Няръяна Ӈэрм
Нядˮмитоʼ есямʼ ӈокамдаӈгудоʼ
Россия янаˮ ӈардавна нюсавэйˮ неˮ яӈга нядˮмадоʼ таня. Падаркана «материнский капитал»мʼ нюбеˮӈа. Тикы хусувэй ӈацекэхэндоʼ таславы нядаӈгосэйдоʼ.
2027 похона яра ирыʼ нюртей яляхад нядˮмандоʼ термʼ ӈокамдаӈгудоʼ, 5,2% пирувна ӈарамдаӈгудоʼ. Поʼ пудана вэкана янаˮ ӈэвахана мэнаˮ ервˮ тамна тасламбаӈгудоʼ. Вадавнандоʼ, тадриʼ тердандоʼ таранаˮ есяˮ хаця мирцяламдаˮ. Ӈадьбята ӈокамда тараˮ.
2026 похона тарця нядˮмадоʼ ӈардада тамбирˮ:
— нердена ӈацекыˮ еˮэй — 729 ёнарˮ,
— нябимдей ӈацекыʼ еˮэй — 234 ёнарˮ пирˮ,
— нердена ӈацекыʼ еˮэймʼ нивы ӈэбтоʼ няˮамˮ, тикахана нябимдей нюндоʼ сояваʼ пуд, няˮмуванда «материнский капитал»ʼ терда 963 ёнарˮ пирˮ.
2027 похона нядˮмидоʼ тамбирувна ӈокамдаˮ:
— нердена ӈацекыˮ еˮэй 767 ёнарˮ пирˮ ӈэӈгу,
— нябимдей ӈацекыʼ еˮэй 247 ёнарˮ ӈэӈгу,
— нердена ӈацекыʼ еˮэй сертификатмʼ нивы ӈэбтоʼ няˮамˮ, нябимдей нюндоʼ соябˮ, няˮмуванда нядаӈгосэйндоʼ тер 1 013 000 ӈэӈгу.
Галина Окотэттоʼ падвы
Авторы
Няръяна Нгэрм
Темы