">Фото: Алла Вануйто / Няръяна Нгэрм</div></div>Сидя ю’’ самляӈг по’’ ямбан’ таняна сянри’’ юнета’’ ненэця’’ мядомы’’. Неноховавна 2004 похона Владимир Путин тэвормы. Я’ тиӈгывна юнета Ямал’ ирина’’ 2007 похона мята ӈани’ таня’ ӈэсовы. 2023 похона едэй мутра’ сермана ӈэрм’ тер’’ илм’ ӈоб’’ кинодарев’ манэ’’лабтамбада мядм’ сертавы’’. Ненэця’’ по’ ямбан’ хуркари’’ ӈарка ялэ музейхана ӈобкана ядабтамби’’.Ӈэсындо’ сидя ю’’ самляӈг похонда тэввам’ мэ’’манзь я’ ханярид ненэця’’ ма’’лыць. Ӈули’’ нерде’ манзаранито’ ед’ ненадо мядондидо’ сава вади хэтыбиць. Мал’ ӈокхандо’ минрена серто’ няю’ ненадумда’’ми’’ падро ня’’маць. «Ямал — нюна’’ я!» ассоциация’ нерм’ пэртя Эдуард Яунгад, тикахад Ӈэрм’ тер’’ серо тасламбада департаментм’ ня’’амбада Ульяна Каленюк ӈобтикы ихид миндя’’ вади мэ’’ӈаханзь.Автор: Алла Вануйто

Илна’’ саиро манэ’’лабтамби’’

Сидяӈг: Алексей Салиндерʼ тадтавы

<div class="content-lead">Россия янаˮ ӈардавна нюсавэйˮ неˮ яӈга нядˮмадоʼ таня. Падаркана «материнский капитал»мʼ нюбеˮӈа. Тикы хусувэй ӈацекэхэндоʼ таславы нядаӈгосэйдоʼ.</div>2027 похона яра ирыʼ нюртей яляхад нядˮмандоʼ термʼ ӈокамдаӈгудоʼ, 5,2% пирувна ӈарамдаӈгудоʼ. Поʼ пудана вэкана янаˮ ӈэвахана мэнаˮ ервˮ тамна тасламбаӈгудоʼ. Вадавнандоʼ, тадриʼ тердандоʼ таранаˮ есяˮ хаця мирцяламдаˮ. Ӈадьбята ӈокамда тараˮ.2026 похона тарця нядˮмадоʼ ӈардада тамбирˮ:— нердена ӈацекыˮ еˮэй — 729 ёнарˮ,— нябимдей ӈацекыʼ еˮэй — 234 ёнарˮ пирˮ,— нердена ӈацекыʼ еˮэймʼ нивы ӈэбтоʼ няˮамˮ, тикахана нябимдей нюндоʼ сояваʼ пуд, няˮмуванда «материнский капитал»ʼ терда 963 ёнарˮ пирˮ.2027 похона нядˮмидоʼ тамбирувна ӈокамдаˮ:— нердена ӈацекыˮ еˮэй 767 ёнарˮ пирˮ ӈэӈгу,— нябимдей ӈацекыʼ еˮэй 247 ёнарˮ ӈэӈгу,— нердена ӈацекыʼ еˮэй сертификатмʼ нивы ӈэбтоʼ няˮамˮ, нябимдей нюндоʼ соябˮ, няˮмуванда нядаӈгосэйндоʼ тер 1 013 000 ӈэӈгу.Галина Окотэттоʼ падвы

Нядˮмитоʼ есямʼ ӈокамдаӈгудоʼ

Сидяӈг: Марина Ярʼ тадтавы

<div class="content-lead">Таʼ ямбанʼ Ямалʼ терˮ «Мы говорим на родном языке» нюбета придырмахана теневабцудоʼ ӈадимдембиць. Тюку поʼ сертавыˮ манзаидоʼ Ӈобˮ няюʼ нятваʼ тикахад Сензувна илеваʼ поʼ няюʼ тидхалыць.</div>Ӈокханда сертабавыдоʼ матˮ тодоˮ номинацияʼ серʼ тярмыˮ. Луца вадавна нюбедоʼ тарцяˮ: «Единство народов — сила России», «Формула здоровья по-ямальски», «Эхо предков — голос будущего», «Креативное в традиционном», «Лайфхак на родном языке», «Живое наследие ремёсел».Неноховавна хартоʼ вадамдоʼ теневавамдоʼ, иландоʼ саирмʼ нёдавамдоʼ ӈадимдембавыˮ. Ӈадьбята ненэй ненэцяˮ, хабиˮ, тасуʼ хабиˮ, ӈысмаˮ невхыˮ иринатоʼ вадавна хэбицяко «видеоклип» сертабавыˮ. Тикытоʼ ямбдадоʼ 1 — 3,5 минута ӈэвыˮ. Тамна ӈопой нёдавы табекодоʼ — хартоʼ тэнзандоʼ паны, мальци мэпатоʼ таравы.Сёётэйˮ, таранаˮ, мелˮ ненэцяˮ пилюˮ ирыʼ 23 яляʼ ёльцяндʼ тэтнавыˮ. Ӈокханда 118 пирдырта ӈэвы, пыдоʼ 63 видеороликмʼ ӈэдабтавыˮ. Ӈэрмʼ терˮ серо няˮамбада департаментхана нядандоʼ ненэй вадавна — 26, хабиˮ вадавна — 22, ӈысмаˮ вадавна — 14, тасуʼ хабиˮ вадавна — 1 манзаямʼ няˮамвыˮ. 19 харадʼ терˮ теневабцудоʼ ӈадимдембавыˮ.Ненэй ненэцяӈгат нерняʼ хаˮамвыˮ нюбедоʼ тиˮ: 8 — 12 потнаˮ ӈацекэхэт — «Лаптаʼ терˮ» нюбета коллектив (Сеяхаʼ терˮ), 13-17 потнахат — Яр-Салеʼ тер Родион Худи, ӈарка ненэцяӈгат Сеяхаʼ тер Олеся Салиндер.Тарця сава пирдырмахана мэвыˮ вэбаʼ ирыʼ 17 яляʼ пуд малˮ ненадумдаˮмаʼ падартамдоʼ няˮмаӈгуˮ. Сямянхат ваˮлёйдоʼ ӈудитоʼ терӈэ «диплом»дамдоʼ, ненадо мядонзэйдамдоʼ ханаӈгуˮ.Галина Окотэттоʼ падвы

Харˮнаˮ вадавнанаˮ лаханаваˮ

Сидяӈг: Анна Яптикʼ тадтавы

<div class="content-lead">Ямалʼ терˮ еˮэмня хусувэй поʼ ненадо пирдырмаˮ танясетыˮ. Ӈопойдоʼ паднанаˮ ненэцяӈгˮ таславы. Тодоˮ тэнзмʼ мэтаˮ нинаˮ падна теневабцудоʼ ӈадимдембасетыˮ. Сямянхат ваˮлёйдоʼ ӈудитоʼ терӈэ есядамдоʼ недвоцетыˮ. Тюку поʼ ӈаниʼ пирдыртаˮ.</div>Ненэцяˮ падродоʼ вэбаʼ ирыʼ 10 яляхад хорˮ ирыʼ 29 яляʼ ӈэсондʼ Ӈэрмʼ терˮ серо няˮамбада департаментанʼ ӈэдабтамба пиртыдоʼ. Ӈахат серʼ таняна манзаранаˮ сиддоʼ нядабаӈгуˮ, тидхалембаӈгуˮ. Падаркана тикы пирдырмадоʼ луца вадавна «Конкурс по присуждению специальных премий Л.В.Лапцуя, П.Е.Салтыкова, С.И.Ирикова» нюбеˮӈа.Таняна ненэй вадавна, хабиˮ, тасуʼ хабиˮ вадавна паднанаˮ ӈэрмʼ терˮ пирдырць пирӈадоʼ. Манзаидоʼ Ямалнаˮ газетахаˮна ялянʼ ӈадимдевыˮ ӈэбтоʼ сероˮӈаˮ. Падвыдоʼ няхарˮ номинацияʼ серʼ тярмыˮ ӈэӈгуˮ. Тикыдоʼ небой поход ниˮ яӈгˮ: «Родная речь», «Община — вчера, сегодня, завтра», «Ямал — мой дом», «Семья». Нитоʼ поӈгад ваˮлёйӈэ таславыˮ самляӈг юˮ ёнарˮмана няˮмаӈгуˮ. Тикыʼ хавна хусувэй ненэцяндʼ ненадумдаˮмаʼ падартамда митаˮ.Манзаидоʼ интернетувна ӈэдабтамбаӈгудоʼ: dkmns@yanao.ru Тэри почтавна ӈаниʼ ӈэдара пиртыдоʼ, адресдоʼ ти: 629008, г. Салехард, ул. Гаврюшина, д.17. Тамна хонраванда танябˮ, телефонувна лахана сава: 8 (34922) 6-70-21Галина Окотэттоʼ падвы

Паднанаˮ пирдыртаˮ

Сидяӈг: Анна Яптик тадтавы

<div class="content-lead">«Наследие»мʼ нюбета толаӈговаʼ хардахана ӈэрмʼ терˮ етриʼ ӈобтʼ маˮлюрӈаˮ. Хахаяда яляʼ Елена Тимофеевна Пушкарёва еˮэмнянаˮ ӈобˮ илека лахарёмʼ минресь. Тасламбавэдоʼ — ханзерˮ падартʼ падабавыˮ илеˮмявна толаӈгодаˮ хибяриˮ ненэциеˮ илʼ саиро хамэдамба пяӈгуˮ.</div>Елена Тимофеевна илеванда ямбанʼ ненэциеˮ илʼ нямна, падарциˮ иʼ ӈутʼ мэвыˮ ӈавори: лаханаку, ярабц, сюдбабц, ваˮал, ӈаниˮ ӈаво маˮламби, падыби. Тохоламбвытаʼ нямна мале ӈока наукаʼ няӈы падро падвы. Пыда юнета ненэй ненэцьʼ, учёнойˮ поӈгана историяʼ нямна «доктор исторических наук» нювмʼ мэˮӈа. Лахарёмда хасаваʼ нянда падыбавэвна минредась.Николай Тимофеевич Лапсуй — халямʼ пэрта ненэцьʼ. Пыда юкад вата ӈопой поʼ илеˮмида падартʼ падыбавыда. Хусувэхэт пэрмыˮ серота, маниевыˮ ӈамгэта нямна ӈобˮ паднавы. Мята терˮ, хэвхыˮ нитаʼ илмʼ ӈаниʼ вадеˮмэда. Халямʼ пэрмаʼ серкана хуркаˮ мирво мэць ханевыˮ, тикы яляʼ хурка нумʼ ӈэвамда ӈаниʼ вадець нивэда юрыбюˮ. Тамальӈгыˮ янда терˮ ненэциета илʼ падвэхэˮната ӈаниʼ таня. Таремʼ падыбавыда ӈаниʼ вадавна манзь наӈэдя «дневник». Ханяӈэхэˮна пыда мята терˮ нида тиканʼ ӈаниʼ падна пэрмыˮ. Нерденя матад поʼ падыбавыда луцаʼ вадаривна минревыда. Тад тальцюна ненэй вадавна ӈаниʼ паднавы. Таремʼ илевандоʼ серʼ мале сян тетрадкаʼ, блокнотʼ терӈэ хэвыˮ. Мята терˮ нита няʼ маˮлавы илеˮмидоʼ книгаӈэ серта таславыдоʼ. Книгамʼ сертабава нензелта яӈгу, тиканда Елена Тимофеевна нямда нядабадаӈэ ӈобˮ таравы.Тетрадкахаˮ, блокнотхаˮ падыбавыˮ илеˮмидоʼ сидя книгаʼ терӈэ хэвыˮ. Ӈокхандоʼ сидндет юрˮ страница. Ненэй вадавна вадетитоʼ хэванʼ луцаʼ вадавна падвыˮ сертавыˮ. Ненэй дневникхаˮнатоʼ падвыˮ илеˮми сидяӈгˮ ӈаниʼ таняˮ. Ӈадимы книгандоʼ нюмда «Маняˮ илеˮминаˮ. Дневник рыбака.»Книгаӈэ хэванда нерняʼ мале танякуй похона «Няръяна Ӈэрм» газетахана падвыда ӈаниʼ ӈадиберӈаць. Газетаваˮ толабадаˮ нинаˮ няндоʼ падвыˮ нерденаӈэ толэйдонзь. Николай Тимофеевичʼ падвы толабабˮтоʼ, манзетыˮ: «Ёльце хайна». Хартоʼ хусувэй яляʼ илеˮмидоʼ ӈодˮ ӈаниʼ тикы няндоʼ тоˮолхаˮ ӈыˮнимˮ. Ӈадьбятоʼ няндоʼ падвыˮ лаханакодаревʼ хайнаˮ.Маˮлёвыˮ нинаˮ тэриʼ ӈопой ненэцяʼ, ӈобˮ мядʼ терʼ илеˮмяри ӈэвамда вуниˮ манэсˮ. Падвыда ӈока хибяриˮ ханзерˮ илевамʼ манэˮлабтамбиˮ. Галина Павловна Харючиʼ вадавна, сяхариʼ вадетида наукамʼ минренаˮ ненэцие тохоламбадаˮ серкаˮна тародоʼ таняӈгу. Ненэсянда ӈодˮ Николай Лапсуйʼ падвы книга «Маняˮ илеˮминаˮ. Дневник рыбака.» ӈэрмʼ терˮ ненэциеˮ илмʼ тохоламбдахаˮна ӈарка нядˮмаӈэ тараӈгу. Тедаʼ тюˮуʼ миндяˮ ӈацекыˮ сяхаӈгавʼ тикыˮ ӈаво толабабˮнандоʼ ӈока ехэранаˮ, юрвыˮ серо хось пиртаˮ. Нюдяне Махакуйʼ падвы

«Маняˮ илеˮминаˮ»

Сидяӈг: Анастасия Салиндерʼ тавы

<div class="content-lead">Вэбаʼ ирыʼ 7-11 яляхаˮна Липецкʼ хардахана «Лучший учитель родного языка и литературы» самлянзимдей мэваʼ ӈась. Тодоˮ тэнзˮ ненэциеˮ ӈобтʼ нятва похона ӈобтʼ маˮлыць. Конкурсдоʼ вэбаʼ ирыʼ 8 яляхана Россиянаˮ тодоˮ тэнзˮ ненэциеˮ вадиˮ яляхана нэяць.</div>Хареˮ вадамʼ няби литературамʼ тохоламбава саць тарана серˮ. Ӈацекыˮ хареˮ вадамдоʼ тохоламбвахандоʼ невхыˮ илеˮминаˮ, паӈгонаˮ ниˮ ёходˮ. Самляӈг поʼ серʼ ӈока ненэця таняна тоходанвы, манзаямда ханзерˮ минревамда, ӈацекы тохоламбаваʼ няюʼ тидхалёда серода вадеˮмы.Тюку поʼ маняˮ яхаданаˮ, Ямалхаднаˮ Анастасия Окотэтто няби Анастасия Салиндер ядэрӈаханзь. Сидябты Яр-Саляʼ хардахана манзараӈахаʼ. Анастасия Пирчикувна «Солнышко»мʼ нюбета садиканʼ ядэрта ӈацекы няхарˮ поʼ ненэй ваданʼ тохоламби. Анастасия Викторовна Василий Давыдовʼ нюмамна нюмдевы школахана сидя юˮ поˮ вадамʼ минренаӈэ тара.— Нюртей мэваʼ тарця конкурсанʼ еремядмʼ. Ӈарка янаˮ тодоˮ яхат товыˮ ниниˮ манэˮӈадмʼ. Таремгавʼ мань тюконʼ тось нидамзь енаˮ. Нямэхэна округхананаˮ нябимдей янʼ хаˮмываць. Тедаʼ няби няни еˮэйӈэ сиˮми ӈэдараць. Харˮн ябми сиˮми ехэрана янʼ тэвра. Ёльце сава ӈэвы. Туӈгос, мандо, тамна ӈаниˮ тэнзˮ ӈопой яхана манэˮян. Ӈэрмʼ терˮ хавна луцаˮ, хадянˮ, чеченецˮ, якутˮ, бурятˮ тикахана мэць. Пыдоʼ малʼ манзаидоʼ тидˮ теневанаˮ, хареˮ вадидоʼ сахарамбадаˮ ненэцяˮ. Сямянхат ӈока поʼ тарця сермʼ минренаваˮ 48 поʼ манзара. Ӈармыˮ ненэцяˮ варемдоʼ мэˮӈаˮ, сяхаӈгавʼ пявэмдоʼ тенатʼ индоʼ яданʼ ваˮлёйвана пэръядоʼ. Пирдырмаваˮ няхарˮ янʼ тярмысь. Нюртейхананда няхарˮ юдмʼ тэраць. Школахаˮна няби садикхаˮна манзаранаˮ ӈобпирсаць. Ӈэрмʼ терхат нерняʼ хэвыˮ нинаˮ едʼ няркнаваць. Пуна юдмʼ тэраˮмахадандоʼ Карелияʼ тер Глеб Юрьевич Фомин ваˮлёйхат ваˮлёй ӈэвысь. Якутияʼ тер Надежда Максимовна Очирова эвенской вадамʼ пэрта няхаромдэясь. Тикы няхаюнаˮ едʼ ӈулиˮ маинаць. Нинаˮ ханзерˮ манзаравамʼ намдаваˮ. Ӈарка ервоˮнаˮ вадаˮ сейхаˮна лимбикавна хаˮморӈаць, минрена манзаяваˮ савуˮмамдоʼ хэтыбиць. Тохолкурмаʼ хавна «Казаки России» ансамбль хыноˮӈась, сёёдоʼ тэри хайнаць. «Кудыкина Гора»мʼ нюбета экскурсиянʼ сиднаˮ ядэлаць. Яʼ ӈылад муӈгарта идмʼ хорпиваць. Тыбыёвамʼ манэˮӈаваˮ, тыбыёваʼ таркˮ малʼ нянанаˮ содаваˮ. Липецкʼ харадмʼ сававна торомдаваˮ — ядэроˮмамда Анастасия Викторовна таремʼ вадеˮӈадась.Ӈамгэри пирдырмахана нядаӈгода ӈока. Тедаʼ тюку няхаюнаˮ хусувэй серкана округваˮ нядабихиюдась. Ӈобӈгэвʼ хэвханандиʼ табековы нядиʼ — Ольга Юрьевна Соловьёва, янаˮ тохолкова серо нерняʼ пэрта институтхад ӈа. Тамна ӈаниʼ ӈопой нядаӈговэдиʼ ӈэрмʼ терˮ вадахаˮ ӈацекы тохоламбада ассоциацияʼ ӈэвахана мэна Светлана Ивановна Тусида. Пыда маньринаˮ янаˮ тер нивысь нядабюˮ, ӈэрмʼ терда малʼ нерняку пэрмыдась. Таддикахад «жюри»ӈэ таравысь. Серкат теневанаˮ ненэциедоʼ Москваʼ маркана, ӈаниˮ тодоˮ яхаˮна манзаранаць.Анна Яптикʼ падвы

Вади ӈулиˮ лэтрамбидоʼ

Сидяӈг: Салиндер Алексейʼ тадтавы

<div class="content-lead">Округнаˮ ӈэвахана мэна ерваваˮ янаˮ серо минрена ерво маˮламбись. Манзара нита няʼ ӈарка тасалковамʼ мэˮмыць. Ӈэрмʼ терӈэ сероˮнаˮ ханзерˮ мимаʼ нямна ӈэрмʼ тер» департаментнаˮ ӈудандана Ульяна Каленюк лаханавысь.</div>Ненадовна тодоˮ тэнзˮ ненэциеˮ невхы иландоʼ саирмʼ нёдаваʼ едʼ ӈэда юдʼ помʼ вадеˮӈаць. 2022 поход 2032 поʼ ӈэсондʼ хареˮ вади лэтрамбава поӈэ таславыˮ. Вадиˮнаˮ нива юхурмаʼ еˮэмня Россиянаˮ тиӈгывна яӈга ӈарка манзаямʼ пяць. Тюˮудʼ минда падарˮ яра ирыʼ 9 яляхад 2022 похона пидтевы. Тикы табеку падармʼ нядˮмяць сиеˮ ниць ирыʼ 1 яляхана 2022 похона хареˮ яхананаˮ сертабавандаˮ манзаиˮнаˮ падарˮ ӈадимясь.Тедаʼ тюку маˮлюрмахана Ульяна Алексеевна ӈамгэмʼ сертаба пяˮмаваˮ, хуркаˮ нядˮмиˮ ӈадимямʼ, тад нерняʼ ӈамгэʼ тоˮолха серо пясь таравамʼ хэтась. Пыда вадавнанда программандоʼ мюня тет юˮ матˮ серˮ ӈа. Матˮ янʼ тярмытоʼ пондʼ тохолковамʼ, научной манзаи, едэй мутра, илаʼ саирмʼ лэтрамбавамʼ, юне тэволавамʼ, ӈаниˮ ёˮ терˮ няць манзаравамʼ мэвыˮ.Ямалхананаˮ вадинаˮ няби иланаˮ саирмʼ лэтрамба сиднаˮ нядабиˮ. Ӈацекынаˮ школахаˮна ненэцяʼ, хабиˮ, тасуʼ хабиˮ, ӈысмиˮ вадамʼ тохоламбиˮ. Яхананаˮ падвы учебник Россия янаˮ ӈардавна мэˮядоʼ. Таддикахад яхаданаˮ Ӈарка яʼ ӈэсондʼ, Ензяʼ терхаˮ, ӈысмиˮ илелава янʼ тэволэйдоʼ.Тохолковаʼ нямна ӈэда иӈуд савуˮядоʼ. Ӈацекыˮнаˮ еˮэмня «Арктическая олимпиада» пирдырмамʼ минреˮ. Вадамʼ минрена ӈацекы тохоламбадиˮ ӈаниʼ хартоʼ пирдырмадоʼ таня.Ӈацекэхэˮна манзараван харвана тохоламбиˮ. А.И. Герценʼ нюмамʼ мэта университетанʼ 2017 поход 2025 поʼ ёльцяндʼ ненэцие ӈэдарамбавыць. Тикэхэтатоʼ юкад вата хасава ютоʼ тохолковамда малевэда. Тохолкован харвана тедалахана маˮламбидоʼ. Выӈгана ӈацекы тохоламбдаӈэ манзаран харвани ӈобтикы хамэдамбидоʼ.Аспирантурахана мэнахаˮ юрˮ ёнарˮ еся нядˮмамʼ мипиˮ. 2021 поход 15 тохолкодамʼ нядавыˮ.Едэй мутра нядˮмяць приложения, комикс, сянакубц сертабиˮ. Таддикахад юне падартʼ падыбавамʼ, телевизорхана манэˮлабтамбавамʼ ӈаниʼ нерняʼ пэрӈадоʼ.Маняˮ ӈэрмʼ терӈэ вадавнанаˮ ялэхэˮ паднаваˮ. Хуркари юне интернетʼ мутравна ненэцяӈгˮ тэволаваˮ. Падыбадинаˮ ханярина манэць пиръядоʼ.Ӈамгэʼ тоˮолха серо пясь таславамдоʼ тамна саваркавна хорˮ ирыʼ юкад вата самлянзимдей яляхана вадетадоʼ.Анна Яптикʼ падвы

Сертавыдоʼ ӈахакуд тидхалембиˮ

<div class="content-lead">Ӈарка янаˮ ӈардавна вэбаʼ ирыʼ самлянзимдей яляʼ ӈэсондʼ таборо маˮламбаваʼ нямна ӈэда акция миӈась. Тикы сермʼ Ямалхананаˮ ӈаниʼ минредонзь. Маняˮ Саляʼ хойʼ хардахана таборо маˮламбиваць. Ларь яхаʼ вармʼ хабтумдамбиваць.</div>Харадʼ терˮ тарця сермʼ малʼ савуˮӈадоʼ. Мань ӈобтикы хабтоʼ яʼ ниня илеванаˮ нямна няркнадмʼ. Ӈадьбята юˮ часʼ пиркана ниниˮ тотревʼ мале тодамзь. Нунаˮ ненэциеˮ някуʼ нэкалӈав. Мэˮманда ӈамгэридамдоʼ няˮмарпавыˮ. Нянаˮ тюсьда имбытадоʼ, ӈоксяку, ӈоба, нензо пад таˮ. Пуна ямʼ сямаʼ едʼ манзаранаˮ ервˮ вадамʼ мэˮӈаˮ. Малʼ яʼ сярʼ ниймʼ таборопа нива тараваʼ нямна лаханаˮ. «Особенности национальной уборки» акциямʼ минренаˮ ӈодˮ маˮ: «Тюку яляʼ яхаʼ вархы таборо маˮлаӈгудаˮ. Хибяраˮ сяӈокмʼ тэвра — падартʼ падыбаӈгунаˮ. Пандавыˮ паддаˮ ӈыдабаӈгунаˮ».Идоʼ саваˮ ненэцяˮ яхаʼ варувна сидяʼ няʼ нэкалӈадоʼ. Ныланаваʼ яӈэ таславы табʼ ниня сабе ӈока таборˮ яӈговысь. Тарця ӈэвада ненэсянда сава, тикахананда ненэцяˮ ямдоʼ сяӈадоʼ, нидоʼ таборопюˮ. Маняˮ няӈы яханаˮ варʼ ний таб хабторкась. Сядʼ ӈылрид, пиˮ поӈгад пэˮ тахараˮми, есиˮ лоӈг, нензо пад хомбиваць.— Тедаʼ ненэцяˮ ханяриʼ хэбтоʼ табородоʼ нянандоʼ содабидоʼ. Малʼ таремʼ пэрпатоʼ сава ӈэӈгусь. Ямдоʼ ниня сяндаˮ таремʼ ӈодˮ таняˮ. Ӈадьбята маˮлюрць тара. Ямʼ сянзь мэˮмаʼ няримна ниваˮ няркнаˮ, ӈобтʼ маˮлюрмаʼ ёльцяӈгана тасла таранаˮ серо вадеˮӈаваˮ. Мань харˮн ями ӈулиˮ мэнев, сяӈав. Яваˮ нибˮнаˮ хабтомдамбюˮ нувˮ сармиканаˮ хаӈгуˮ, иˮмаˮ нёхолтаӈгу, хабцяˮ ӈадимзь пиртадоʼ. Якоцяваˮ сяӈгаваˮ, лэтрамбахаваˮ, — акцияхана мэвы Саляӈгарадʼ тер Александр Лаптандер мась.Тюку хареˮ ямʼ сямаʼ няюмна сюрхалёда сермʼ 2023 поход пядонзь. Тедаʼ тетимдей поʼ сертабидоʼ. Россиянаˮ няхарˮ юˮ самляӈг яхана минредонзь. Тет юˮ самляӈг ёнарˮ пирˮ тодоˮ ёˮ терˮ ӈокханда 420 тоннаʼ пирˮ табормʼ маˮлавыць.Анна Яптикʼ падвы

Ямдоʼ хабтомдамбиˮ

Таттама: Лариса Айваседо таттамы

<div class="content-lead">Мякнантоӈ куԓкаԓитуӈ тадяˮ. Танякуйˮ дяԓяхана Таԓкан мячидёԓтаˮ ненаˮ «Юты капи яха» нимиʼта ӈысыхит мэнаˮ тоӈашˮ. Шичитоӈ фестивальхана нятакомантуӈ мэт, ненэй мятуӈ Ягельхана ӈамтамантуӈ мэт каптамайˮ.</div>Ненэй мятуӈ камна куԓкаԓиˮ тамайˮ. «Юты капи яха» ӈысым няампёта Людмила Айваседа ниˮ кайканатаˮ няш мячидёԓяш. Такиˮ дяхататоӈ каԓьтуӈ машенʼ канхана томайˮ. Шаӈкмян ӈамыкутоӈ таӈкун дян прицепхана хонԓапё тамытуӈ. Ненэй мякнантоӈ куԓкаԓитуӈ тадяˮ. Пыʼтоӈ пя поӈкна диԓинаˮ ненэй нешадиˮ диԓивсум, капидиˮ дилым ӈычимчимпиˮ. Пяй ӈану, канʼуди, кадяԓ, дюмпушаӈ, ӈын, лукиˮ, паԓыӈ — куԓкаԓиˮ выӈкна ӈайваш мэтаˮ миԓьвиˮ ӈычимчеӈашˮ.Каԓьтуӈ шеԓтамайтуӈ шанат сувенирˮ, шанаʼкуˮ, мэкатамна хӭтмыˮ паныˮ, мялякой нёвшаӈ, таӈатˮ — шаӈкмян ӈамыкутоӈ дёԓьше меԓьмана шеԓтамыˮ. «Юты капи яха» дют пуӈ чеӈай шеԓтамы, выӈкай ӈысыхит ӈычимы. Диԓишатуӈ дяханантоӈ тытуӈ тадямэˮ, куԓкаԓиˮ мансԓа мэчитуӈ ӈамыдётуӈ тадяˮ, маньшту Людмила Айваседа. Пыʼта тамна нючаӈӭ шаӈкмян выӈкай мансдян тохомай, таԓям нешаӈ диԓивсом мюʼта чедимяӈата. Четаӈ фестивальхана мяктоӈ ӈука тэмс нешаˮ чуштушˮ.Маняˮ ненэй неша ненаˮ ӈупчики таньняӈ тоштушˮ. Людмила кайкана няˮши мяктуӈ тотаˮ нешаӈкиˮ куԓкаԓиˮ мастер-классуˮ, нешадиˮ, капидиˮ шанаʼкуˮ ӈычимчештушˮ. Пыʼтоӈ дёԓьше пимшиˮ, нешайˮ диԓивсом тамняԓи хомана вачаӈатуӈ. Ӈамыԓкай миԓв ӈамэхана мэмам ӈычимчеӈаˮ, куше пяй ӈанохана хомана нынутамам тапатаӈаˮ.Мяктуӈ чуниԓтаˮ нешаˮ маньштушˮ, выӈкай дилм хомана чедимянаˮ ненаˮ таньше ненэй нешадиˮ, капидиˮ диԓивсум ӈычимчемпюма ӈаԓтанаˮ ӈашкӭхӭнаˮ дёԓьше хома. Ненаˮ Таԓкан мясамыӈ мячидёԓьш неԓьчеэй томатуӈ, маньштуˮ шичитоӈ маняˮ дяханана хомана дятаптаӈаˮ. Навэт ӈай чуняӈ мячидёԓьш томан хаʼӈаˮ.Лариса Айваседо патмы

Мячидёԓтаˮ ненаˮ

Сидяӈг: Алиса Неркахыʼ тавы

<div class="content-lead">Сидя пэдава Тасуʼ яʼ тер нехэʼ Алиса Неркахы няби Любовь Ванойʼ форумхана мэӈаханзь. Ненэй вадавна хэта нюмда «Хувы». «Дом творчества» мякана няби «Полярная звезда» тохолкулвахана ӈацекы тохоламбдаӈэ манзаранахаʼ Курганской областянʼ ханˮӈаханзь.</div>Алиса илебей ненэциеˮ нямна ӈэда серо минрена. Манзара яда «Школа Ямолод» нюбеˮӈа. Любовь ӈацекы ненэй ваданʼ тохоламби. Тикэнда хавна сёбарˮ.— Мань тюкохо на мале мэдамзь. Сейхани сававна хаˮмыць. Тедаʼ ӈадьбята ӈаниʼ ӈопой таняʼ хэсь идейваць. Тад тованда похона мале поˮомнаниˮ тарця форуманʼ еремзь нив пиратˮ. «Урал семейный» тохолковамʼ тэрадамзь. Ниниˮ няʼ «Летопись семьи» проектмʼ сертаваць. Инаˮ ядэрабцоʼ хара ти: ӈамгэри ненэцьʼ харта невхыˮ паӈгода лэтрамба, нюхута вадець пирта. Ямалхананаˮ хуркариˮ мядʼ терˮ илеˮ, ханяд перевамдоʼ теневабтоʼ ӈаниʼ сава ӈэӈгусь. Ӈаниˮ ёˮ терˮ илебейˮ ненэциеˮ хурка проект минревамʼ намдадмʼ. Яʼ ханярина яляʼ няʼ ӈэда серо минрена ӈулиˮ ӈока ӈэвы. Поӈганандоʼ мэнахани едэй ӈамгэхэвмʼ пясь харвабцоми тось. Нерняриʼ ӈэвамдоʼ маниенахани, таславась: «Пиртав». Саць теневндами «Ораторское мастерство» нямна ӈа. «Сила наследия» лахарёмʼ ӈаниʼ нив юраӈгуˮ. Хареˮ паӈг тенева, тене тараваʼ нямна ӈэда лахарёваˮ минˮӈась, — ядэроˮмамда Алиса Неркахы таремʼ вадеˮӈада.Усть-Утяк хардахана самляӈг яляʼ матˮ явна манзараць. Мядʼ терˮ серо, невхы тенмʼ сахарамбаваʼ, сенз ӈэваʼ, мядомаʼ, сяхариʼ ӈуданданаӈэ хэваʼ нямна ӈаць. Маняˮ округнаˮ едʼ табедавы — «Урал рабочий». Тасламбвэдоʼ мирта, электрик, сварщик, сэдорана манзаиˮ тэнзˮ таромʼ ӈармдамбава, нерняʼ пэрма ӈэвысь. Сиддоʼ Ямалнаˮ илебейˮ ненэциеˮ серо тидхалембада департаментʼ ӈудандана Наиль Хайруллин лаханако няˮмысь.Ямалхаднаˮ самляӈг юˮ ненэцяˮ тохолкурманзь ханˮмыць. Ӈокхандоʼ няхарˮ юрˮ няхартонзь. Россиянаˮ тодоˮ ёˮ республикахат, областьхат, ӈаркаˮ хардахат товыць. Малʼ общественной манзаямʼ пэртаˮ, волонтёрӈэ таранаˮ, илебейˮ ненэциеˮ организацияхат перенаˮ, ӈацекы тохоламбадаˮ, тамна ӈаниˮ.Тад тованда похона «Утро» маняˮ яхананаˮ ӈэванзь мэ. Уральской федеральной округхана Россияʼ ӈуданданаʼ серо тасламбада Артём Жога таремʼ мамысь.Анна Яптикʼ падвы

Тохолкурмэхэʼ

Сидяӈг:  Юрий Здебский' тадтавы

<div class="content-lead">Нумда ӈэрёймаʼ серʼ сиднаˮ ӈаниʼ пыхыданаˮ хабцяӈгат лекарабтамба табедамбиˮ. Ямалʼ терˮ еˮэмня гриппхад яӈганаванзь Ноябрьсканʼ нерденаˮ 130 ёнарˮ вакцинамʼ тэвравыˮ. Тикыдоʼ округнаˮ тиӈгэвна лекарˮ мядоˮмана тяртыдоʼ.</div>Ӈарка лекарˮ не Елена Родинаʼ вадавна, хусувэй ненэцьʼ пыхыдамда гриппхад яӈга пирӈада. Неноховавна нерденаӈэ тохолкодаˮ ӈацекы, сиддоʼ тохоламбади яӈгабиˮ. Ӈокханда округхананаˮ 310 ёнарˮ янаˮ термʼ лекаратаванзь тасламбиˮ. Таремʼ ӈэбта, хаӈгуртаˮ тянё ӈэӈгуˮ.«Ультрикс Квадри» нюбета пардон саӈговотаˮ неˮ, хаӈгуртаˮ ӈацекыˮ еˮэмня таславы. «Совигрипп» няби «Флю-М» пардонхаʼ ӈармы ненэцие, ӈацекы яӈгаба мэˮэйдоʼ.Лекарˮ нянаˮ лахана: «Тедаʼ мале пыхыдамда яӈгавы ненэцьʼ няхарˮ юˮ яляʼ серʼ сёнзянда мюня палаӈгана хабцямʼ пирдалембада ныхыда ӈадимда. Тадриʼ хабцямʼ палабтавы ӈэбта ӈодˮ, саць ни хаӈгуртˮ, мерʼ савумда».Пыхыдамда гриппхад яӈгаванʼ харвана лекарˮ мятʼ хэбта тара, таняна нердеʼ хаӈгурмамда, нивамда таслаӈгуˮ. Тикыʼ еˮэмня ӈаянда явомʼ, сёнда хурка ӈэвамʼ манэтаˮ, тяхасовна хонраӈгудоʼ, тикыʼ пуд сенз ӈэвамда манэˮмахадандоʼ гриппхад вакцинамʼ ӈабтаӈгуˮ. Мале хаӈгулавы ӈэбта, прививкамʼ ниˮ ӈабтамбаӈгуˮ, таремʼ вэва. Савуˮмарихиданда, ирыʼ пеля хэˮмяхад лекарабта пиртадоʼ. Галина Окотэттоʼ падвы

Лекарˮ табекоˮ

Сидяӈг: Андрей Ткачёвʼ тадтавы

<div class="content-lead">Паюта фактория Лабараваʼ харадʼ хэвхана ӈа. Ты пэртяˮ ненэцяˮ етриʼ таняʼ тэворць пэрӈаˮ. Приуральской районхана ӈулиˮ нита тяхана ӈэда лабканʼ ханяӈыˮ ӈаврандуванзь турӈаˮ, ӈаниˮ — тыдоʼ хабарманзь.</div>Хабартаваʼ паӈодоʼ таняӈы хардахана мерʼ пэсетыˮ. Пилюˮ ирыʼ пудана яляхана мале нюртейˮ тыдоʼ тэвравыˮ ненэциедоʼ ӈадиберӈаˮ. Хусувэй поʼ нита нерня тыˮ мандалмʼ Ӈытармиˮ саляʼ вымна мюсерта Максим Сэротэтто тэврасеты. Тюку поʼ ӈаниʼ таремʼ еремя.Тандаяʼ мяканда мядондаˮ турмыць. Поӈганандоʼ «Оленеводы мира» ассоциацияʼ ӈэвахана мэна Сергей Николаевич Харючи мэвысь. Саляӈгардахад факторияʼ ӈэсондʼ машинахана хэвыць. Ӈэсыʼ ӈэсондʼ ӈарка «тобатана» квадроциклхана тэвавыдаць, сиддоʼ мякыˮ нидоʼ хосаявыць. Ӈэдалёроˮмамда нянаˮ редакциянʼ тюӈгаванда серʼ вадеˮӈадась. Пыда маˮнисяв:— Тедаʼ выӈгана иленаˮ мале хабарта пэйдаць. Нита нерня Максим Сэротэтто тыда хабарталваʼ мятʼ танэйдась. Тыта хэваˮ саваˮ. Мюсьлаванда няна яда ӈамдэцавэй, нядасавэй. Лабкамʼ няˮамбада луца маˮнисяв, хусувэй поʼ тыда ӈайцетыˮ. Хабарпада тэнда саӈгомʼ сидндет юˮ килограммʼ пиртʼ тэворцеты. Невхэнда тотревʼ маниена ты ёльцяӈгананда нылаӈга. Яʼ малʼ вымна мюсертахат пыда ӈулиˮ нита тяхамна, идʼ варувна ханˮӈа. Пэˮ терˮ няӈыˮ няданда хахаиˮ. Ты пэртиˮ вадавна сарюˮ понʼ яӈгобˮ ӈодˮ, тюку поʼ тада сава ӈэвысь. Таʼ тоˮ, яхаˮ хэвувна ханˮмыˮ. Ӈопойˮ, тыдоʼ падрота сармик вэнолабтамба пявыда.Тад нерня етриʼ хабартаваʼ паӈо минда. Ӈокханда юкад вата самляӈг хабарта яˮ Ямальской, Приуральской, Тазовской, Пуровской, Шурышкарской, Надымской районхаˮна манзараӈгуˮ. Тедаʼ ӈамгэˮ мэвдавэйˮ серодоʼ тасламбиˮ. Хорˮ ирыʼ пуданаˮ яляхаˮна ты пэртяˮ миˮмандаˮ тыдоʼ тэрабаӈгуˮ. Тэврамбадитоʼ поӈгана ӈармыˮ хабтеˮэдоʼ, хэхэдана, енемда яˮмана малкадоʼ, тецьда сывымʼ ниня пирдалеваʼ пирˮ тыдоʼ танабаӈгуˮ. Неноховавна тыˮ яӈгавыˮ, биркахаˮна ненадумдавыˮ ӈэбˮнандоʼ сероˮӈаˮ.Автор: Анна Яптикʼ падвы

Яхана пэйдаць

<div class="content-lead">Хэвы поʼ янаˮ ӈэвахы ервʼ табековна вэбаʼ ирыʼ 8 ялямʼ ненадоӈэ таславэдоʼ. Тикы яляʼ Россияʼ яхананаˮ иленаˮ ненэциеˮ тэнзˮ вади лэтрамбаваʼ няӈыˮ серо вадеˮӈаˮ.</div>Яʼ сяр нина ненэцяˮ тэнзˮ пилиˮ ӈокаˮ. Хибярихиˮна хартоʼ вададоʼ нянандоʼ мэсыдоˮӈа. Вадамдоʼ мэць пирмаханандоʼ илебядёдарахаˮ, мэбетархаˮ ӈэӈгуˮ. Ханяӈыˮ толырмавнандоʼ тянёмбатоʼ, вадавнандоʼ лахана ӈэвадабтоʼ тэнзадоʼ яʼ сярʼ нид пилиˮ ёхо пиртада. Таремʼ яʼ нид тэмзавыˮ вадаˮ ӈокаˮ.Сяхариʼ хуркари ненэцяʼ тэнз яʼ нид нива ёховаʼ еˮэмня янаˮ терˮ вади лэтрамбаваʼ няюʼ ӈэда ялямʼ ненадумдавыˮ. Ӈарка ялямʼ сиˮив яʼ тяхамна юнета Расул Гамзатовʼ сояˮмаʼ яляʼ едʼ тидхалевэдоʼ. Сидя яʼ вадавна падвыда ёʼ терˮ ӈобˮ няюʼ няслёваʼ нямна ӈаˮ. Тикыда невхы мэˮмы илаʼ саироʼ теневаваʼ, тедаʼ юрёсаӈэ илеваʼ еˮэмня пилиˮ тенилӈэ тараˮ. Ӈарка яʼ терӈэ сян тэнзмʼ мэпˮнанаˮ ӈод сидя вадаваˮ мэць илеваˮ. Луцаʼ вадавна лаханабˮнанаˮ помнанаˮ малʼ нинаˮ хамэдамбинаˮ.Тикы яляʼ таняʼ таславыˮ мутра мэць сяниˮ тэнзˮ вадавна ӈэда диктантмʼ падыбиць. Салехардʼ маркана Национальной библиотекахана ненэй ненэцяʼ, хабиʼ, ӈысмаʼ вадавна паднаванзь маˮлыць. Диктантмʼ минревыˮ Расул Гамзатовʼ падвэвнаʼ толаӈгуць. Ненэй вадавна толаӈговы «Няръяна Ӈэрм» газетанаˮ редакторӈэ тарана — Марина Тэтакучевна Яр. Падыбавэхэнандоʼ юнета паднана сидя ваданда нямна ӈулиˮ лимбикавна лахана. Хусувэй хибя таремʼ инда ядэрпʼ яʼ тирʼ нимна тэмзаӈгана вада яӈгоданакы.Тедаʼ маркаˮна иленаˮ ӈэрмʼ терˮ хартоʼ вадавнандоʼ ӈэда вабцмʼ сабе намдорць, мэць ӈэвадаламбидоʼ. Ханяӈыˮ илебейˮ ненэцяӈгаˮна ӈопой вадаривна лаханакурмадоʼ нензелˮ. Тиканда хартоʼ тэнзатоʼ ваданʼ тэя ӈэвадаӈгаˮ. Тикыʼ хавна школахана тохолкурти тохоламбдахат хариˮ вадиˮ урок тянюлембидоʼ. Тедариʼ ӈыхыˮ нюдяˮ хардахаˮна иленаˮ, нябиˮ хойʼ няна мюсертаˮ маркана иленаˮ ненэцяӈгˮ манэкава вадамдоʼ няхататоʼ сававна мэˮӈадоʼ.«Наследие» нюбета толаӈгурмаʼ хардахана «Сила языка и культуры» лахарёмʼ мэˮманзь Марина Серасхова Ямалʼ яхананаˮ иленаˮ нида маˮлась. Ӈэрмʼ терˮ ненэциеˮ вади нерняʼ пэртаˮ нинаˮ хартоʼ ибедоромидоʼ вадеˮӈаць. Наукамʼ тохоламбадиˮ падвэвна лаханакурӈаць. Пилиˮ нердеʼ маˮлёвыˮ няхата вадамʼ Елена Тимофеевна Пушкарёва хэтась. Пыда вади лэтрамбава ӈарка тарабцомʼ тензибтесь. Тамара Борисовна Лаптандер ӈысмиˮ вадамʼ невхэхэт ханзерˮ ученойˮ тохоламбавамʼ вадеˮӈась. Валентина Нелековна Няруй ненэй вадамʼ мядʼ терхат минре табекурӈась. Клавдия Павловна Макарова хабиˮ вадавна ӈэда паднаваʼ сермʼ тоенанаӈэ вадеˮӈась.Ӈани лаханавыˮ вадеˮмыдоʼ тедаʼ ханзерˮ тамна тяхаʼ хариˮ вадавна лаханакурмаʼ сероʼ минреваʼ нямна ӈаць. Телевиденияхана, радиохана манзаранаˮ вади тохоламбаваʼ няюʼ минренаˮ серодоʼ вадеˮӈаць. Маркана иленаˮ хариˮ вадамдоʼ нерняʼ минревамдоʼ ӈаниʼ тасламбиць. Библиотекахана манзаранаˮ «Сородичи по языку» проектʼ нямна лаханаць. Сиддоʼ нядˮмяць вадамʼ тохоламбван харванаˮ маˮлюртаˮ, лаханакурць тохолкодаˮ.Тикы яляʼ ямбанʼ Ямалʼ янаˮ ӈардавна школахаˮна, садикахаˮна манзаранаˮ ӈацекытоʼ няʼ ӈаниʼ хуркариˮ серо минрець. Илебейˮ ненэцяˮ хариˮ вадавнатоʼ лаханани, толаӈгоди тарабтамбада акцияхаˮна, сянакубцахаˮна пыхыдадоʼ хорпиць.Россияʼ янаˮ терˮ сян тэнзмʼ мэпнандоʼ ӈодˮ сидя вадамдоʼ мэць илеˮ. Луцаʼ вадамдоʼ мэпнандоʼ помнандоʼ малʼ нидоʼ хамэдамбидоʼ. Хартоʼ вадавнандоʼ невхыˮ иринатоʼ сё тамна понʼ намдоръядоʼ. Вадандоʼ таняванʼ ненэцяˮ яʼ сярʼ нина тэнзадоʼ переӈгуˮ.Нюдяне Махакуйʼ падвы

Вади лэтрамбаваʼ няюʼ

<div class="content-lead">Таԓкаӈ дяԓяхана культурахана мансԓанна» куԓкаԓи» шеԓтаӈаш». ЦНКхана мансԓанна» нешай» дет тасԓёта шича проект’ нычимчеӈаш». Чики ӈайвачетуӈ чуки похона шеԓтамайтуӈ. Неԓьчеэй «Арктический дизайн» ними’та проект’хана хайтуԓаш тохотамы» ниӈашки» мысы» дяԓнасутуӈ ӈычимчимпиш». </div>Мэкатамна паным хӭтма вивӈут ЦНКхана мансԓана Мария Вокуева ни нюхунанта дёԓимяшо’ комыта. Деты паныдётуӈ дизайн’, эскиз’ ниӈашкӭэ» каԓьтуӈ шеԓтамайтуӈ. Хӭтмайтуӈ паныдётуӈ дёԓьше мэкат», меԓьмана шеԓтамы». Таньше детымана паныдю хайтуԓаш шичитоӈ няхаԓ эксперт’ тохоԓымпиш». Ниӈашки» ӈычимчемпюта» деты» демьпчаԓу» манымантуӈ мэты» шанат тэмс неша» ӈомаш». Хыниԓмы» маньшту», ниӈашкӭэ» хӭтмайтуӈ паныдётуӈ дёԓьше мэкат», меԓят». Мысы» дяԓнасутуӈ ӈычимчемахатуӈ, «Арктический дизайн» проект’хана хайтуԓаш тохотамы» ниӈашки» тотуӈ сертификату» ня’амӈаш», шичитуӈ нятапёмэхӭ» ӈай благодарственный’ патԓу» миӈаш». Чикиӈ камна Таԓкаӈ чеԓ» нешаӈк» ходюуди» де’эмня ӈайта проект’ «Культурный код: Авка» ними’та ӈычимчеӈаш». Шеэв авкан миԓас наԓамай вешахат шеԓтамай». Чикитуӈ Ӈэԓм’ чеԓ» нешай», ӈысми» ватамана нимчимайтуӈ: Бурчик, Сомма, Вындер, Ёртя, Лямпа, Арни, Хома. Авка» каԓват поӈкна шанат дяхана вы’ны». Авки» куԓка ӈаймямтуӈ, куняна, намы дяхана мэмамтуӈ ӈашкиудехе» вачаӈатуӈ. Хыниԓмы» ӈашкиуди» майпёшь шана’куш», тат неԓьняӈ чики наԓамай ходюуди» каԓват помна пюԓтдятуӈ.Лариса Айваседо патмы

Шичаптыӈ хомахаӈ

Таттама: Андрей Понамарев' таттамы

<div class="content-lead">Пюԓ дяхана диԓина» неша» Таԓкаӈ кашемдюԓ» няхаԓ пот кӭймя дяԓям мэ’ӈаш». Таньдет хомана ӈанатамэт. Таԓкахана диԓина» нешай» хомана ныптакомаӈ мэты культурахана, спортхана мансԓанна» куԓкаԓи» вильта» мероприятии» шеԓтаӈаш».</div>Каԓтантуӈ дяԓям Таԓкаӈ чеԓ» неша» хома шоньшахана мэ’ӈатоньш». Каԓват тамна шанат площадкахана» мероприятитоӈ миньдяш». Таԓкаӈ дяԓяхана хомана ныптакомаӈ мэты куԓкаԓи» ӈамыдю» шеԓтаӈаш». Праздниктуӈ вильмаӈ мэты шанат учреждении» нятакуш». КСК «Геолог» кӭвхана вильта» мастер -классу» минԓеӈаш», ӈашки» шана’кот шеԓтаӈаш». Куԓкаԓи» выставка» тадяӈаш, шанат ӈамыдю» ӈычимчимпиш», мичиԓпиш». Ненэй мят «Торова» меӈаш». Таньняна «PRO.ЧУМ» ни’мита этнопроектмана Ӈэлм’ чеԓ» нешай» дилыӈ нямна ӈайта выставкам’ найӈаш». Ненэй мят мячидёԓьш чуниԓтаха» выӈкай дилм, культурам’ вачаӈаш», ӈычимчеӈаш». Мякна куԓкаԓи» пяхат мемы» фигурка», выӈкай дилым ӈычимчемпюта», тадяӈаш». Шанат тэмс неша» мят чуштуш». Спортхана мянаԓман ха’та» «Прибрежный» паркан’ ӈомаш». Таньняна шанат спортхана» мянаԓяш». Таԓкаӈ чеԓ» неша», наӈича дяхат томы» мячинта» пӭмшамчуй дяԓяӈ вӭкна ӈаԓка концерт’ маныдеӈаш». Таԓкаӈ чеԓ» нешади» поздравийпёшь Хаԓяӈкаԓтыхит томы ансамбль «Сыра’сэв» таԓаӈаш, Ӈэԓм’ чеԓ» ниӈашки» группа’ «Хомани» кынуӈаш. Чикиӈ камна «Сленг» ними’та кавер-группа куԓкаԓи» кынсу» мэ’ӈаш, Татьяна Куртукова кынуӈаш. Пиԓи путанахана Таԓкаӈ чеԓ» нешаде» Dabro ними’та группа’ поздравийдяташ. Кынутаха» дюньшиԓемантуӈ мэты» ӈука тэмс неша» ӈомаш». Каԓтантуӈ дяԓям Таԓкаӈ чеԓы» мячидёԓта» нетуӈ няши хома шоньшахана мэ’ӈатоньш».Лариса Айваседо патмы

Няръяна Нгэрм

Публикации автора